ದಾವಣಗೆರೆ | ಕೋವಿಡ್ ಇರುವ ಮೂವರು ಗರ್ಭಿಣಿಯರ ಹೆರಿಗೆ

ಸುದ್ದಿದಿನ, ದಾವಣಗೆರೆ : ಕೋವಿಡ್ ಇರುವ ಮೂವರು ಗರ್ಭಿಣಿಯರ ಪೈಕಿ ಎರಡು ಸಹಜ ಮತ್ತು ಒಂದು ಸಿಜೇರಿಯನ್ ಹೆರಿಗೆಯನ್ನು ಯಶಸ್ವಿಯಾಗಿ ನಡೆಸುವಲ್ಲಿ ನಮ್ಮ ವೈದ್ಯರು ಸಫಲರಾಗಿದ್ದಾರೆ. ಈವರೆಗೆ 6 ಕೊರೊನಾ ಪಾಸಿಟಿವ್ ಗರ್ಭಿಣಿಯರನ್ನು ಗುಣಪಡಿಸಲಾಗಿದೆ‌ ಎಂದು ಜಿಲ್ಲಾಧಿಕಾರಿ ಮಹಾಂತೇಶ್ ಬೀಳಗಿ ಹೇಳಿದರು.

ಈವರೆಗೆ ಜಿಲ್ಲೆಯಲ್ಲಿ 41 ಕಂಟೈನ್‍ಮೆಂಟ್ ಝೋನ್‍ಗಳಿದ್ದು ಈ ಪೈಕಿ 28 ದಿನಗಳ ಕಾಲ ಒಂದೂ ಹೊಸ ಕೋವಿಡ್ ಪ್ರಕರಣ ದಾಖಲಾಗದ 11 ಕಂಟೈನ್‍ಮೆಂಟ್ ಝೋನ್‍ಗಳನ್ನು ಡಿನೋಫೈ ಮಾಡಲಾಗಿದೆ. ಈ ಝೋನ್‍ಗಳಲ್ಲಿ ನಿರಂತರವಾಗಿ ಸಕ್ರಿಯ ಸರ್ವೆಲೆನ್ಸ್ ಕಾರ್ಯ ನಡೆಯುತ್ತಿದೆ. ಹೊಸ ಕಂಟೈನ್‍ಮೆಂಟ್ ಝೋನ್‍ಗಳಲ್ಲಿನ ಜನರ ಸ್ವಾಬ್ ಪರೀಕ್ಷೆ ನಡೆಸಲಾಗುವುದು. ಸೋಂಕಿತರ ಮೂಲ ಪತ್ತೆ ಕಾರ್ಯ ನಡೆದಿದೆ.

ಐಎಲ್‍ಐ ಮತ್ತು ಎಸ್‍ಎಆರ್‍ಐ ವ್ಯಾಪಕ ಪರೀಕ್ಷೆ ನಡೆಸಲಾಗುತ್ತಿದೆ. ಬಿಎಲ್‍ಓಗಳ ಮೂಲಕ ಸರ್ವೇ ಕಾರ್ಯ ನಡೆದಿದೆ. ತಾಲ್ಲೂಕು ಆರೋಗ್ಯಾಧಿಕಾರಿಗಳು, ಏರಿಯಾ ಮೆಡಿಕಲ್ ಆಫೀಸರ್, ಆರೋಗ್ಯ ಕಾರ್ಯಕರ್ತೆಯರ ಸರಪಳಿ ಮೂಲಕ ಸ್ವಾಬ್ ಸಂಗ್ರಹ ಆಗುತ್ತಿದ್ದು ಈ ಕಾರ್ಯಕ್ಕಾಗಿ ವಿಶೇಷ ತಂಡಗಳು ಮತ್ತು ವಾಹನಗಳನ್ನು ನೀಡಲಾಗಿದೆ.

ಜೊತೆಗೆ ದುರ್ಬಲ ವರ್ಗದ ಸರ್ವೇ ಮಾಡಲಾಗಿದ್ದು ಕೆಪಿಎಂಇ ಕಾಯ್ದೆಯಡಿ ಫಾರ್ಮಸಿಗಳಿಂದ ಕೆಮ್ಮು ಶೀತ ಜ್ವರಕ್ಕಾಗಿ ಮಾತ್ರೆ , ಔಷಧಿ ತೆಗೆದುಕೊಂಡವರ ಮಾಹಿತಿ ತೆಗೆದುಕೊಂಡು 35 ತಂಡಗಳನ್ನು ರಚಿಸಿ ಒಬ್ಬೊಬ್ಬರಿಗೆ 20 ರಿಂದ 25 ಆಸ್ಪತ್ರೆ ಮತ್ತು ಮೆಡಿಕಲ್ ಶಾಪ್ ವ್ಯಾಪ್ತಿ ನೀಡಿ ಅವರ ಸ್ವಾಬ್ ಪರೀಕ್ಷೆ ಮಾಡಿಸಲಾಗುತ್ತಿದೆ. ಕ್ಷೇತ್ರ ವಲಯದಲ್ಲಿ 10 ರಿಂದ 15 ದಿನಗಳ ಕಾಲ ಸ್ವಾಬ್ ಸಂಗ್ರಹದ ವಿಶೇಷ ಆಂದೋಲನ ಮಾಡಲಾಗುವುದು. ಈಗಾಗಲೇ ಹೊನ್ನಾಳಿ ಮತ್ತು ಚನ್ನಗಿರಿ ಕೊಳಗೇರಿಗಳಲ್ಲಿ ಸ್ವಾಬ್ ಸಂಗ್ರಹಿಸಲಾಗುತ್ತಿದೆ ಎಂದ ಅವರು ಪ್ರತಿಯೊಬ್ಬರೂ ಓಡಾಡುವಾಗ ವೈಯಕ್ತಿಕ ಎಚ್ಚರಿಕೆ ವಹಿಸಬೇಕೆಂದರು.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243