ಭಾವ ಭೈರಾಗಿ
ಕವಿತೆ | ಪಂದ್ಯ ಗೆಲ್ಲುತ್ತಲೇ ಇವೆ
ಜಗದ ಗೋಡೆಗಳು
ಸಾವಿರ ವರುಷಗಳಿಂದಲೂ
ನೋಡುತ್ತಿವೆ
ಹಾಳು ಹಸಿವು
ಅನ್ನ ಬಸಿಯುವವರೆಗೂ
ತಾಳುತ್ತಿಲ್ಲ
ಹಗಲು ರಾತ್ರಿಯಾಗುವತನಕ
ರಾತ್ರಿ ಹಗಲಾಗುವತನಕ
ಹಸಿವಿಗಾಗಿ
ನಡೆಯುತ್ತಲೇ ಇವೆ
ಕೃತ್ಯಗಳು
ಇತ್ತ ಕವಿ ಮಾತ್ರ
ಲೇಖನಿ ಹಿಡಿದವ
ಇನ್ನೂ ಕೈ ಬಿಟ್ಟಿಲ್ಲ
ಪೆನ್ನಿನಿಂಕಿನ ವಾಂತಿಗೆ
ಬಿಳಿಹಾಳೆಯೇ ಬಸಿರಾದ ಸಂತಸ
ಶೀತಲೀಕರಿಸಿದ ಸಾಲುಗಳ ಕಲಸಿ
ನೀರಾಗಿಸಿದ ಕವಿತೆಗಳು
ಕೊನೆಗೆ ಕವಿಯನ್ನೇ ನೋಡಿ
ಮುಗುಳ್ನಕ್ಕಿವೆ
ಹಸಿವು ನೀಗುತ್ತಿಲ್ಲ
ಅಡುಗೆ ಕೋಣೆ ಗೋಡೆಗಳೊಳಗೆ
ಅಮ್ಮ ಮಾಡುತ್ತಲೇ ಇದ್ದಾಳೆ
ಬೆವರಿನ ಮುದ್ದೆಗೆ ಪ್ರೀತಿಯ ಬಸ್ಸಾರು
ಕಷ್ಟಗಳ ಜೋಳದ ರೊಟ್ಟಿಗೆ
ಮೊಳಕೆಯೊಡೆದ
ಪಿಳಿಪಿಳಿ ಕಾಳುಗಳು
ಜಠರದಲಿ ಆಮ್ಲ ಹೆಚ್ಚಾಗುತ್ತಲೇ ಇದೆ
ಎದೆಯ ಉರಿ ಮುಂದೆ
ಘೋರ ಕಾಡ್ಗಿಚ್ಚುಗಳೂ
ಮೈಮರೆಸಿಕೊಂಡಿವೆ
ಕವಿತೆಗಳು ನೊಣ ಹೊಡೆಯುತ್ತಲೇ ಇವೆ
ಅಮ್ಮ ಮಾಡಿದ ರೊಟ್ಟಿಗಳು ಮಾತ್ರ
ಪಂದ್ಯ ಗೆಲ್ಲುತ್ತಲೇ ಇವೆ.
– ಡಾ. ಸಂತೋಷ್. ಕೆ. ಬಿ
ಸುದ್ದಿದಿನ.ಕಾಂ|ವಾಟ್ಸಾಪ್|9986715401
