ಸಾಂಕ್ರಾಮಿಕ ಮತ್ತು ಅಸಾಂಕ್ರಾಮಿಕ ರೋಗಗಳು; ಒಂದು ಅರಿವು

ಜೀವಿಗಳ ಬೆಳವಣಿಗೆಯಿಂದಲೇ ಅವು ಜೀವಿಗಳು ಎಂದೆನಿಸಿಕೊಳ್ಳುತ್ತವೆ. ಅಂತೆಯೇ ಮನುಷ್ಯನ ದೇಹವೂ ಕೂಡ. ಆದರೆ ಪರಿಸರದ ಯಾವುದೇ ಒತ್ತಡಕ್ಕೂ ಮಣಿಯದೇ ಅಥವಾ ದೇಹ ತನ್ನ ಯಾವ ರೀತಿಯ ದಿನಚರಿಯಿಂದಲೂ ತನಗೆ ಯಾವುದೇ ಹಾನಿಯಾಗದೇ ಯಾವ ಜೀವಕಣಗಳೂ ಇರುವುದಿಲ್ಲ. ಪರಿಸರಕ್ಕೆ ತಕ್ಕಂತೆ, ದೇಹವು ತನ್ನ ಜೀವಕಣಗಳನ್ನು ಪೋಷಿಸುವುದಕ್ಕೆ ತಕ್ಕಂತೆ ಜೀವಕಣಗಳೂ ಪ್ರತಿದಿನ ಬದಲಾವಣೆಗಳನ್ನು ತೋರಿಸುತ್ತದೆ.

ಅಂದರೆ, ಒಬ್ಬ ವ್ಯಕ್ತಿಯು ರೋಗಪೀಡಿತನಾಗಿದ್ದರೆ ಒಂದು ಸಣ್ಣ ಸೊಳ್ಳೆಯಿಂದಲೂ ಅದು ಇನ್ನೊಬ್ಬರಿಗೆ ಹರಡಬಲ್ಲದು. ಒಬ್ಬ ವ್ಯಕ್ತಿಗೆ ಅತಿಯಾಗಿ ಕೊಲೆಸ್ಟ್ರಾಲ್ ಪದಾರ್ಥವನ್ನು ತಿನ್ನುವ ರೂಢಿಯಿದ್ದರೆ ಕ್ರಮೇಣ ಅಧಿಕ ರಕ್ತದೊತ್ತಡ ಉಂಟಾಗಿ ಮುಂದೊಂದು ದಿನ ಸ್ಟ್ರೋಕ್ ಕೂಡ ಆಗಬಹುದು.

ಯಾರಾದರೂ ಯಾವುದಾದರೂ ಒಂದು ರೋಗಕ್ಕೆ ತುತ್ತಾಗಿದ್ದರೆ ಅವರ ಸನಿಹದಲ್ಲಿರುವವರಿಗೆ ಯಾವುದೋ ಒಂದು ಕ್ಷಣವಾದರೂ ಹಾದುಹೋಗುವ ಪ್ರಶ್ನೆ ಅವರ ಬಳಿಯಲ್ಲಿ ಹೋದರೆ ತಮಗೂ ಆ ರೋಗ ಹರಡಿದರೆ ಅಪಾಯ ಅಂತ. ರೋಗಗಳು ಹೀಗೆ ಒಬ್ಬರಿಂದೊಬ್ಬರಿಗೆ ಹರಡುವ ನಿಟ್ಟಿನಲ್ಲಿ ಯೋಚಿಸಿದರೆ ಎರಡು ಭಾಗಗಳಾಗಿ ವಿಂಗಡಿಸಬಹುದು.

ಅತ್ತ ಒಬ್ಬ ರೋಗಪೀಡಿತ ವ್ಯಕ್ತಿಯಿಂದ ಇನ್ನೊಬ್ಬ ವ್ಯಕ್ತಿಗೆ ಹರಡುವ ರೋಗಗಳು ಸಾಂಕ್ರಾಮಿಕ ರೋಗ ( Communicable diseases) ಗಳೆನಿಸಿಕೊಂಡರೆ ಇತ್ತ ಒಬ್ಬರಿಂದೊಬ್ಬರಿಗೆ ಹರಡದೇ ವ್ಯಕ್ತಿಯ ದೈನಂದಿನ ಜೀವನಶೈಲಿಯನ್ನು ಅನುಸರಿಸಿಕೊಂಡು ಅಥವಾ ಅನುವಂಶಿಕವಾಗಿ ಯಾವುದೇ ಮುನ್ಸೂಚನೆಯಿಲ್ಲದೆ ಬಂದು ಸುದೀರ್ಘ ಕಾಲದ ಬಳಿಕ ದೇಹದ ಮೇಲೆ ತನ್ನ ಪರಿಣಾಮಗಳನ್ನು ಬೀರುವ ರೋಗಗಳು ಅಸಾಂಕ್ರಾಮಿಕ ರೋಗ ( Non communicable diseases) ಗಳೆನಿಸಿಕೊಳ್ಳುತ್ತವೆ.

ಸಾಂಕ್ರಾಮಿಕ ರೋಗಗಳೆಂದರೆ ಮಲೇರಿಯಾ, ಡೆಂಗ್ಯೂ, ಚಿಕೂನ್‍ಗುನ್ಯಾ, ಕ್ಷಯರೋಗ, ಕಾಲರಾ, ಹೆಪಟಿಟಿಸ್, ಹೆಚ್‍ಐವಿ ಮುಂತಾದ ರೋಗಗಳನ್ನು ನೋಡುತ್ತೇವೆ. ಸಾಂಕ್ರಾಮಿಕ ರೋಗಗಳು ನಮ್ಮ ದೇಹ ಪ್ರವೇಶವಾದ ನಂತರ ತಮ್ಮ ಆ ರೋಗಕ್ಕೆ ತಕ್ಕಂತೆ ಗುಣಲಕ್ಷಣಗಳನ್ನು ತೋರಿಸುತ್ತವೆ. ಆದ್ದರಿಂದ ತಕ್ಷಣವೇ ವೈದ್ಯರಿಂದ ಸಮಾಲೋಚನೆ ಪಡೆದರೆ ಅವುಗಳ ವಿರುದ್ಧ ಗೆಲ್ಲಬಹುದು.

ಸಾಂಕ್ರಾಮಿಕ ರೋಗಗಳನ್ನು ತಡೆಗಟ್ಟಲು ಮುನ್ನೆಚ್ಚರಿಕಾ ಕ್ರಮಗಳು

• ಶುದ್ಧ ನೀರು, ಶುದ್ಧ ಆಹಾರ ಪದ್ಧತಿಗಳನ್ನು ರೂಢಿಸಿಕೊಳ್ಳಬೇಕು.
• ಸುತ್ತಮುತ್ತಲಿನ ಪರಿಸರವನ್ನು ಶುಚಿಯಿಂದ ಕಾಪಾಡಿಕೊಳ್ಳಬೇಕು.
• ನಂಜಾಗುವ ಅಥವಾ ಸಾಂಕ್ರಾಮಿಕ ರೋಗವುಳ್ಳ ಯಾವುದೇ ವ್ಯಕ್ತಿಯ ಜೊತೆ ಸಂಪರ್ಕವುಂಟಾದರೆ ಅದಕ್ಕೆ ಆ ದಿನವೇ ವೈದ್ಯರ ಸಮಾಲೋಚನೆ ಪಡೆದು ಸೂಕ್ತ ಚಿಕಿತ್ಸೆ ಶುರು ಮಾಡಬೇಕು. ಇದಕ್ಕೆ Post Exposure Prophylaxis ಎಂದು ಕರೆಯಾಗುತ್ತದೆ..
• ಆರೋಗ್ಯದಲ್ಲಿ ಏನಾದರೂ ವ್ಯತ್ಯಾಸವಾದ ಗುಣಲಕ್ಷಣಗಳು ಕಂಡುಬಂದಲ್ಲಿ, ತಕ್ಷಣವೇ ಇನ್ನೊಬ್ಬರಿಗೆ ಹರಡದಂತೆ ನಾವು ಪ್ರತ್ಯೇಕವಾಗುವುದು ( Isolation ) ನಮ್ಮ ಆದ್ಯ ಕರ್ತವ್ಯವಾಗಿರುತ್ತದೆ, ನಂತರವಷ್ಟೇ ವೈದ್ಯರ ಸಮಾಲೋಚನೆ ಪಡೆಯಬೇಕು.

ಆದರೆ ಮೌನದಲ್ಲಿಯೇ ಬಂದು ಮೌನದಲ್ಲಿಯೇ ಇದ್ದು ಕೊನೆಗೊಂದು ದಿನ ರೌದ್ರಾವತಾರ ತಾಳುವ ಅಸಾಂಕ್ರಾಮಿಕ ರೋಗಗಳಲ್ಲಿ ಎರಡು ತರಹದ ರೋಗಗಳನ್ನು ಕಾಣಬಹುದು.

ಜೀವನಶೈಲಿಗೆ ಸಂಬಂಧಿಸಿದ ರೋಗಗಳು

• ಹೃದಯ – ರಕ್ತನಾಳಗಳ ಖಾಯಿಲೆ.
• ಮಧುಮೇಹ.
• ಅಧಿಕ ರಕ್ತದೊತ್ತಡ.
• ಅಪೌಷ್ಟಿಕತೆ.
• ಬೊಜ್ಜು.
• ಕಾನ್ಸರ್
• ಸ್ಟ್ರೋಕ್
• ಲಿವರ್ ಸಿರೊಸಿಸ್

ಅನುವಂಶಿಕ ಖಾಯಿಲೆಗಳು (Inherited/Genetic diseases)

• ಹೀಮೋಫೀಲಿಯಾ
• ತಲಸೀಮಿಯಾ
• ವರ್ಣ ಕುರುಡುತನ
• ಅಲ್ಜೀóಮರ್ ಖಾಯಿಲೆ
• ಪಾರ್ಕಿನ್ಸನ್ ಖಾಯಿಲೆ
• ಸಿಸ್ಟಿಕ್ ಫೈಬ್ರೊಸಿಸ್, ಮುಂತಾದವು

ಅನುವಂಶಿಕ ಖಾಯಿಲೆಗಳು ವ್ಯಕ್ತಿಗೆ ಬರದಂತೆ ತಡೆಹಿಡಿಯುವುದು ನಮ್ಮ ಹತೋಟಿಯಲ್ಲಿಲ್ಲದ ಕಾರಣ ಅವುಗಳ ಗುಣಲಕ್ಷಣಗಳು ವ್ಯಕ್ತಿಯಲ್ಲಿ ಕಾಣ ಸಿಕೊಂಡ ನಂತರವಷ್ಟೇ ಚಿಕಿತ್ಸೆ ನೀಡಬಹುದಾಗಿರುತ್ತದೆ. ಆದರೂ ಅವುಗಳ ವಿರುದ್ಧ ಕೆಲವೊಮ್ಮೆ ಸಮರ್ಥವಾಗಿ ಚಿಕಿತ್ಸೆ ನೀಡಲು ಕೆಲವೊಮ್ಮೆ ಸಾಧ್ಯವಾಗುವುದಿಲ್ಲ. ಆದರೆ ಜೀವನಶೈಲಿಗೆ ಸಂಬಂಧಿಸಿದ ಖಾಯಿಲೆಗಳನ್ನು ನಾವುಗಳು ಸ್ವಲ್ಪ ಹೆಚ್ಚಿನ ಕಾಳಜಿವಹಿಸಿದರೆ ಅವುಗಳು ಸುಳಿಯದಂತೆ ತಡೆಯಬಹುದು. ಆದರೆ ಅಸಾಂಕ್ರಾಮಿಕ ರೋಗಗಳು ಹಾಗಲ್ಲ, ನಮ್ಮ ಜೀವನ ಶೈಲಿಯಲ್ಲಿ ಸ್ವಲ್ಪ ಬದಲಾವಣೆ ತಂದುಕೊಂಡರೂ ಮುಂಬರುವ ಖಾಯಿಲೆಗಳಿಗೆ ರಾಮಬಾಣ ಮೊದಲೇ ಸಿದ್ಧವಾದಂತಾಗುತ್ತದೆ.

ಅಸಾಂಕ್ರಾಮಿಕ ರೋಗಗಳು ತಡೆಗಟ್ಟಲು ಮುನ್ನೆಚ್ಚರಿಕಾ ಕ್ರಮಗಳು

• ಜೀವನ ಶೈಲಿಯಲ್ಲಿ ಬದಲಾವಣೆ
• ಊಟದಲ್ಲಿ ಉಪ್ಪು, ಸಿಹಿ ಅಂಶಗಳಲ್ಲಿ ಹಿಡಿತವಿರಲಿ
• ಪ್ರತಿನಿತ್ಯ 2.5ಲೀ ರಿಂದ 3ಲೀ ನೀರು ಕುಡಿಯಬೇಕು
• ಊಟದಲ್ಲಿ ಕೊಲೆಸ್ಟ್ರಾಲ್ ಅಂಶದಲ್ಲಿ ಮಿತವಿರಲಿ
• ಪ್ರತಿನಿತ್ಯ ವ್ಯಾಯಾಮ ಅಥವಾ ಯೋಗ ಮಾಡುವ ರೂಢಿಯಿರಲಿ
• ಪ್ರತಿನಿತ್ಯ ಕನಿಷ್ಟ 30 ನಿಮಿಷಗಳ ಕಾಲ್ನಡಿಗೆ
• ಸಮಯಕ್ಕೆ ಸರಿಯಾಗಿ ಸಮತೋಲನ ಆಹಾರ
• ಮುಖ್ಯವಾಗಿ ಧೂಮಪಾನ ಮತ್ತು ಮದ್ಯಪಾನಗಳಿಗೆ ವಿದಾಯ ಹೇಳುವುದು
• ಮಾನಸಿಕ ಒತ್ತಡರಹಿತ ಜೀವನ