ಲೈಫ್ ಸ್ಟೈಲ್
ಪಕ್ಷಿ ಪರಿಚಯ | ಕಾಜಾಣ
- ಭಗವತಿ ಎಂ.ಆರ್
ಕಾಜಾಣವು ವಿಶೇಷವೆ ಎನ್ನಬಹುದಾದ ಪಕ್ಷಿ. ಅದರ ಸ್ವಭಾವವೇ ಅದಕ್ಕೆ ಕಾರಣ. ರಾಜಕಾಗೆ” ಅಂತಲೂ ಕರೆಯುತ್ತಾರೆ. ದೂರದಿಂದ ನೋಡಿದಾಗ ಕಾಗೆಯಂತೆಯೇ ಕಾಣಬಹುದಾದರೂ ಕಾಗೆಯ ಜಾತಿಗೆ ಸೇರಿದ ಪಕ್ಷಿಯಲ್ಲ. ಇದನ್ನು “ಕಪ್ಪುಮಿಶ್ರಿತ ಬೂದು ಬಣ್ಣದ, ಕವಲೊಡೆದ ಬಾಲದ, ಮಿಂಚುವ ಕೆಂಪು ಕಣ್ಣುಗಳ, ಸಪೂರ ದೇಹವುಳ್ಳ ಕಾಜಾಣ ಬಹಳ ದೈರ್ಯಶಾಲಿ.
ತನಗಿಂತ ಗಾತ್ರದಲ್ಲಿ ದೊಡ್ಡದಾದ ಪಕ್ಷಿಗಳ ಮೇಲೆ ಯಾವುದೇ ಭಯವಿಲ್ಲದೆ ಎರಗುತ್ತದೆ. ಕಾಜಾಣದ ಗೂಡಿರುವ ಜಾಗದಲ್ಲಿ, ಇತರೆ ಸಣ್ಣಪುಟ್ಟ ಪಕ್ಷಿಗಳು ಗೂಡು ಕಟ್ಟಿಕೊಂಡಿರುತ್ತವೆ. ಕಾಜಾಣವು ಗೂಡಿನ ಬಳಿ ಬರುವ ಇತರೆ ಆಕ್ರಮಣಕಾರಿ ಪಕ್ಷಿಗಳನ್ನು ಓಡಿಸುತ್ತವೆ. ಕಾಜಾಣ ನಿಂತಲ್ಲಿ ನಿಲ್ಲಲಾರದು. ಬಹಳ ಚುರುಕು, ಆದರೆ, ಮೂಗಿನ ಮೇಲೆ ಕೋಪ ಅವಕ್ಕೆ !
ಕನ್ನಡದಲ್ಲಿ ಕಾಜಾಣ ಅಂದರೆ ನೆನಪಿಗೆ ಬರುವುದು ಶ್ರೀ ಕುವೆಂಪು. “ನಿನಗೆ ನಮೋ ಓ ಕಾಜಾಣ” ಎಂದಿದ್ದಾರೆ “ಕಾಜಾಣ” ಪದ್ಯದಲ್ಲಿ. ಕುವೆಂಪುರವರ ಪುಸ್ತಕಗಳ ಮುಖಪುಟಗಳಲ್ಲಿ ತಂತಿಬಾಲದ ಕಾಜಾಣದ ಜೋಡಿಯ ಚಿತ್ರ ಇದ್ದೇ ಇರುತ್ತದೆ. ರೈತರ ಹೊಲಗಳಲ್ಲಿ ಬೆಳೆಗಳನ್ನು ಹಾಳು ಮಾಡುವ ಕೀಟಗಳನ್ನು ಹಿಡಿದು ತಿನ್ನುವುದರಿಂದ ಸಹಜವಾಗಿಯೇ ರೈತನಿಗೆ ಉಪಕಾರಿಯಾದ ಪಕ್ಷಿ ಇದು. ಈ ಪಕ್ಷಿ ನಮ್ಮ ಸುತ್ತಮುತ್ತ ಇದ್ದಾಗ ಬೇರೆ ಹಕ್ಕಿಗಳ ಕೂಗನ್ನು ಅನುಮಾನಿಸಿ ನೋಡಬೇಕಾಗುತ್ತದೆ. ಬೇರೆ ಪಕ್ಷಿಗಳನ್ನು ಅನುಕರಿಸುವಲ್ಲಿ ಕಾಜಾಣ ಬಲುಜಾಣ!
ಸುದ್ದಿದಿನ.ಕಾಂ|ವಾಟ್ಸಾಪ್|9980346243
