ವಿಟಮಿನ್ ಡಿ ನಲ್ಲಿದೆ ಆರೋಗ್ಯ ಭಾಗ್ಯ

1918 ರಲ್ಲಿ ಇಲಾನ್ ಮೆಲಾನ್ ಬಿ ಎಂಬ ವಿಜ್ಞಾನಿಯು ಕಾಡ್‍ಲಿವರ್ ಎಣ್ಣೆಯಲ್ಲಿರುವ ಮೇಧಸ್ಸಿನಲ್ಲಿ ಕರಗುವ ಒಂದು ವಿಟಮಿನ್‍ನಿಂದ ರಿಕೆಟ್ಸ್ ಗುಣವಾಗುತ್ತದೆ ಎಂದು ಪ್ರಯೋಗಗಳ ಮೂಲಕವೇ ತಿಳಿಯಪಡಿಸಿದನು. ನಂತರ ಸೂರ್ಯನ ಕಿರಣಗಳಲ್ಲೂ ಇದೇ ವಿಟಮಿನ್ ಇರುವುದನ್ನು ಪತ್ತೆ ಹಚ್ಚಲಾಯಿತು. 1935ರಲ್ಲಿ ಶುದ್ಧ ಸ್ಪಟಿಕ ರೂಪದ ವಿಟಮಿನ್ ಡಿ (ಕ್ಯಾಲ್ಸಿಫೆರಾಲ್) ಪ್ರಯೋಗಾಲಯಗಳಲ್ಲಿ ತಯಾರಿಸಲ್ಪಟ್ಟಿತ್ತು.

ವಿಟಮಿನ್ ಡಿ ಸಮೂಹಗಳಲ್ಲಿ 10 ಕ್ಕೂ ಹೆಚ್ಚು ಅಂಶಗಳಿದ್ದರೂ ವಿಟಮಿನ್ ಡಿ2 ಮತ್ತು ವಿಟಮಿನ್ ಡಿ3 ಮುಖ್ಯವಾದವುಗಳು. ಆಹಾರದಲ್ಲಿರುವ ವಿಟಮಿನ್ ಡಿ ಶಾಖದಿಂದ ನಾಶವಾಗುವುದಿಲ್ಲ. ಮೇಧಸ್ಸಿನಲ್ಲಿ ಕರಗುತ್ತದೆ.

ಇದು ಸಣ್ಣ ಕರುಳಿನಿಂದ ಹೀರಲ್ಪಡಬೇಕಾದರೆ ಮೇಧಸ್ಸು ಮತ್ತು ಪಿತ್ತರಸಗಳ ನೆರವನ್ನು ಬೇಡುತ್ತದೆ. ಲಿಂಪ್ ಗ್ರಂಥಿಗಳ ಮೂಲಕ ರಕ್ತವನ್ನು ಸೇರಿ ಲಿವರ್, ಚರ್ಮ, ಮೆದುಳು, ಮೂಳೆಗಳಲ್ಲಿ ಸಂಗ್ರಹಗೊಳ್ಳುವುದು. ಇದು ಮಲದ ಮೂಲಕ ಹಾಗೂ ಅತ್ಯಲ್ಪ ಪ್ರಾಮಾಣದಲ್ಲಿ ಮೂತ್ರದ ಮೂಲಕವೂ ಹೊರಹೋಗುತ್ತದೆ.

ಪ್ರಯೋಜನ

• ವಿಟಮಿನ್ ಡಿ ರಿಕೆಟ್ಸ್ ರೋಗವನ್ನು ತಡೆಗಟ್ಟಲು ಅತಿಮುಖ್ಯವಾಗಿ ಬೇಕೇಬೇಕು. ರಿಕೆಟ್ಸ್ ರೋಗ ಮೂಳೆಗಳ ಶೈಥಿಲ್ಯದಿಂದ ಉಂಟಾಗುತ್ತದೆ. ನಡೆಯುವುದೂ ಅಸಾಧ್ಯವಾಗುತ್ತದೆ. ಹಲ್ಲು, ವಸಡುಗಳಿಂದ ರಕ್ತಸ್ರಾವವಾಗುತ್ತದೆ. ಸ್ನಾಯುಗಳಲ್ಲಿ ಸೆಳೆತ ಕಂಡುಬರುತ್ತದೆ. ರಿಕೆಟ್ಸ್ ರೋಗಕ್ಕೆ ವಿಟಮಿನ್ ಡಿ ಗಿಂತಲೂ ಉತ್ತಮ ಚಿಕಿತ್ಸೆ ಇನ್ನೊಂದಿಲ್ಲ.
• ರೋಗದ ತೀವ್ರತೆಯನ್ನಾಧರಿಸಿ 25-125 ಮೈಕ್ರೋ ಗ್ರಾಂಗಳಷ್ಟು ವಿಟಮಿನ್ ಡಿ ನೀಡಲಾಗುತ್ತದೆ. ರೋಗ ಉಲ್ಬಣಿಸಿದ್ದಲ್ಲಿ ಕ್ಯಾಲಿಸಿಫೆರಲ್‍ನ್ನು ಔಷಧಿಯ ರೂಪದಲ್ಲಿ ನೀಡಲಾಗುವುದು.
• ಬಾಲ್ಯದಿಂದಲೂ ಹಲ್ಲುಗಳಿಗೆ ಗಟ್ಟಿ ಅಡಿಪಾಯ ಹಾಕಬೇಕು. ವಿಟಮಿನ್ ಡಿ ಯಿಂದಲೇ ಹಲ್ಲುಗಳ ಬೆಳವಣಿಗೆ ಚೆನ್ನಾಗಿ ಆಗುತ್ತದೆ. ಹುಳುಕು ಹಲ್ಲುಗಳ ನಿವಾರಣೋಪಾಯವೂ ವಿಟಮಿನ್ ಡಿ ಯಲ್ಲಿ ಅಡಗಿರುವುದು. ಹಾಗಾಗಿ ‘ಓಣಿಕೂಸು ಬೆಳೀತು, ಕ್ವಾಣೆ ಕೂಸು ಕೊಳೀತು’ ಎಂಬ ಗಾದೆ ಹುಟ್ಟಿ ಕೊಂಡಿದೆ.
• ಹದವಾದ ಬಿಸಿಲಿನಲ್ಲಿ ಆಡಿಕೊಂಡು ಬೆಳೆದ ಮಗು ಗಟ್ಟಿಗನಾಗಿ ಬೆಳೇಯಬಲ್ಲದೇ ಹೊರತು ಬಿಸಿಲು ಮಳೆಗಳಿಗೆ ಬಿಟ್ಟರೆ ಸವೆಯುತ್ತದೆ ಎಂಬಂತೆ ನಾಜೂಕಾಗಿ ಬೆಳೆಸಿದ ಮಗು ದುರ್ಬಲಗೊಳ್ಳುತ್ತದೆ.
• ಮೂಳೆಗಳು ವಯಸ್ಸಾಗುತ್ತಾ ಹೋದಂತೆ ದುರ್ಬಲಗೊಳ್ಳುತ್ತವೆ. ಕ್ಯಾಲ್ಷಿಯಂನ ಅಭಾವದಿಂದ ಈ ಪ್ರಕ್ರಿಯೆ ವೇಗಗೊಂಡು ಇಳಿವಯಸ್ಸಿನವರು ಪರಾಧೀನವಾಗುತ್ತಾರೆ. ಮೂಳೆಗಳ ಸಣ್ಣ ಮುರಿತವೂ ಮಾರಣಾಂತಿಕವಾಗುತ್ತದೆ.
• ವಿಟಮಿನ್ ಡಿ ಯ ನೆರವಿನಿಂದಲೇ ಕ್ಯಾಲ್ಷಿಯಂ ಕರುಳಿನಿಂದ ಹೀರಲ್ಪಡುತ್ತದೆ. ಮೂತ್ರದಿಂದ ಹೊರಹೋಗುದಂತೆ ತಡೆಯುತ್ತದೆ. ಮೂಳೆಗೆ ಅಗತ್ಯವಾದ ಖನಿಜಾಂಶಗಳ ಶೇಖರಣೆಗೆ ವಿಟಮಿನ್ ಡಿ ನೆರವಾಗುತ್ತದೆ.
• ಗರ್ಭಿಣಿ ಸ್ತ್ರೀಯರಿಗೆ ವಿಟಮಿನ್ ಡಿ ಸೂಕ್ತ ಪ್ರಮಾಣದಲ್ಲಿ ದೊರೆಯದೇ ಹೋದಲ್ಲಿ ಮಗು ಗಟ್ಟಿಮುಟ್ಟಾಗಿ ಇರುವುದಿಲ್ಲ. ಹುಟ್ಟುವಾಗಲೇ ದೈಹಿಕ ನೂನ್ಯತೆಗಳನ್ನು ಹೊತ್ತು ತರುತ್ತದೆ.

ವಿಟಮಿನ್ ಡಿ ದೊರೆಯುವ ಆಹಾರಾಂಶಗಳು (ಪ್ರತಿ 100 ಗ್ರಾಂಗಳಲ್ಲಿ)

ಸೂರ್ಯನ ಬೆಳಕು ವಿಟಮಿನ್ ಡಿ ಯ ಮುಖ್ಯಯ ಆಕರಗಳಲ್ಲೊಂದು. ಹಾಗೆಂದು ಬೇಸಿಗೆಯ ನಡು ಮಧ್ಯಾಹ್ನ ಬಿಸಿಲಿಗೆ ಮೈ ಒಡ್ಡಬಾರದು.

• ಕಾಡ್ಲಿವರ್ ಎಣ್ಣೆ – 175 ಮೈಕ್ರೋಗ್ರಾಂ
• ಶಾರ್ಕ್ ಲಿವರ್ ಎಣ್ಣೆ -50 ಮೈಕ್ರೋಗ್ರಾಂ
• ತುಪ್ಪ – 2.5 ಮೈಕ್ರೋಗ್ರಾಂ
• ಮೊಟ್ಟೆ – 1.5 ಮೈಕ್ರೋಗ್ರಾಂ
• ಸಸ್ಯಜನ್ ತುಪ್ಪ – 1.0 ಮೈಕ್ರೋಗ್ರಾಂ

ವಿಟಮಿನ್ ಡಿ ಸೇವನೆಯ ಮಿತಿ

ದಿನಕ್ಕೆ 125 ಮೈಕ್ರೋಗ್ರಾಂ ಗಿಂತ ವಿಟಮಿನ್ ಡಿ ಸೇವನೆ ಹಲವಾರು ದುಷ್ಪರಿಣಾಮಗಳಿಗೆ ದಾರಿ ಮಾಡಿ ಕೊಡುತ್ತದೆ. ಅತಿಭೇದಿ, ಬಾಯಾರಿಕೆ, ಚರ್ಮವ್ಯಾಧಿಗಳು, ಅತಿಮೂತ್ರಗಳಿಂದ ಹಿಡಿದು ಜಠರದಲ್ಲಿ ಕ್ಯಾಲ್ಷಿಯಂ ಸಂಗ್ರಹಗೊಂಡು ಗಂಭೀರ ತೊಂದರೆಗಳಾಗಬಹುದು.