ಸಾಮಾಜಿಕ ಜವಾಬ್ದಾರಿ : ಮದುಮಕ್ಕಳ ಕೋವಿಡ್ ಗಿಫ್ಟ್..!

• ಪಂಜು ಗಂಗೊಳ್ಳಿ, ವ್ಯಂಗ್ಯಚಿತ್ರಕಾರ

ಮುಂಬೈಯ ಉಪನಗರ ವಸೈಯ 28 ವರ್ಷದ ಎರಿಕ್ ಆಂಟನ್ ಲೋಬೋ ಮತ್ತು 27 ವರ್ಷದ ಮರ್ಲಿನ್ ಕೆಲವು ದಿನಗಳ ಹಿಂದೆ ಮದುವೆಯಾದರು.

ಮದುವೆ ಅದರಲ್ಲೂ ಕ್ರಿಶ್ಚಿಯನ್ ಮದುವೆಯೆಂದರೆ ದೊಡ್ಡ ಸಂಖ್ಯೆಯ ಬಂಧು ಬಳಗ ಸ್ನೇಹಿತರು, ದುಬಾರಿ ಉಡುಗೊರೆ, ಒಳ್ಳೆಯ ಊಟ, ಗುಂಡು ಪಾರ್ಟಿ ಸಾಮಾನ್ಯ. ಆದರೆ, ಎರಿಕ್ ಮತ್ತು ಮರ್ಲಿನ್ ಇದಕ್ಕೆಲ್ಲ ಖರ್ಚು ಖರ್ಚು ಮಾಡದೆ ಆ ಹಣವನ್ನು ಕೊರೋನಾ ಸಂತೃಸ್ತರ ಉಪಯೋಗಕ್ಕೆ ಬಳಸಿ ತಮ್ಮ ಸಾಮಾಜಿಕ ಜವಾಬ್ದಾರಿಯನ್ನು ಮೆರೆದಿದ್ದಾರೆ.

ಈ ಲಾಕ್ ಡೌನ್ ಸಮಯದಲ್ಲಿ ಮದುವೆ ಸಮಾರಂಭದಲ್ಲಿ 50 ಜನರ ಭಾಗವಹಿಸುವಿಕೆಗೆ ಸರ್ಕಾರಿ ಆದೇಶದಲ್ಲಿ ಅವಕಾಶವಿದ್ದರೂ ಎರಿಕ್ ಮತ್ತು ಮರ್ಲಿನ್ ತಮ್ಮ ಮದುವೆಗೆ ಕೇವಲ 22 ಜನರನ್ನು ಆಹ್ವಾನಿಸಿದರು. ಬಂದವರೆಲ್ಲ ಕಡ್ಡಾಯವಾಗಿ ಮುಖಕ್ಕೆ ಮಾಸ್ಕ ಹಾಕಿಕೊಂಡು ಸುರಕ್ಷಿತ ದೈಹಿಕ ಅಂತರವನ್ನು ಪಾಲಿಸಿದರು.

ಮತ್ತು, ದುಬಾರಿ ಉಡುಗೊರೆ, ಭರ್ಜರಿ ಊಟ, ವೈನಿಗೆ ವ್ಯಯ ಮಾಡದ ಹಣದಿಂದ 50 ಆಮ್ಲಜನಕ ಸಿಲಿಂಡರ್ ಮತ್ತು 50 ಹಾಸ್ಪಿಟಲ್ ಬೆಡ್ ಗಳನ್ನು ಖರೀದಿಸಿ ಜೂನ್ 20 ರಂದು ಸತ್ಫಲ ಗ್ರಾಮದ ಆಸ್ಪತ್ರೆಗೆ ಕೋವಿಡ್ ಕೇಂದ್ರಕ್ಕೆ ದಾನ ಮಾಡಿದರು. ಮದುವೆ ಸಮಾರಂಭ ಮುಗಿದ ನಂತರ ತಾವೇ ಆ ಆಸ್ಪತ್ರೆಗೆ ಭೇಟಿ ಕೊಟ್ಟು ಅವುಗಳನ್ನು ಉದ್ಘಾಟಿಸಿದರು.

ಮದುವೆಯಾಗುವ ಮೊದಲೂ ಕೂಡಾ ಎರಿಕ್ ಮತ್ತು ಮರ್ಲಿನ್ ಲಾಕ್ ಡೌನ್ ಸಂತೃಸ್ತರಿಗೆ ಆಹಾರ ತಯಾರಿಸುವುದು, ವಲಸೆ ಕಾರ್ಮಿಕರಿಗೆ ವಿಶೇಷ ಶ್ರಮಿಕ್ ರೈಲುಗಳಲ್ಲಿ ಅವರ ಊರುಗಳಿಗೆ ಹಿಂತಿರುಗಲು ಟಿಕೇಟು ಪಡೆಯಲು ಸಹಕರಿಸುವುದು ಮೊದಲಾಗಿ ಹಲವು ರೀತಿಯಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದರು.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243