ಬಹಿರಂಗ
ಬಂಜಾರರು ಮತ್ತು ಮುಸ್ಲಿಮರ ಐತಿಹಾಸಿಕ ಸಾಂಸ್ಕೃತಿಕ ಸಂಬಂಧಗಳು
- ಸುರೇಶ್ ಎನ್ ಶಿಕಾರಿಪುರ
ಲಂಬಾಣಿ ಯುವಕರೂ ಮುಸ್ಲಿಮರ ಬಗ್ಗೆ ಸಹಾನುಭೂತಿಯಿಂದ ಇರಬೇಕು. ಲಂಬಾಣಿಗರ ಜನಾಂಗಿಕ ಇತಿಹಾಸವನ್ನು ತಲತಲಾಂತರದಿಂದ ಕಾಪಿಟ್ಟುಕೊಂಡು ಬಂದವರು ಅದೇ ಸಮುದಾಯದ ಢಾಡಿಗಳು. ‘ಢಾಡಿ’ ಬಂಜಾರರ ಒಂದು ಉಪಪಂಗಡ. ಇಸ್ಲಾಂ ಧರ್ಮ ಆಚರಿಸುವ ಬಂಜಾರಾ ವೃತ್ತಿ ಗಾಯಕರು.
ಢಾಡಿ ಬಂಜಾರಾ ಎಂದೇ ಹೆಸರಾಗಿರುವ ಇವರು ಇಸ್ಲಾಮ್ ಧರ್ಮದ ಪ್ರಭಾವಕ್ಕೊಳಗಾಗಿ ಮುಸ್ಲಿಮರಾಗಿಯೂ ಬಂಜಾರರ ನಡುವೆಯೇ ಬಾಳುತ್ತಾ ತಾಂಡಾದಿಂದ ತಾಂಡಾಕ್ಕೆ ಸಂಚರಿಸುತ್ತಾ ಸಾರಂಗಿ ಎಂಬ ಇಂಪಾದ ವಾದ್ಯ ನುಡಿಸುತ್ತಾ ಬಂಜಾರರ ಇತಿಹಾಸ ಸಂಸ್ಕೃತಿಯನ್ನು ಪರಿಚಯಿಸುತ್ತಾ ಜೀವಿಸುತ್ತಾರೆ. ತಾವು ಇಸ್ಲಾಮಿನಲ್ಲಿದ್ದರೂ ಮುಸ್ಲಿಮರ ಸಂಪರ್ಕ ಇವರಿಗಿಲ್ಲ.
ಢಾಡಿಗಳು ಢಾಡಿಗಳಲ್ಲೇ ವೈವಾಹಿಕ ಸಂಬಂಧಗಳನ್ನು ನಡೆಸುತ್ತಾ ತಲತಲಾಂತರದಿಂದ ಬಂಜಾರರ ಜೊತೆಗೇ ಇದ್ದಾರೆ. ಇನ್ನೊಂದು ಮುಖ್ಯ ಸಂಗತಿ ಬಂಜಾರರು ಹಿಂದೂಗಳಲ್ಲ. ಇತರೆ ಇತರೆ ಧರ್ಮಗಳ ಪ್ರಭಾವಕ್ಕೆ ಒಳಗಾಗಿ ಢಾಡಿ ಬಂಜಾರಾ ಸಿಖ್ ಬಂಜಾರರು ಎಂಬ ಪಂಗಡಗಳಾದವು ಬಿಟ್ಟರೆ ಅವರಲ್ಲಿ ಸಾಂಸ್ಕೃತಿಕ ಭಾಷಿಕ ಐಖ್ಯತೆ ಈಗಲೂ ದಟ್ಟವಾಗಿದ್ದು ಹಿಂದೂ ಧರ್ಮದಿಂದ ಪ್ರತ್ಯೇಕವಾದ ಸಂಸ್ಕೃತಿ ಅವರದಾಗಿದೆ.
ಬಂಜಾರರ ಇತಿಹಾಸ ಉಳಿದಿರೋದೇ ಈ ಢಾಡಿ ಮತ್ತು ಭಾಟ್ ಎಂಬೆರೆಡು ಬಂಜಾರಾ ಮುಸ್ಲಿಮ್ ವೃತ್ತಿ ಗಾಯಕರಿಂದ. ಲಕೀಶಾ ಬಂಜಾರಾ ಮಖಾನ್ ಷಾ ಲುಭಾನ ಮೊದಲಾದ ದೊಡ್ಡ ದೊಡ್ಡ ವ್ಯಾಪಾರಿಗಳು ಮೊಘಲ್ ದೊರೆಗಳ ಕಾಲದಲ್ಲಿ ಬದುಕಿದ್ದವರು. ಅವರು ಬಹುದೊಡ್ಡ ಸಂಚಾರಿ ವ್ಯಾಪಾರಿ ಸಮುದಾಯವಾಗಿದ್ದು ಅಂದಿನ ಮೊಘಲ್ ಸಾಮ್ರಾಜ್ಯದಲ್ಲಿ ಪ್ರಭುತ್ವ ಅವರ ವ್ಯಾಪಾರ ವಹಿವಾಟಿಗೆ ರತ್ನಗಂಬಳಿ ಹಾಸಿತ್ತು.
ಲಕೀಷಾ ಬಂಜಾರ ಷಹಜಹಾನ್ ಮತ್ತು ಔರಂಗಜೇಬನ ಕಾಲದ ಬಹು ದೊಡ್ಡ ವ್ಯಾಪಾರಿ. ಆತ ಕೆಂಪು ಕೋಟೆಯ ನಿರ್ಮಾಣಕ್ಕೆ ಬೇಕಾದ ಕೆಂಪು ಕಲ್ಲುಗಳನ್ನು ಒದಗಿಸಿದ್ದನೆಂದು ಹೇಳಲಾಗುತ್ತದೆ. ಗುರು ತೇಗ್ ಬಹದ್ದೂರ್ ಅವರು ಔರಂಗಜೇಬನಿಂದ ಹತ್ಯೆಯಾದಾಗ ಅವರ ಮೃತದೇಹವನ್ನು ಹೊತ್ತೊಯ್ದು ಅಂತ್ಯ ಸಂಸ್ಕಾರ ಮಾಡಿದಾತ ಇದೇ ಲಕೀಶಾ ಬಂಜಾರಾ. ಶಹಜಹಾನನ ಕಾಲದಲ್ಲಿ ಅನ್ಯೂನ್ಯವಾಗಿದ್ದ ಸಂಬಂಧ ಔರಂಗಜೇಬನ ಕಾಲದಲ್ಲಿ ಹಳಸಿ ಬಂಜಾರರು ಸಿಖ್ ಧರ್ಮದ ಬಹು ದೊಡ್ಡ ಅನುಯಾಯಿಗಳಾಗಿ ಸಿಖ್ಯ ಬಂಜಾರಾ ವರ್ಗವೇ ಸೃಷ್ಠಿಯಾಯಿತು.
ಆದರೆ ಅನೇಕ ಮುಸ್ಲಿಮ್ ದೊರೆಗಳು ನವಾಬರು ಯುದ್ಧ ಕಾಲದಲ್ಲಿ ಸರಕು ಸರಂಜಾಮು ಗೂಢಚರ್ಯೆ ಮುಂತಾದವುಗಳಿಗಾಗಿ ಲಂಬಾಡಿಗಳನ್ನೇ ನಂಬಿದ್ದರು ಆಶ್ರಯಿಸಿದ್ದರು. ಮಹಾ ಸಾಹಸಿಗಳು ಸ್ವಾಭಿಮಾನಿಗಳು ಆಗಿದ್ದ ಬಂಜಾರರು ಎಂತಹ ಗುಡ್ಡ ಬೆಟ್ಟ ಕಾಡು ಕಣಿವೆ ಇದ್ದರೂ ಸರಿ ಸಕಾಲಕ್ಕೆ ಸೇನೆಗಳಿಗೆ ಆಹಾರ ಮದ್ದು ಗುಂಡು ಮೊದಲಾದ ಪೂರಕ ಸಾಮಗ್ರಿಗಳನ್ನು ತಮ್ಮ ಹೇರೆತ್ತಿ‌ನ ಬಂಡಿಗಳ ಮೂಲಕ ಸಾಗಿಸಿ ಒದಗಿಸುತ್ತಿದ್ದರು.
ಹಿಂದೂ ರಾಜರೂ ಲಭಾಣಿಗಳ ಸಹಾಯ ಸಹಕಾರ ಹೇರಳವಾಗಿ ಪಡೆದಿದ್ದಾರೆ. ಒಂದು ವಿಶಿಷ್ಟ ಸಂಗತಿ ಎಂದರೆ ಗೋಲ್ಕೊಂಡವನ್ನು ರಾಜಧಾನಿಯನ್ನು ಮಾಡಿಕೊಂಡು ಆಳಿದ ಬರೀದ್ ಷಾಹಿ ದೊರೆ ಸುಪ್ರಸಿದ್ದ ಗಜಲ್ ಕವಿ ಕುಲಿ ಕುತುಬ್ ಷಹ ಬಂಜಾರಾ ಸುಂದರಿ ಭಾಗಾವತಿ ಎಂಬಾಕೆಯನ್ನು ಮದುವೆಯಾಗಿದ್ದ. ಆಕೆಯನ್ನು ಅಪಾರವಾಗಿ ಪ್ರೇಮಿಸುತ್ತಿದ್ದ ಆತ ತನ್ನ ಗಜಲ್ ಗಳಲ್ಲಿ ಭಾಗಾವತಿಯ ಮೇಲಿನ ತನ್ನ ಅನುರಾಗದ ಹೊಳೆ ಹರಿಸಿದ್ದಾನೆ.
ಕುಲಿ ಕುತುಬ್ ಷಹ ಭಾರತದ ಗಜಲ್ ಸಾಹಿತ್ಯಕ್ಕೆ ನೀಡಿದ ಕೊಡುಗೆ ಅನನ್ಯ. ತನ್ನ ಪ್ರೀತಿಯ ಮಡದಿ ಭಾಗಾವತಿಯ ಜೊತೆ ಹೆಚ್ಚು ಸಮಯ ಕಳೆಯುತ್ತಿದ್ದ ಕುಲಿ ಕುತುಬ್ ಷಹ ಗೋಲ್ಕೊಂಡದ ಸುಂದರವೂ ಸುಪ್ರಸಿದ್ದವೂ ಆದ ಕೋಟೆಯ ಧ್ವಾರವೊಂದಕ್ಕೆ ಬಂಜಾರಾ ಬಾಗಿಲು ಎಂದೇ ನಾಮಕರಣ ಮಾಡಿದ್ದಾನೆ. ಅದು ಈಗಲೂ ಅದೇ ಹೆಸರಿನಿಂದ ಕರೆಯಲ್ಪಡುತ್ತದೆ. ಈಗಿನ ಹೈದರಾಬಾದ್ ಗೋಲ್ಕೊಂಡದಿಂದ ಹನ್ನೊಂದು ಕಿಲೋ ಮೀಟರ್ ದೂರದಲ್ಲಿದೆ. ಹೈದರಾಬಾದಿನ ಮೊದಲ ಹೆಸರು ಭಾಗ್ಯನಗರ. ಕುತುಬ್ ಷಹನ ಹಿಡಿತದಲ್ಲಿದ್ದ ಈ ಪ್ರದೇಶಕ್ಕೆ ಆತನೇ ತನ್ನ ನಲ್ಲೆ ಭಾಗಾವತಿಯ ಹೆಸರಿಟ್ಟನೆಂದು ಐತಿಹ್ಯವಿದೆ. ಆ ಭಾಗ್ಯನಗರವೇ ಇಂದಿನ ಹೈದರಾಬಾದ್.
ಈಗ ಹೈದರಾಬಾದಿಗೆ ಹೊಂದಿಕೊಂಡಂತಿರುವ ಬಂಜಾರ ಹಿಲ್ಸ್ ನ ಕತೆ ನಿಮಗೆ ಗೊತ್ತಿರಲಿಕ್ಕಿಲ್ಲ. ಆಗ ಕಾಡು ತುಂಬಿದ ಬೆಟ್ಟಗಳ ಪ್ರದೇಶ ಬಂಜಾರರ ನೆಲೆಯಾಗಿತ್ತು. ಅಲ್ಲಿ ನಿಜಾಮರ ವಂಶದ ಕೆಲವೇ ಕೆಲವು ಪ್ರತಿಷ್ಟಿತ ಕುಟುಂಬಗಳು ವಾಸಿಸುತ್ತಿದ್ದವು. ಅದು ಬಂಜಾರರ ನೆಲೆಯಾಗಿದ್ದರಿಂದ ನಿಜಾಮರು ಅದಕ್ಕೆ ಬಂಜಾರಾ ಹಿಲ್ಸ್ ಎಂದೇ ಕರೆದಿದ್ದಾರೆ. ಅಲ್ಲಿ ಬೇಟೆ ಮೊದಲಾದ ವಿನೋದಗಳಲ್ಲಿ ನಿಜಾಮರ ವಂಶದ ಭವ್ಯ ಕಟ್ಟಡಗಳಿದ್ದವು.
1927 ರಲ್ಲಿ ನಿಜಾಮರ ಮಂತ್ರಿಯಾಗಿದ್ದ ನವಾಬ್ ಮೆಹದಿ ನವಾಜ್ ಜಂಗ್ ಎಂಬುವವರು ತಮ್ಮದೊಂದು ಸುಂದರ ಭವ್ಯವಾದ ಮಹಲನ್ನು ಕಟ್ಟಿಸಿ ಅದಕ್ಕೆ ಬಂಜಾರಾ ಭವನ ಎಂದೇ ನಾಮಕರಣ ಮಾಡಿದರು. ನಿಜಾಮರ ವಂಶೀಯರಿಂದ ಅದಕ್ಕೆ ನವಾಬರ ಹೆಸರನ್ನಿಡಬೇಕೆಂಬ ಸೂಚನೆ ಬಂದರೂ ಆ ಬೆಟ್ಟ ಪ್ರದೇಶದ ಮೂಲ ನಿವಾಸಿಗಳಾದ ಬಂಜಾರರ ನೆನಪಿಗಾಗಿ ಅವರ ಹೆಸರೇ ಇರಬೇಕೆಂದು ನಿಜಾಮರ ಸೂಚನೆಯನ್ನೂ ನವಾಬ್ ಮೆಹದಿ ಜಂಗ್ ನಿರ್ಲಕ್ಷಿಸಿ ಅವರ ನಿವಾಸಕ್ಕೆ ಬಂಜಾರಾ ಭವನ ಎಂಬ ಹೆಸರನ್ನೇ ನಿಲಿಸಿದರು.
ಚರಿತ್ರೆಯಲ್ಲಿ ಒಳಿತು ಕೆಡುಕುಗಳು ಕಾಲ ಸಂದರ್ಭದ ಒತ್ತಡಗಳಿಂದ ಸೃಷ್ಟಿಯಾದವು. ಮುಸ್ಲಿಮ್ ದೊರೆಗಳ ಜೊತೆ ಸಂಘರ್ಷ ಸಂಬಂಧ ಎರಡೂ ಇಟ್ಟುಕೊಂಡಿದ್ದ ಬಂಜಾರರನ್ನು ಮೊಘಲರಾದಿಯಾಗಿ ಯಾವುದೇ ದೊರೆಗಳು ಅಪರಾಧಿ ಬುಡಕಟ್ಟು ಎಂದು ತೀರ್ಮಾನಿಸಲಿಲ್ಲ. ಬಂಜಾರರ ಜನಾಂಗಿಕ ಆಚರಣೆ ಪದ್ಧತಿಗಳನ್ನು ಮುಸ್ಲಿಮ್ ದೊರೆಗಳು ಹತ್ತಿಕ್ಕಲಿಲ್ಲ. ಮುಸ್ಲಿಮ್ ದೊರೆಯೊಬ್ಬನಿಂದ ಹಾಗೊಂದು ಕರಾರು ಪತ್ರವನ್ನೇ ಅವರು ಪಡೆದುಕೊಂಡಿದ್ದರು.
ಅದು ಕೆಲವು ವಿಚಾರಗಳಿಂದ ತಾವು ಆ ದೊರೆಯಿಂದ ಪಡೆದ ರಿಯಾಯತಿಯಾಗಿತ್ತು. ಲಂಬಾಣಿಗಳ ಬದುಕು ಮೂರಾ ಬಟ್ಟೆಯಾದದ್ದು ಬ್ರಿಟೀಷರಿಂದ. ಬ್ರಿಟಿಷರು 1871 ರಲ್ಲಿ ಜಾರಿಗೆ ತಂದ ಕ್ರಿಮಿನಲ್ ಟ್ರೈಬ್ಸ್ ಕಾಯ್ದೆ (ಅಪರಾಧಿ ಬುಡಕಟ್ಟುಗಳ ಕಾಯ್ದೆ) ಇಂದ. ಯಾವ ಮುಸ್ಲಿಮ್ ರಾಜನೂ ಇಂತಹದ್ದೊಂದು ಘೋರ ಕಾನೂನು ಜಾರಿಗೆ ತಂದು ಬಂಜಾರರಾದಿಯಾಗಿ ಯಾವ ಬಡುಕಟ್ಟುಗಳನ್ನೂ ಕತ್ತಲಿಗೆ ತಳ್ಳಲಿಲ್ಲ. ಇದನ್ನು ಎಲ್ಲರೂ ಅರ್ಥ ಮಾಡಿಕೊಳ್ಳಬೇಕು.
ಹಿಂದುತ್ವದ ಹೆಸರಲ್ಲಿ ಒಂದು ಸಮುದಾಯದ ವಿರುದ್ಧ ಈ ಸಮುದಾಯಗಳ ಯುವಕರನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿರುವ, ಈ ತಳ ಸಮುದಾಯಗಳ ಶಿಕ್ಷಣ ಉದ್ಯೋಗ ಆರ್ಥಿಕ ಸಬಲೀಕರಣ ಸಾಮಾಜಿಕ ಸಾಂಸ್ಕೃತಿಕ ಏಳಿಗೆಗೆ ಎಳ್ಳು ನೀರು ಬಿಡುತ್ತಿರುವ, ಸ್ವಾತಂತ್ರ್ಯಾ ಪೂರ್ವದಲ್ಲಿ ಬ್ರಿಟಿಷರ ಗುಲಾಮರಾಗಿದ್ದುಕೊಂಡು ಈ ತಳ ಸಮುದಾಯಗಳನ್ನು ಇನ್ನಿಲ್ಲದಂತೆ ಸುಲಿದು ಶೋಷಿಸಿದ ಕ್ರಿಮಿನಲ್ ಗಳ ಮಾತಿಗೆ ಮರುಳಾಗದೆ; ಶತಮಾನಗಳಿಂದ ಬೆಸೆದುಕೊಂಡಿರುವ ಸಾಂಸ್ಕೃತಿಕ ಕೊಂಡಿಗಳನ್ನು ಇನ್ನಷ್ಟು ಗಟ್ಟಿಯಾದ ಬೆಸುಗೆ ಹಾಕಿ ಭದ್ರಪಡಿಸಿಕೊಂಡು ಈ ದೇಶದ ಸಂವಿಧಾನ, ಸಹಬಾಳ್ವೆ, ಸಹೋದರತ್ವದ ಬದುಕಿಗೆ ನಾಂದಿಯಾಗಬೇಕಾದ ಜವಾಬ್ದಾರಿ ನಮ್ಮದಾಗಿದೆ. ಈಗ ಹಿಂದುತ್ವದ ಬೆಂಕಿ ಹಚ್ಚುತ್ತಿರುವವರು ಯಾವತ್ತೂ ಈ ದೇಶದ ಸ್ವಾತಂತ್ರ ಸಮಗ್ರತೆ ಏಕತೆಯ ಪರವಾಗಿ ಇದ್ದವರಲ್ಲ ಎಂಬುದನ್ನು ಸದಾ ನೆನಪಿಟ್ಟುಕೊಳ್ಳಬೇಕಿದೆ.
ಸುದ್ದಿದಿನ.ಕಾಂ|ವಾಟ್ಸಾಪ್|9980346243
ಅಂತರಂಗ
ದೇವನಗರಿ ಸುದ್ದಿದಿನ – ದೀಪಾವಳಿ ವಿಶೇಷ ಸಂಚಿಕೆ 2026 : ಕತಾ ಸ್ಪರ್ಧೆ ; ಅನಂತ ಕುಣಿಗಲ್ ಅವರ ಸಂಸ ಕತೆ ಪಡೆದ ಪ್ರಥಮ ಸ್ಥಾನ ಅಮಾನ್ಯ ; ಪರಿಷ್ಕೃತ ಫಲಿತಾಂಶ ಪ್ರಕಟ
ಸುದ್ದಿದಿನ,ದಾವಣಗೆರೆ:ದೇವನಗರಿ ಸುದ್ದಿದಿನ – ದೀಪಾವಳಿ ವಿಶೇಷ ಸಂಚಿಕೆ 2026ರ ಕತಾ ಸ್ಪರ್ಧೆಯ ನಿಯಮಾವಳಿಯನ್ನು ಉಲಂಘಿಸಿರುವ ಕಾರಣ ಅನಂತ ಕುಣಿಗಲ್ ಅವರ ಸಂಸ ಕತೆ ಪಡೆದ ಪ್ರಥಮ ಸ್ಥಾನವನ್ನು ಅಮಾನ್ಯ ಮಾಡಲಾಗಿದೆ ಎಂದು ಪತ್ರಿಕೆಯ ಸಂಪಾದಕ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಕತೆ-ಕವಿತೆ ಸ್ಪರ್ಧೆಯ ನಿಯಮಾವಳಿಗಳ ಪ್ರಕಾರ ‘ “ಸ್ವತಂತ್ರ ರಚನೆಯಾಗಿರ ಬೇಕು. ಈ ಮೊದಲು ಯಾವ ಮಾಧ್ಯಮಗಳಲ್ಲಿಯೂ ಪ್ರಕಟ ಅಥವಾ ಪ್ರಸಾರ ಆಗಿರಬಾರದು” ಎನ್ನುವ ನಿಯಮಾವಳಿಗಳನ್ನು ಉಲಂಘಿಸಿರುವುದರಿಂದ ಪ್ರಥಮ ಸ್ಥಾನ ಪಡೆದ ” ಸಂಸ” ಕತೆಯನ್ನು ಅಮಾನ್ಯಗೊಳಿಸಲಾಗಿದೆ.
‘ಸಂಸ’ ಕತೆಯ ಕತೆಗಾರರಾದ ಅನಂತ ಕುಣಿಗಲ್ ಅವರು
ಸ್ವತಃ ತಮ್ಮ ಫೇಸ್ ಬುಕ್ ವಾಲ್ ನಲ್ಲಿ ‘ ಸಂಸ’ ಕತೆಯು ಈ ಹಿಂದೆ ಯಾವುದೋ ಕತಾ ಸ್ಪರ್ಧೆಯಲ್ಲಿ ಸಮಾಧಾನಕರ ಬಹುಮಾನ ಪಡೆದಿತ್ತು. ಮತ್ತೊಂದೆಡೆ ತೃತೀಯ, ಮಗದೊಂದೆಡೆ ದ್ವಿತೀಯ ಬಹುಮಾನ ಲಭಿಸಿತ್ತು, ಅಲ್ಲದೆ ‘ಟೋಟೋ’ ಅವಾರ್ಡ್ ನ ಅಂತಿಮ ಸುತ್ತಿಗೆ ಎರಡು ಬಾರಿ ಶಾರ್ಟ್ ಲಿಸ್ಟ್ ಆಗಿತ್ತು ಎಂದು ಬರೆದು ಕೊಂಡಿರುತ್ತಾರೆ. ಆದಕಾರಣ ಈ ಕ್ರಮವನ್ನು ಕೈಗೊಳ್ಳಲಾಗಿದೆ.
ಕತಾ ಸ್ಪರ್ಧೆಯ ಪರಿಷ್ಕೃತ ಫಲಿತಾಂಶ
ಕತಾ ಸ್ಪರ್ಧೆಯಲ್ಲಿ ರವಿಮುಡೋಡಿ ಅವರ ʼಅರ್ಧ ರೇಖೆಯ ಚಿತ್ರʼ ಕತೆಗೆ ಪ್ರಥಮ ಬಹುಮಾನ, ವಿಜಯ ಶ್ರೀ ಹಾಲಾಡಿ ಅವರ ʼಮಳೆಹಾಡುʼ ಕತೆಗೆ ದ್ವಿತೀಯ ಬಹುಮಾನ ಹಾಗೂ ಅಜೇಯ ಸಿಂಹ ಕೆ.ವಿ ಅವರ ‘ ಮಾರ್ಜಕದ ಶ್ರೀಮುಡಿ’ ಕತೆಗೆ ತೃತೀಯ ಬಹುಮಾನ ದೊರೆತಿದೆ ಎಂದು ಸುದ್ದಿದಿನ ಪತ್ರಿಕೆ ಸಂಪಾದಕ ಮಾಹಿತಿ ನೀಡಿದ್ದಾರೆ.
ಸುದ್ದಿದಿನ.ಕಾಂ|ವಾಟ್ಸಾಪ್|9980346243
ದಿನದ ಸುದ್ದಿ
Mysuru Dasara Elephants: ದಸರಾ ಗಜಪಡೆಯ ತೂಕ ಪರೀಕ್ಷೆ: ಶ್ರೀಕಂಠ ಭಾರೀ ಗಜ, ಏಕಲವ್ಯಕ್ಕೆ 2ನೇ ಸ್ಥಾನ; ಅಂಬಾರಿ ಆನೆ ಆಯ್ಕೆ ಇನ್ನೂ ಬಾಕಿ
ಸುದ್ದಿದಿನ,ಮೈಸೂರು: ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವಕ್ಕೆ ಸಿದ್ಧತೆಗಳು ಆರಂಭವಾಗಿದ್ದು, ಮೊದಲ ಹಂತದಲ್ಲಿ ಆಗಮಿಸಿರುವ 9 ಆನೆಗಳಿಗೆ ಸಾಂಪ್ರದಾಯಿಕ ತೂಕ ಪರೀಕ್ಷೆ ನಡೆಸಲಾಗಿದೆ. ಈ ಬಾರಿ ಮತ್ತಿಗೋಡು ಶಿಬಿರದ 57 ವರ್ಷದ ಶ್ರೀಕಂಠ 5,790 ಕೆಜಿ ತೂಕದೊಂದಿಗೆ ಗಜಪಡೆಯಲ್ಲೇ ಅತ್ಯಂತ ಭಾರವಾದ ಆನೆಯಾಗಿ ಮೊದಲ ಸ್ಥಾನ ಪಡೆದುಕೊಂಡಿದ್ದಾನೆ. ಭೀಮನಕಟ್ಟೆ ಶಿಬಿರದ 41 ವರ್ಷದ ಏಕಲವ್ಯ 5,600 ಕೆಜಿ ತೂಗಿ ಎರಡನೇ ಸ್ಥಾನದಲ್ಲಿದ್ದಾನೆ.
ನಗರದ ಧನ್ವಂತರಿ ರಸ್ತೆಯಲ್ಲಿರುವ ಎಲೆಕ್ಟ್ರಾನಿಕ್ ವೇ ಬ್ರಿಡ್ಜ್‌ನಲ್ಲಿ ಭಾನುವಾರ ಬೆಳಗ್ಗೆ ಎಲ್ಲ 9 ಆನೆಗಳ ತೂಕ ಪರೀಕ್ಷೆ ನಡೆಸಲಾಯಿತು. ಕಳೆದ ವರ್ಷ ಭೀಮ ಮತ್ತು ಅಭಿಮನ್ಯು ಕ್ರಮವಾಗಿ ಮೊದಲ ಎರಡು ಸ್ಥಾನದಲ್ಲಿದ್ದರು. ಆದರೆ ಈ ಬಾರಿ ಇವರಿಬ್ಬರನ್ನೂ ದಸರಾಗೆ ಕರೆತಂದಿಲ್ಲ. ಹೀಗಾಗಿ ಶ್ರೀಕಂಠನ ತೂಕವೇ ಈ ವರ್ಷದ ಗಜಪಡೆಯ ಗಮನ ಸೆಳೆದಿದೆ.
ಹೈಲೈಟ್ಸ್: 57 ವರ್ಷದ ಶ್ರೀಕಂಠನೇ ಗಜಪಡೆಯ ತೂಕದ ಬಾದ್‌ಷಾ |
|
http://Visit : www.suddidina.com
ಗಂಡಾನೆಗಳ ತೂಕ 5 ಸಾವಿರ ಕೆಜಿಗೂ ಅಧಿಕ
ಈ ಬಾರಿಯ ಮೊದಲ ಹಂತದ ಗಜಪಡೆಯ ವಿಶೇಷತೆಯೆಂದರೆ ಬಹುತೇಕ ಗಂಡಾನೆಗಳು 5 ಸಾವಿರ ಕೆಜಿಗೂ ಹೆಚ್ಚು ತೂಕ ಹೊಂದಿರುವುದು. ಆದರೆ ಆನೆಗಳ ತೂಕ ಹೆಚ್ಚಿಸುವುದೇ ಅರಣ್ಯ ಇಲಾಖೆಯ ಮುಖ್ಯ ಗುರಿಯಲ್ಲ. ಬದಲಿಗೆ ಅವುಗಳ ಆರೋಗ್ಯ, ದೈಹಿಕ ಸಾಮರ್ಥ್ಯ ಮತ್ತು ತಾಲೀಮಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿದೆ.
ಡಿಸಿಎಫ್ ಡಾ. ಐ.ಬಿ. ಪ್ರಭುಗೌಡ ಅವರ ಪ್ರಕಾರ, ಆನೆಗಳ ತೂಕದ ಆಧಾರದ ಮೇಲೆ ಅವುಗಳಿಗೆ ನೀಡಬೇಕಾದ ಆಹಾರದ ಪ್ರಮಾಣ ಮತ್ತು ಪೌಷ್ಟಿಕ ಆಹಾರವನ್ನು ನಿರ್ಧರಿಸಲಾಗುತ್ತದೆ. ಪ್ರತಿಯೊಂದು ಆನೆಯ ದೈಹಿಕ ಸ್ಥಿತಿಯನ್ನು ಗಮನದಲ್ಲಿಟ್ಟುಕೊಂಡು ತಾಲೀಮು ರೂಪಿಸಲಾಗುತ್ತದೆ.
9 ಆನೆಗಳ ತೂಕದ ಆಧಾರದಲ್ಲೇ ಆಹಾರ
ದಸರಾ ಗಜಪಡೆಯಲ್ಲಿರುವ ಆನೆಗಳ ಆರೋಗ್ಯ ಕಾಪಾಡುವುದು ಪ್ರಮುಖ ಆದ್ಯತೆಯಾಗಿದೆ. ತೂಕ ಪರೀಕ್ಷೆಯ ಮೂಲಕ ಆನೆಗಳ ದೈಹಿಕ ಸ್ಥಿತಿಯ ಬಗ್ಗೆ ಅಗತ್ಯ ಮಾಹಿತಿ ಪಡೆಯಲಾಗುತ್ತದೆ. ಅದರ ಆಧಾರದ ಮೇಲೆ ಪೌಷ್ಟಿಕ ಆಹಾರ, ದಿನನಿತ್ಯದ ಚಟುವಟಿಕೆ ಹಾಗೂ ತಾಲೀಮಿನಲ್ಲಿ ಅಗತ್ಯ ಬದಲಾವಣೆ ಮಾಡಲಾಗುತ್ತದೆ.
ಅರಣ್ಯ ಇಲಾಖೆ ಅಧಿಕಾರಿಗಳ ಪ್ರಕಾರ, ಈಗಿರುವ ಎಲ್ಲ ಆನೆಗಳೂ ಅಂಬಾರಿ ಹೊರುವ ಸಾಮರ್ಥ್ಯ ಹೊಂದಿವೆ. ಅನುಭವಿ ಆನೆಗಳಾಗಿರುವುದರಿಂದ ಅಂತಿಮ ತಾಲೀಮು ಅತ್ಯಂತ ಮಹತ್ವ ಪಡೆಯಲಿದೆ.
ಅಂಬಾರಿ ಆನೆ ಯಾರು? ಕುತೂಹಲ
ಈ ಬಾರಿಯ ದಸರಾ ಜಂಬೂಸವಾರಿಯಲ್ಲಿ ಚಿನ್ನದ ಅಂಬಾರಿ ಹೊರುವ ಆನೆ ಯಾರು ಎಂಬ ಕುತೂಹಲ ಈಗಾಗಲೇ ಹೆಚ್ಚಾಗಿದೆ. ಕೇವಲ ತೂಕದ ಆಧಾರದ ಮೇಲೆ ಅಂಬಾರಿ ಆನೆಯನ್ನು ಆಯ್ಕೆ ಮಾಡುವುದಿಲ್ಲ. ಆನೆಯ ಆರೋಗ್ಯ, ಸಾಮರ್ಥ್ಯ, ಅನುಭವ, ತಾಲೀಮು ಮತ್ತು ಅಂತಿಮ ಹಂತದ ಪ್ರದರ್ಶನವನ್ನು ಪರಿಗಣಿಸಿ ಆಯ್ಕೆ ಮಾಡಲಾಗುತ್ತದೆ.
ಮೊದಲ ಹಂತದ ತಾಲೀಮು ಮುಗಿದ ಬಳಿಕ ನಡೆಯುವ ಅಂತಿಮ ತಾಲೀಮಿನ ನಂತರವೇ ಚಿನ್ನದ ಅಂಬಾರಿ ಹೊರುವ ಆನೆಯನ್ನು ಅಂತಿಮಗೊಳಿಸಲಾಗುತ್ತದೆ. ಹೀಗಾಗಿ ಶ್ರೀಕಂಠ ತೂಕದಲ್ಲಿ ನಂಬರ್ 1 ಆಗಿದ್ದರೂ, ಅಂಬಾರಿ ವಿಚಾರದಲ್ಲಿ ಅಂತಿಮ ನಿರ್ಧಾರ ಇನ್ನೂ ಬಾಕಿಯಿದೆ.
ಆನೆಗಳ ಬಳಿ ಸಾರ್ವಜನಿಕರಿಗೆ ನಿರ್ಬಂಧ
ದಸರಾ ಆನೆಗಳ ವೀಕ್ಷಣೆಗೆ ಯಾವುದೇ ಟಿಕೆಟ್‌ ವ್ಯವಸ್ಥೆ ಮಾಡಿಲ್ಲ ಎಂದು ಡಿಸಿಎಫ್ ಸ್ಪಷ್ಟಪಡಿಸಿದ್ದಾರೆ. ಸಾರ್ವಜನಿಕರು ಆನೆಗಳ ಬಳಿ ತೆರಳದಂತೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗಿದೆ. ದಸರಾ ಆನೆಗಳ ಕುರಿತು ಸುಳ್ಳು ಮಾಹಿತಿ ಹರಡಿದರೆ ಕ್ರಮ ಕೈಗೊಳ್ಳುವುದಾಗಿಯೂ ಅರಣ್ಯ ಇಲಾಖೆ ಎಚ್ಚರಿಕೆ ನೀಡಿದೆ.
“ಆನೆಗಳಿಗೆ ಹಂತ ಹಂತವಾಗಿ ತಾಲೀಮು ಮಾಡಲಾಗುತ್ತದೆ. ಸದ್ಯಕ್ಕೆ ಎಲ್ಲ ಆನೆಗಳ ಆರೋಗ್ಯ ಚೆನ್ನಾಗಿದೆ. ಅಂತಿಮ ಹಂತದ ತಾಲೀಮಿನ ಬಳಿಕ ಅಂಬಾರಿ ಹೊರುವ ಆನೆ ಆಯ್ಕೆ ಮಾಡಲಾಗುವುದು.”
– ಡಾ.ಐ.ಬಿ.ಪ್ರಭುಗೌಡ, ಡಿಸಿಎಫ್
ದಸರಾ ಗಜಪಡೆಯ ತೂಕದ ವಿವರ
- ಶ್ರೀಕಂಠ: 5,790 ಕೆಜಿ
- ಏಕಲವ್ಯ: 5,600 ಕೆಜಿ
- ಧನಂಜಯ: 5,530 ಕೆಜಿ
- ಮಹೇಂದ್ರ: 5,490 ಕೆಜಿ
- ಪ್ರಶಾಂತ: 5,205 ಕೆಜಿ
- ಗೋಪಿ: 5,170 ಕೆಜಿ
- ಶ್ರೀರಾಮ: 4,820 ಕೆಜಿ
- ಲಕ್ಷ್ಮೀ: 3,990 ಕೆಜಿ
- ಕಾವೇರಿ: 3,075 ಕೆಜಿ
ಕೂಡ್ಲುಗೇಟ್‌ನ ಎಸ್‌ಎನ್‌ಎನ್‌ ರಾಜ್‌ ಎಟರ್ನಿಯಾ ಸಂಕೀರ್ಣದ 49 ಫ್ಲ್ಯಾಟ್‌ಗಳ ತೆರವು; ₹200 ಕೋಟಿ ವೆಚ್ಚದ ಕಟ್ಟಡಕ್ಕೆ ಹೊಸ ರೂಪ
ಸುದ್ದಿದಿನ,ಬೆಂಗಳೂರು: ನಗರದ ಪ್ರಮುಖ ವಸತಿ ಯೋಜನೆಗಳಲ್ಲಿ ಒಂದಾಗಿರುವ ಕೂಡ್ಲುಗೇಟ್‌ನ ಎಸ್‌ಎನ್‌ಎನ್‌ ಎಸ್ಟೇಟ್‌ ಒಡೆತನದ 18 ಅಂತಸ್ತಿನ ಕಟ್ಟಡದ ತೆರವು ಕಾರ್ಯಾಚರಣೆ ಶುಕ್ರವಾರದಿಂದ ಆರಂಭವಾಗಿದೆ. ಬೆಂಗಳೂರಿನ ಗಮನ ಸೆಳೆದಿದ್ದ ಈ ಪ್ರಕರಣದಲ್ಲಿ ಎಸ್‌ಎನ್‌ಎನ್‌ ರಾಜ್‌ ಕಾರ್ಪ್‌ ಸಂಸ್ಥೆಯು ಎಚ್‌ಎಸ್‌ಆರ್‌ ಲೇಔಟ್‌ನಲ್ಲಿರುವ ತನ್ನ ಎಸ್‌ಎನ್‌ಎನ್‌ ರಾಜ್‌ ಎಟರ್ನಿಯಾ ಪ್ರೀಮಿಯಂ ವಸತಿ ಸಂಕೀರ್ಣದ 49 ಅಪಾರ್ಟ್‌ಮೆಂಟ್‌ ಘಟಕಗಳನ್ನು ನಿಯಂತ್ರಿತ ರೀತಿಯಲ್ಲಿ ಕೆಡವುವ ಪ್ರಕ್ರಿಯೆಗೆ ಚಾಲನೆ ನೀಡಿದೆ.
ಒಟ್ಟು 972 ಮನೆಗಳನ್ನು ಹೊಂದಿರುವ ಈ ವಸತಿ ಯೋಜನೆಯಲ್ಲಿನ 49 ಘಟಕಗಳ ತೆರವು ಈಗ ಭಾರಿ ಕುತೂಹಲ ಮೂಡಿಸಿದೆ. ಕಟ್ಟಡದ ಸುರಕ್ಷತೆ ಕುರಿತು ತಾಂತ್ರಿಕ ಪರಿಶೀಲನೆ ನಡೆಸಿದ ಬಳಿಕ ಈ ಕ್ರಮಕ್ಕೆ ಮುಂದಾಗಲಾಗಿದೆ.
₹200 ಕೋಟಿ ವೆಚ್ಚದ ಕಟ್ಟಡದಲ್ಲಿ ದೋಷ ಪತ್ತೆ
ಸುಮಾರು ₹200 ಕೋಟಿ ವೆಚ್ಚದಲ್ಲಿ ನಿರ್ಮಿಸಲಾದ ಕಟ್ಟಡ ಇದಾಗಿದೆ. ತಾಂತ್ರಿಕ ಪರಿಶೀಲನೆ ವೇಳೆ ಕಟ್ಟಡದ ರಚನೆಯಲ್ಲಿ ಹಾನಿಯಾಗಿರುವುದು ಹಾಗೂ ಕಟ್ಟಡ ವಾಲಿರುವುದು ಬೆಳಕಿಗೆ ಬಂದಿತ್ತು. ಈ ಹಿನ್ನೆಲೆಯಲ್ಲಿ ನಿವಾಸಿಗಳ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಕಟ್ಟಡದ ನಿರ್ದಿಷ್ಟ ಭಾಗಗಳನ್ನು ತೆರವುಗೊಳಿಸುವ ನಿರ್ಧಾರ ಕೈಗೊಳ್ಳಲಾಗಿದೆ.
ತೆರವು ಕಾರ್ಯಾಚರಣೆಯನ್ನು ಯಾವುದೇ ರೀತಿಯ ಆತಂಕ ಅಥವಾ ಅಪಾಯ ಉಂಟಾಗದಂತೆ ಅತ್ಯಂತ ನಿಯಂತ್ರಿತ ರೀತಿಯಲ್ಲಿ ನಡೆಸಲಾಗುತ್ತಿದೆ. ಕಟ್ಟಡ ತೆರವು ಸಂದರ್ಭದಲ್ಲಿ ಸುತ್ತಮುತ್ತಲಿನ ಪ್ರದೇಶಕ್ಕೂ ಸಮಸ್ಯೆಯಾಗದಂತೆ ಅಗತ್ಯ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ.
ಮುಂಬೈ ಮೂಲದ ಖಾಸಗಿ ಕಂಪನಿಗೆ ಗುತ್ತಿಗೆ
ತೆರವು ಕಾರ್ಯವನ್ನು ಮುಂಬೈ ಮೂಲದ ಖಾಸಗಿ ಕಂಪನಿಗೆ ಗುತ್ತಿಗೆ ನೀಡಲಾಗಿದೆ ಎಂದು ಎಸ್‌ಎನ್‌ಎನ್‌ ಅಪಾರ್ಟ್‌ಮೆಂಟ್‌ ನಿರ್ದೇಶಕ ಅನೂಜ್‌ ತಿಳಿಸಿದ್ದಾರೆ. ಫ್ಲ್ಯಾಟ್‌ಗಳನ್ನು ಹಂತ ಹಂತವಾಗಿ ತೆರವುಗೊಳಿಸುವ ಮೂಲಕ ಕಾರ್ಯಾಚರಣೆ ನಡೆಸಲಾಗುತ್ತಿದೆ.
ಈ ಕುರಿತು ಮಾತನಾಡಿರುವ ಅವರು, ಬಿಬಿಎಂಪಿಗೂ ಸಂಸ್ಥೆಯ ವತಿಯಿಂದ ಪತ್ರ ಬರೆಯಲಾಗಿದೆ ಎಂದು ತಿಳಿಸಿದ್ದಾರೆ. ಯಾವುದೇ ರೀತಿಯ ಸಮಸ್ಯೆ ಉಂಟಾಗದಂತೆ ತೆರವು ಕಾರ್ಯ ನಡೆಸಲಾಗುವುದು ಎಂಬ ಭರವಸೆಯನ್ನೂ ನೀಡಿದ್ದಾರೆ.
ಅದೇ ಜಾಗದಲ್ಲಿ ಹೊಸ ಅಪಾರ್ಟ್‌ಮೆಂಟ್‌ ನಿರ್ಮಾಣ
ಪ್ರಸ್ತುತ ಕಟ್ಟಡದ ತೆರವು ಕಾರ್ಯ ಪೂರ್ಣಗೊಂಡ ಬಳಿಕ ಅದೇ ಜಾಗದಲ್ಲಿ ಹೊಸ ಅಪಾರ್ಟ್‌ಮೆಂಟ್‌ ನಿರ್ಮಿಸುವ ಯೋಜನೆ ಇದೆ ಎಂದು ಸಂಸ್ಥೆ ತಿಳಿಸಿದೆ. ಈಗಾಗಲೇ ಕೆಲವು ಫ್ಲ್ಯಾಟ್‌ಗಳು ಮುಂಗಡವಾಗಿ ಬುಕ್ ಆಗಿದ್ದ ಹಿನ್ನೆಲೆಯಲ್ಲಿ ಖರೀದಿದಾರರೊಂದಿಗೆ ಮಾತುಕತೆ ನಡೆಸಿ ಸಮಸ್ಯೆ ಪರಿಹರಿಸುವುದಾಗಿ ಸಂಸ್ಥೆ ಹೇಳಿದೆ.
ಯಾರಿಗೂ ತೊಂದರೆಯಾಗದಂತೆ ಸಂಪೂರ್ಣ ಪ್ರಕ್ರಿಯೆ ನಡೆಸುವುದಾಗಿ ಸ್ಪಷ್ಟಪಡಿಸಿರುವ ಸಂಸ್ಥೆ, ನಿವಾಸಿಗಳು ಹಾಗೂ ಖರೀದಿದಾರರ ಹಿತಾಸಕ್ತಿಯನ್ನು ಗಮನದಲ್ಲಿಟ್ಟುಕೊಂಡು ಮುಂದಿನ ಕ್ರಮ ಕೈಗೊಳ್ಳಲಿದೆ.