• ಹ.ರಾ.ಮಹಿಶ ಬೌದ್ಧ

ನಿರಂಕುಶಾಡಳಿತ ಚುನಾಯಿತವಾದ ಮಾತ್ರಕ್ಕೆ ನಿರಂಕುಶಾಧಿಕಾರವಾಗದಿರಲಾರದು. ನಿರಂಕುಶ ಪ್ರಭುವು ನಮ್ಮವನೇ ಆದ ಮಾತ್ರಕ್ಕೆ ಅವನ ನಿರಂಕುಶಾಡಳಿತಮಾನ್ಯವಾಗಲಾರದು.ನಿರಂಕುಶಾಡಳಿತವನ್ನು ಕಿತ್ತೊಗೆಯುವ ಅಥವಾ ಕೆಳಗಿಳಿಸುವ ಸಾಧ್ಯತೆಯಿಂದ ಅದನ್ನು ಎದುರಿಸುವುದೇ ಮತ್ತು ಇನ್ನೊಂದು ಬಲವಾದ ವಿರೋಧಪಕ್ಷ ಅದರ ಸ್ಥಾನವನ್ನು ಆಕ್ರಮಿಸುವುದೇ ನಿರಂಕುಶಾಡಳಿತದ ವಿರುದ್ಧ ಇರುವ ನಿಜವಾದ ರಕ್ಷಣೆ.

ಬಂಧುಗಳೇ, ಎದೆಷ್ಟೋ ವರ್ಷಗಳ ಹಿಂದೆ ಹೇಳಿರುವ ಬಾಬಾಸಾಹೇಬರ ಈ ಮೇಲಿನ ಮಾತುಗಳು ಇಂದಿನ ದಿನಗಳಲ್ಲಿ‌ ಈ ದೇಶದ ಸ್ಥಿತಿಯನ್ನು ಕಂಡು ನಮ್ಮೆದುರು ನಿಂತು‌ ಇಂದು ಹೇಳುತ್ತಿರುವಂತಿದೆ.. ಗಮನಿಸಿ..!

ಒಂದು ಆಡಳಿತ ಪಕ್ಷವಿದ್ದು ಅದರ ಕಾರ್ಯವೈಖರಿಯನ್ನು ನಿತ್ಯವೂ ಗಮನಿಸುತ್ತಾ ಎಚ್ಚರಿಸಲು ಒಂದು ಸಮರ್ಥ ವಿರೋಧಪಕ್ಷವಿರಬೇಕಾದದ್ದು ಪ್ರಜಾಪ್ರಭುತ್ವದ ಸೌಂದರ್ಯ ಮತ್ತು ನಿಜರೀತಿ. ಆದರೆ ನಮ್ಮ ದೇಶದ ಬಹುಜನರು ರಾಜಕೀಯವಾಗಿ ಅದೆಷ್ಟು‌ ಅಜ್ಞಾನಿಗಳು ಎಂದರೆ ಸ್ವತಂತ್ರ ಭಾರತದ ಆರಂಭದ ವರ್ಷಗಳಿಂದ ನೆನ್ನೆಮೊನ್ನೆಯವರೆಗೂ “ಕಾಂಗ್ರೆಸ್ ಕಾಂಗ್ರೆಸ್” ಎಂದು ಜಪಮಾಡುತ್ತಾ ಕಾಂಗ್ರೆಸ್ ಎಂಬ ಮಾಯಾಜಾಲದಲ್ಲಿ ದೇಶವನ್ನು ಸಿಲುಕಿಸಿ ತಾವೂ ಸಿಕ್ಕಿಕೊಂಡು ನೇತಾಡಿ ಮೌನವಾಗಿ ಸತ್ತರು..! ಅದರ ವಿರುದ್ಧ ಒಂದು ಸಮರ್ಥ ಆಡಳಿತ ಪಕ್ಷವು ತಲೆಯೆತ್ತದಂಥ ಪರಿಸ್ಥಿತಿಯನ್ನು ಕಾಂಗ್ರೆಸ್ನೊಳಗಿನ ಮೆದುಮನುವಾದಿಗಳು ನಯವಾಗಿ ನೋಡಿಕೊಂಡರು..!

ಬಹುಜನರಿಗೆ ಸ್ವತಂತ್ರರಾಜಕೀಯ ಪ್ರಜ್ಞೆಯಿರದೆ ಬರಿ ಓಟ್ ಬ್ಯಾಂಕಾಗಿದ್ದ ಕಾಲದವರೆಗೂ ಇದು ಮುಂದುವರಿಯಿತು. ಬಹುಜನಚಿಂತಕ ದಾದಾಸಾಹೇಬ್ ಕಾನ್ಷಿರಾಂಜಿಯವರು ಬಹುಜನರ ಎದೆಯೊಳಗೆ ಸ್ವತಂತ್ರ ರಾಜಕೀಯ ಪ್ರಜ್ಞೆಯನ್ನು ಜಾಗೃತಗೊಳಿಸಿ ಬಹುಜನರೆಂದರೆ ಕೇವಲ‌ ಮತಹಾಕುವ ಕುರಿಗಳಲ್ಲ ಆಳುವವರ್ಗದ ಹುಲಿಗಳು ಎಂಬುದನ್ನು ಸಾಬೀತುಪಡಿಸುತ್ತಿದ್ದಂತೆಯೇ ಎಚ್ಚರಗೊಂಡ ಮೆದುಮನುವಾದಿ(ಕೇಂದ್ರ)ಕಾಂಗ್ರೆಸ್ ತನ್ನ ಗರ್ಭದಿಂದ ರಕ್ತಕಾರಿಕೊಂಡು ಹುಟ್ಟಿದ ಬಿಜೆಪಿ ಎಂಬ ಕೂಸನ್ನು ಬುದ್ಧ-ಫುಲೆ-ಅಂಬೇಡ್ಕರ್ವಾದೀ ಸಿದ್ಧಾಂತಕ್ಕೆ ವಿರುದ್ದವಾಗಿ ಒಳಗೊಳಗೆ ಬೆಳೆಸಲು ಮೌನವಾಗಿಯೇ ಪುಷ್ಟಿನೀಡಿತು..!

ಅದು ಬೆಳೆದು ದೊಡ್ಡದಾಗಿ ಅದರ ಕೊಂಬು ಕೋರೆಹಲ್ಲುಗಳು‌‌ ಬಲಿತು ಅದು ರಾಷ್ಟ್ರವನ್ನು ಅರ್ಥಾತ್ ರಾಷ್ಟ್ರದ ಬಹುಜನರನ್ನು ಬಲಿತೆಗೆದುಕೊಳ್ಳುವಷ್ಟು ದಷ್ಟಪುಷ್ಟವಾಗಿ ಬೆಳೆಯುತ್ತಿದ್ದಂತೆಯೇ ಕಾಂಗ್ರೆಸ್ ಉಸಿರೆಳೆದು ಇಚ್ಛಾಮರಣಿಯಂತೆ ಆತ್ಮಹತ್ಯೆ ಮಾಡಿಕೊಂಡಿತು..! ಇದರಿಂದಾಗಿ ಈಗ ಈ ಬಿಜೆಪಿ ಎಂಬ ಮುಕ್ತಮನುವಾದಿ ಪಕ್ಷದ ಮುಂದೆಯೂ ಒಂದು ಸಮರ್ಥ ವಿರೋಧಪಕ್ಷವಿಲ್ಲದಂಥಾ ಪರಿಸ್ಥಿತಿ ಇಂದು ನಿರ್ಮಾಣವಾಗಿದೆ..!

ಬಿಜೆಪಿಯ ದಿನದಿನದ ಸ್ವೇಚ್ಛಾಚಾರೀ ಸರ್ವಾಧಿಕಾರಿ ನಿರಂಕುಶಾಡಳಿದ ಆಟಾಟೋಪಗಳಿಗೆ ಬೆದರಿ ಅಸಹಾಯಕರಾಗಿ‌ ಹತಾಷರಾಗಿ ದೇಶದ ಪ್ರಜ್ಞಾವಂತ ಜನರು ಇಂದು ಕೈಕೈಹೊಸಕಿಕೊಳ್ಳುತ್ತಾ ಶಾಪಹಾಕುತ್ತಿದ್ದಾರೆ..! ಹಲವು ಅಂಧಭಕ್ತರು‌ ಜೈಕಾರ ಹಾಕುತ್ತಿದ್ದಾರೆ..! ಕೆಲವರು ದೇಶವೆಂಬ ಮನೆಗೆ ಬಿಜೆಪಿ ಹೊತ್ತಿಸಿರುವ ಬೆಂಕಿಯಲ್ಲಿ ಮೈಕೈ ಕಾಯಿಸಿಕೊಂಡು ಬೆಚ್ಚಗಿದ್ದರೆ ಇನ್ನೂ ಕೆಲವರು ಆ ಬೆಂಕಿಯಿಂದ ಬೀಡಿ ಹಚ್ಚಿಕೊಂಡು‌ ಧಮ್ಮು ಎಳೆದು ಭ್ರಮಾನಿಶೆಲ್ಲಿ‌ ತೇಲುತ್ತಿದ್ದಾರೆ..!

ಬಂಧುಗಳೇ, ದಿನದಿಂದ ದಿನಕ್ಕೆ ಕಾಡ್ಗಿಚ್ಚಿನಂತೆ ಹಬ್ಬುತ್ತಾ ಸುಡುತ್ತಿರುವ ಸಮಸ್ಯೆಗಳು ಎಲ್ಲರಿಗೂ‌ ಗೊತ್ತಿರುವಂಥದ್ದೇ ಮೊನ್ನೆ Article 370, ಇಂದು Article 14,15 ನಾಳೆ 15/4, 16/4, ನಾಳಿದ್ದು article 17 ಆಮೇಲೆ article 25..! ಮುಂದೆ article 330, 340…!! ಒಟ್ಟಾರೆ ಈ ದೇಶದ ಧಾರ್ಮಿಕ ಅಲ್ಪಸಂಖ್ಯಾತರು, ದಲಿತರು ಹಿಂದುಳಿದ ವರ್ಗಗಳು, ಮಹಿಳೆಯರು ಅರ್ಥಾತ್ ಅಬ್ರಾಹ್ಮಣರ ಸರ್ವತೋಮುಖ ಸರ್ವನಾಶವೇ ಮನುವಾದಿಗಳ ಹಿಡನ್ ಮತ್ತು ಓಪನ್ ಅಜೆಂಡಾ..!! ಇವೆಲ್ಲಾ ಎಲ್ಲರಿಗೂ ಗೊತ್ತಿರುವಂಥದ್ದೇ. ಇನ್ನಾದರೂ ಹುತ್ತವ ಬಡಿಯುವುದನ್ನು ನಿಲ್ಲಿಸಿ ಬಾಬಾಸಾಹೇಬರ ಮಾತುಗಳನ್ನು‌ ಸರಿಯಾಗಿ ಅರ್ಥಮಾಡಿಕೊಂಡು ಇವೆಲ್ಲಾ ಸಮಸ್ಯೆಗಳಿಗೂ ಬಾಬಾಸಾಹೇಬರು ಹೇಳಿದ ತೋರಿದ ಶಾಶ್ವತ ಪರಿಹಾರಗಳ ಕಡೆ ಚಿಂತಿಸೋಣವೇ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243