ರಷ್ಯಾ ಮತ್ತು ಉಕ್ರೇನ್ ನಡುವಣ ಸಂಘರ್ಷವೇನು..?

• ರತ್ನ ಮಾಳಮ್ಮ,ಇತಿಹಾಸ ತಜ್ಞೆ

1991 ರಲ್ಲಿ ಸೋವಿಯತ್ ಒಕ್ಕೂಟವು ಕುಸಿತಗೊಂಡಾಗ ಉಕ್ರೇನ್ ರಷ್ಯಾದಿಂದ ಬೇರ್ಪಟ್ಟು ಸ್ವತಂತ್ರ ರಾಷ್ಟ್ರವಾಗಿ ಘೋಷಿಸಿಕೊಂಡಿತು.ಪಕ್ಕದಲ್ಲೇ ಇದ್ದ ಕ್ರೈಮಿಯಾ (ಭೂಮಿಯ ಮೂರು ಭಾಗವು ನೀರಿನಿಂದ ಆವ್ರತವಾಗಿದ್ದ ಪ್ರದೇಶ) ಎಂಬ ಪರ್ಯಾಯ ದ್ವೀಪವು ಉಕ್ರೈನ್ ಬಳಿ ಉಳಿದುಕೊಂಡಿತ್ತು. 2014ರಲ್ಲಿ ಕ್ರೈಮಿಯಾದ ಗಡಿ ಭಾಗಗಳಲ್ಲಿ ಅನಿರೀಕ್ಷಿತವಾಗಿ ರಷ್ಯಾದ ಸಾವಿರಾರು ಸೈನಿಕರು ಸೇನಾ ಟ್ಯಾಂಕರುಗಳೊಂದಿಗೆ ಬಂದು ಅದನ್ನು ಅಧಿಕೃತವಾಗಿ ರಷ್ಯಾಕ್ಕೆ ಸೇರ್ಪಡೆಗೊಳಿಸಿತು.ಮತ್ತು ದ್ವೀಪದ ಭೂ ಭಾಗದಲ್ಲಿ ತಮ್ಮ ಇರುವಿಕೆಯನ್ನು ಭದ್ರಗೊಳಿಸಲು ಪರಮಾಣುವಿನ ಸ್ಥಾವರಗಳನ್ನು ಸ್ಥಾಪಿಸಿತು.

ಉಕ್ರೈನಿನ ಜನಸಂಖ್ಯಾ ಮತ್ತು ಭೌಗೋಳಿಕ ಸಂಯೋಜನೆಯು ಈಗಿನ ಸಮಸ್ಯೆಗಳಿಗೆ ಮುಖ್ಯ ಕಾರಣವಾಗಿದೆ. ಪ್ರಸ್ತುತ ಉಕ್ರೇನ್ ಆಂತರಿಕವಾಗಿ ಪೂರ್ವ ಉಕ್ರೇನ್ (ಡೊನ್ಬಾಸ್ ಪ್ರದೇಶ) ಮತ್ತು ಪಶ್ಚಿಮ ಉಕ್ರೇನ್ ಎಂಬ ಪ್ರತ್ಯೇಕ ಪ್ರದೇಶಗಳಾಗಿ ವಿಂಗಡಣೆಯಾಗಿದೆ. ಪ್ರತ್ಯೇಕವಾದಿಗಳು ಪೂರ್ವ ಡೊನ್ಬಾಸಿನ ಡೊನೆಟ್ಸ್ಕ್ ಮತ್ತು ಲುಹಾನ್ಸ್ಕ್ ಪ್ರದೇಶಗಳಲ್ಲಿ ಹಂಚಿಕೆಯಾಗಿದ್ದಾರೆ.
ಪ್ರಸ್ತುತ ಸಂಘರ್ಷ ಹೆಚ್ಚುತ್ತಿರುವ ಪೂರ್ವ ಡೊನ್ಬಾಸ್ ಪ್ರದೇಶದ ಮೇಲೆ ರಷ್ಯಾ ತನ್ನ ಪ್ರಭಾವವನ್ನು ಕ್ರೋಢೀಕರಿಸಲು ಪ್ರಯತ್ನಿಸುತ್ತಿದೆ.

ಪೂರ್ವ ಪ್ರದೇಶದ ಜನರು ಬಹುತೇಕ ರಷ್ಯನ್ ಭಾಷೆಯನ್ನು ಮಾತಾನಾಡುವವರು, ರಷ್ಯಾಕ್ಕೆ ಅತ್ಯಂತ ಹತ್ತಿರದಲ್ಲಿರುವವರು ಮತ್ತು ರಷ್ಯಾದೊಂದಿಗೆ ಬಲವಾದ ಐತಿಹಾಸಿಕ ಮತ್ತು ಸಾಂಸ್ಕೃತಿಕ ಸಂಬಂಧಗಳನ್ನು ಹೊಂದಿದ್ದಾರೆ. ಹಾಗಾಗಿ ಈ ಪ್ರದೇಶದಲ್ಲಿನ ರಷ್ಯಾದ ಪರ ಗುಂಪುಗಳು ರಷ್ಯಾವನ್ನು ಸೇರಲು ಬಯಸುತ್ತಿವೆ.

ಅತೀ ಹೆಚ್ಚಾಗಿ ಉಕ್ರೇನಿಯನ್ ಭಾಷೆಯನ್ನು ಮಾತನಾಡುವ, ಯುರೋಪಿಯನ್ ತತ್ವಶಾಸ್ತ್ರದಲ್ಲಿ ನಂಬಿಕೆಯಿರುವ ಪಶ್ಚಿಮದ ಉಕ್ರೇನಿಯನ್ನರು ಸ್ವತಂತ್ರ ಉಕ್ರೇನಿಗಳಾಗಿರಲು ಬಯಸುತ್ತಿದ್ದಾರೆ.ಇವರನ್ನು ಮೂಲ ಉಕ್ರೇನಿಗಳು ಎಂದೂ ಹೇಳಬಹುದು.

ಸೋವಿಯತ್ ಬಿಕ್ಕಟ್ಟಿಗಿಂತ ಮುಂಚೆ ದೀರ್ಘಕಾಲದವರೆಗೆ ‘ಉಕ್ರೇನ್’ ರಷ್ಯಾ ಸಾಮ್ರಾಜ್ಯಕ್ಕೆ ಒಳಪಟ್ಟಿದ್ದರಿಂದ ರಷ್ಯಾ ಮತ್ತು ಉಕ್ರೇನ್ ಒಂದೇ ಎಂದು ರಷ್ಯನ್ನರು ಭಾವಿಸುತ್ತಿದ್ದಾರೆ.
ರಷ್ಯಾ ವಸಾಹತುಶಾಹಿ ಇತಿಹಾಸದ ಆಧಾರದ ಮೇಲೆ ಉಕ್ರೇನಿನ ಮೇಲೆ ಹಕ್ಕು ಸಾಧಿಸಲು ಮುಂದಾಗುತ್ತಿರುವುದು ಸರಿಯಲ್ಲವೆಂದು ಇತರ ದೇಶಗಳು ಅಭಿಪ್ರಾಯ ವ್ಯಕ್ತಪಡಿಸುತ್ತಿವೆ; ಇದು ಇಂದಿನ ಬ್ರಿಟನ್ ಭಾರತವನ್ನು ತಮ್ಮದು ಎಂದು ಹೇಳಿಕೊಳ್ಳುವಂತಿದೆ. ರಷ್ಯಾ 2014 ರಲ್ಲಿ ಕ್ರೈಮಿಯಾವನ್ನು ಹೇಗೆ ವಿವಾದಾತ್ಮಕವಾಗಿ ಸ್ವಾಧೀನಪಡಿಸಿಕೊಂಡಿದೆಯೋ ಅದೇ ರೀತಿಯಲ್ಲಿ ಉಕ್ರೇನಿನ ಪೂರ್ವ ಭಾಗವನ್ನು ವಶಪಡಿಸಿಕೊಳ್ಳಲು ಯತ್ನಿಸುತ್ತಿವೆ. ಕ್ರೈಮಿಯಾ ನೆನಪಿದೆಯೇ? ಉಕ್ರೇನಿನ ಭಾಗವಾಗಿದ್ದ ಪರ್ಯಾಯ ದ್ವೀಪ!

ರಷ್ಯಾ ಉಕ್ರೇನನ್ನು ವಿರೋಧಿಸಲು ಇನ್ನೊಂದು ಪ್ರಮುಖ ಕಾರಣ ಉಕ್ರೇನ್ ‘NATO’ (North Atlantic Treaty Organization)ವನ್ನು ಸೇರಲು ಬಯಸುತ್ತಿವೆ.
NATO 28 ಐರೋಪ್ಯ ರಾಷ್ಟ್ರಗಳು ಮತ್ತು 2 ಉತ್ತರ ಅಮೇರಿಕಾ ರಾಷ್ಟ್ರಗಳನ್ನು ಒಳಗೊಂಡ ಅಂತರಸರ್ಕಾರಿ ಮಿಲಿಟರಿ ಮೈತ್ರಿ ಒಕ್ಕೂಟವಾಗಿದೆ. ರಷ್ಯಾವೂ ಈ ಒಕ್ಕೂಟವನ್ನು ಅತ್ಯಂತ ಕಟುವಾಗಿ ವಿರೋಧಿಸುತ್ತಿವೆ. ತನ್ನಿಂದ ವಿಭಜನೆಗೊಂಡು ಪ್ರತ್ಯೇಕ ರಾಷ್ಟ್ರವಾಗಿರುವ ಉಕ್ರೇನ್ NATO ಒಕ್ಕೂಟಕ್ಕೆ ಸೇರುವುದು ರಷ್ಯಾಕ್ಕೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.ಈ ಎಲ್ಲಾ ಕಾರಣಗಳಿಂದ ರಷ್ಯಾವೂ ಉಕ್ರೇನಿನ ಮೇಲೆ ಯುದ್ಧ ಸಾರಿವೆ.

ಮಾತ್ರವಲ್ಲ ರಷ್ಯಾ ಜಗತ್ತಿನ ಇತರ ದೇಶಗಳಿಗೆ ಉಕ್ರೇನಿಗೆ ಸಹಾಯಕವಾಗಿ ನಿಲ್ಲಬಾರದು ಎಂದು ತಾಕೀತು ಮಾಡಿದೆ. ಸಹಾಯಕ್ಕಾಗಿ ಬರುವ ದೇಶಗಳ ಮೇಲೂ ತಾವು ಯುದ್ಧ ಸಾರುವುದಾಗಿ ಘೋಷಿಸಿದೆ. ಅತ್ಯಂತ ಹೆಚ್ಚು ಪರಮಾಣುವನ್ನು ಹೊಂದಿರುವ ರಷ್ಯಾವನ್ನು ಎದುರು ಹಾಕಲು ಇತರ ದೇಶಗಳು ಹಿಂದೇಟು ಹಾಕುತ್ತಿವೆ. ಒಂದು ವೇಳೆ ಇತರ ದೇಶಗಳಿಗೆ ಉಕ್ರೇನ್ ಪರವಾಗಿ ಹೋದರೆ ಜಗತ್ತು ಮೂರನೇ ಮಹಾಯುದ್ಧಕ್ಕೆ ಸಾಕ್ಷಿಯಾಗಬಹುದು ಎಂಬ ಭಯವೂ ಒಂದು ಕಾರಣವಾಗಿರಬಹುದು.

ಒಟ್ಟಾರೆ ಯುದ್ಧವು ರಕ್ತಪಾತಗಳನ್ನು ಹರಿಸುತ್ತಿವೆ,ಹಲವರನ್ನು ಅನಾಥರನ್ನಾಗಿಸುತ್ತಿವೆ. ಯುದ್ಧಗಳು ಕೊನೆಗೊಳ್ಳಲಿ ಜಗತ್ತು ಶಾಂತಿಯಿಂದಿರಲಿ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243