Connect with us

ದಿನದ ಸುದ್ದಿ

ಬ್ಯಾಂಕುಗಳಲ್ಲಿ ಕನ್ನಡ..!

Published

on

ಲೇಖಕರು : ಎನ್.ಟಿ.ಎರ್ರಿಸ್ವಾಮಿ
  • ಎನ್.ಟಿ.ಎರ‍್ರಿಸ್ವಾಮಿ, ವಿಶ್ರಾಂತ ವಿಭಾಗೀಯ ಪ್ರಬಂಧಕರು,ಕೆನರಾ ಬ್ಯಾಂಕ್,ದಾವಣಗೆರೆ

ನುಷ್ಯ ಮನುಷ್ಯರ ನಡುವೆ ಉತ್ತಮ ಬಾಂಧವ್ಯ ಏರ್ಪಡಲು, ಒಬ್ಬರು ಮತ್ತೊಬ್ಬರನ್ನು ಸರಿಯಾಗಿ ಅರ್ಥೈಸಿಕೊಳ್ಳಲು ಅವರಾಡುವ ಭಾಷೆ ಮಹತ್ತರ ಪಾತ್ರವಹಿಸಬಲ್ಲದು. ಅದು ಸರಳವಾಗಿ, ಸಹಜವಾಗಿ ಇಬ್ಬರಿಗೂ ಅರ್ಥವಾಗುವಂತಿರಬೇಕು. ಅದು ಸಮೂಹದ ಭಾಷೆಯಾದಾಗ, ಸಮಾಜ ಮತ್ತು ಸಂಸ್ಕೃತಿಯನ್ನು ಕಟ್ಟುವಲ್ಲಿಯೂ ಅದು ಪ್ರಭಾವ ಉಂಟು ಮಾಡಬಲ್ಲದು.

ಮಾನವ ವಿಕಾಸದ ಹಾದಿಯಲ್ಲಿ ಭಾಷೆ ಉಂಟು ಮಾಡುವ ಸಂಚಲನವನ್ನು ನಾವು ಯುಗ ಯುಗಗಳಿಂದಲೂ ಗಮನಿಸುತ್ತಾ ಬಂದಿದ್ದೇವೆ. ಹಾಗೆ ನೋಡಿದರೆ ಪ್ರಪಂಚದ ಅತ್ಯಂತ ಪ್ರಾಚೀನ ಭಾಷೆಗಳಲ್ಲಿಯೇ ಪ್ರಮುಖವಾದ ಭಾಷೆ ಕನ್ನಡ. ಇಲ್ಲಿನ ನೆಲ-ಜಲ, ಗುಡ್ಡ-ಬೆಟ್ಟ, ಕಾಡು-ಮೇಡು, ಜನ-ಜಾನುವಾರುಗಳ ಮೇಲೆ ಸಾವಿರಾರು ವರ್ಷಗಳಿಂದ ಕನ್ನಡ ಭಾಷೆ ಮಾಡುತ್ತಾ ಬಂದಿರುವ ಮೋಡಿ ಅಮೋಘವಾದುದು.

ಕನ್ನಡಕ್ಕೆ ಯಾವ ರೀತಿಯ ಪ್ರಾಚೀನತೆಯಿದೆಯೋ, ಅದೇ ರೀತಿಯ ಪ್ರಾಚೀನತೆಯೂ ಕರ್ನಾಟಕದ ಬ್ಯಾಂಕಿAಗ್ ಕ್ಷೇತ್ರಕ್ಕೂ ಇದೆ ಎಂಬುದು ಒಂದು ವಿಶೇಷ ಹಾಗೂ ಹೆಗ್ಗಳಿಕೆಯ ಸಂಗತಿ. ದೇಶದಲ್ಲಿಯೇ ಪ್ರಥಮವಾಗಿ ಸಹಕಾರಿ ಬ್ಯಾಂಕುಗಳು. ಖಾಸಗಿ ಬ್ಯಾಂಕುಗಳು, ರಾಷ್ಟ್ರೀಕೃತವಾದ ಬ್ಯಾಂಕುಗಳು, ರಾಷ್ಟ್ರೀಕರಣವಾಗಬಹುದಾದ ಬ್ಯಾಂಕುಗಳು, ಗ್ರಾಮೀಣ ಬ್ಯಾಂಕುಗಳು ಉದಯವಾಗಿದ್ದು ಪ್ರಥಮವಾಗಿ ಕನ್ನಡದ ನೆಲದಲ್ಲಿಯೇ ಎಂಬುದನ್ನು ನಾವು ಮರೆಯಲಾಗದು.

ಹಿಂದೆ ಕನ್ನಡ ಭಾಷೆಯನ್ನು ಬ್ಯಾಂಕುಗಳಲ್ಲಿ ಬಳಸುವ ಬಗ್ಗೆ ಯಾವುದೇ ತಂಟೆ-ತಕರಾರು ಹಾಗೂ ತೊಂದರೆಗಳು ಇರಲಿಲ್ಲ. ಕನ್ನಡ ನೆಲದಲ್ಲಿಯೇ ಹುಟ್ಟಿ ಬೆಳೆದ ಕೆನರಾ ಬ್ಯಾಂಕ್, ಸಿಂಡಿಕೇಟ್ ಬ್ಯಾಂಕ್, ಸ್ಟೇಟ್ ಬ್ಯಾಂಕ್ ಆಫ್ ಮೈಸೂರು, ವಿಜಯ ಬ್ಯಾಂಕು, ಕಾರ್ಪೋರೇಷನ್ ಬ್ಯಾಂಕು, ಯಥೇಚ್ಛವಾಗಿ ಕನ್ನಡವನ್ನು ಬಳಸುತ್ತಿದ್ದವು ಎಂಬುದಕ್ಕೆ ಅನೇಕ ಉದಾಹರಣೆಗಳಿವೆ.

ಅದೂ ಅಲ್ಲದೆ ಭಾರತೀಯ ಸ್ಟೇಟ್ ಬ್ಯಾಂಕ್, ಐ.ಸಿ.ಐ.ಸಿ.ಐ. ನಂತಹ ಬ್ಯಾಂಕುಗಳು ಕೂಡ ಪ್ರಾರಂಭಿಕ ಹಂತದಲ್ಲಿ ಕನ್ನಡದಲ್ಲಿಯೇ ಹೆಚ್ಚು ವ್ಯವಹರಿಸುವ ಪರಿಪಾಟವನ್ನು ಹೊಂದಿದ್ದವು ಎಂದರೆ ನಮಗೆ ಆಶ್ಚರ್ಯವಾಗದಿರದು. ಆದರೆ ಖಾಸಗೀಕರಣ, ಆಧುನೀಕರಣ, ಯಂತ್ರೀಕರಣ, ಜಾಗತೀಕರಣದ ಪ್ರಭಾವಕ್ಕೆ ಸಿಲುಕಿದ ಬ್ಯಾಂಕುಗಳು ಹಂತ ಹಂತವಾಗಿ ಸ್ಥಳೀಯ ಭಾಷೆಯಿಂದ ವಿಮುಖವಾಗುವ ಸನ್ನವೇಶ ಎದುರಾಯಿತು.

ಇಂದು ಗಣಕೀಕರಣದ ಉಚ್ಛ್ರಾಯ ಸ್ಥಿತಿಯಲ್ಲಿರುವ ಬ್ಯಾಂಕುಗಳು ಮನುಷ್ಯ-ಮನುಷ್ಯರ ನಡುವೆ ಮಾತನಾಡುವ ಬದಲು ಯಂತ್ರ-ಯಂತ್ರಗಳ ನಡುವೆ ಮಾತನಾಡುವ ಹಂತಕ್ಕೆ ಬಂದು ತಲುಪಿವೆ. ಆ ಯಂತ್ರಗಳ ಭಾಷೆ ಕನ್ನಡವಾಗಿಲ್ಲ, ಬ್ಯಾಂಕಿನವರ ಭಾಷೆಯೂ ಕನ್ನಡವಾಗುತ್ತಿಲ್ಲ, ಬೇರಾವುದೋ ಭಾಷೆ ಅಂದರೆ ಹಿಂದಿ ಮತ್ತು ಇಂಗ್ಲೀಷ್ ಅಲ್ಲಿ ರಾರಾಜಿಸುವಂತಾಗಿದೆ ಎಂಬುದು ಒಂದು ವಿಪರ್ಯಾಸ.

ನಮಗೆಲ್ಲ ತಿಳಿದಿರುವಂತೆ ಬ್ಯಾಂಕುಗಳಲ್ಲಿನ ದೈನಂದಿನ ವ್ಯವಹಾರ ಗ್ರಾಹಕನಿಗೆ ಅರ್ಥವಾಗುವ ಸ್ಥಳೀಯ ಭಾಷೆಯಲ್ಲಿ ನಡೆದಾಗ ಮಾತ್ರ ಅದರಲ್ಲೂ ಗ್ರಾಮೀಣ ಭಾಗದ ಜನರಿಗೆ ಅವರದೇ ಭಾಷೆಯಲ್ಲಿ ವ್ಯವಹರಿಸಿದಾಗ ಮಾತ್ರ ಹೆಚ್ಚಿನ ಪ್ರಯೋಜನ ಆಗಬಲ್ಲದು. ಕರ್ನಾಟಕದಲ್ಲಿ ಕನ್ನಡವೇ ಸಾರ್ವಭೌಮ ಭಾಷೆ. ಸರ್ಕಾರದ ಆಡಳಿತ ಭಾಷೆಯೂ ಕನ್ನಡವೇ ಹೌದು. ನೆಲದ ಭಾಷೆಯಲ್ಲಿಯೇ ವ್ಯವಹರಿಸುವುದು ಎಲ್ಲರ ವ್ಯವಹಾರಿಕ ಧರ್ಮವಾಗಬೇಕು. ಇದರಿಂದ ಬ್ಯಾಂಕುಗಳೂ ಹೊರತೇನಲ್ಲ. ಅಲ್ಲದೆ ಕನ್ನಡದ ಭಾಷೆಗೆ ಸಂವಿಧನಾತ್ಮಕ ಚೌಕಟ್ಟಿದೆ. ಎಲ್ಲ 28 ಭಾಷೆಗಳೂ ರಾಷ್ಟç ಭಾಷೆಗಳೇ ಸ್ಥಳೀಯ ಭಾಷೆ ಬಳಕೆಗೆ ಜನರಿಗೆ ಸಂಪೂರ್ಣ ಹಕ್ಕಿದೆ ಎಂಬುದನ್ನು ಸಂವಿಧಾನ ಪ್ರತಿಪಾದಿಸುತ್ತದೆ.

ಈ ನಿಟ್ಟಿನಲ್ಲಿ ದಿಟ್ಟ ಕ್ರಮಗಳನ್ನು ಪ್ರಜೆಗಳು, ಪ್ರಭುಗಳು ಪಾಲಿಸುವ ಅನಿವಾರ್ಯತೆ ಈಗ ಹೆಚ್ಚಾಗಿದೆ. ಆದರೆ ಅದಾಗುತ್ತಿಲ್ಲ. ಬದಲಾಗಿ ಹಿಂದಿ, ಇಂಗ್ಲೀಷುಗಳನ್ನು ಜನರ ಮೇಲೆ ಹೇರಲಾಗುತ್ತಿದೆ ಎಂಬ ಭಾವನೆ ಈಗ ಎಲ್ಲೆಲ್ಲೂ ಒಡಮೂಡಿದೆ. ಬ್ಯಾಂಕುಗಳು ತ್ರಿಭಾಷ ಸೂತ್ರವನ್ನು ಕಡ್ಡಾಯವಾಗಿ ಪಾಲಿಸಬೇಕು ಎಂದು ರಿಜರ್ವ್ ಬ್ಯಾಂಕಿನ ಆದೇಶವಿದ್ದರೂ ಕನ್ನಡದ ಭಾಷೆ ಮೂರನೆಯ ಹಂತಕ್ಕೆ ತಳ್ಳಲ್ಪಡುತ್ತಿದೆ ಎಂದು ಯಾರಿಗಾದರೂ ಅರ್ಥ ಆಗುತ್ತಿದೆ. ಬ್ಯಾಂಕಿನ ಸಿಬ್ಬಂದಿಯದೂ ಕೂಡ ದೊಡ್ಡ ಸಮಸ್ಯೆಯೇ.

ಇತ್ತೀಚಿನ ದಿನಗಳಲ್ಲಿ ಕನ್ನಡಿಗರನ್ನು ಬ್ಯಾಂಕುಗಳಲ್ಲಿ ದುರ್ಬಿನು ಹಾಕಿ ಹುಡುಕುವ ಅಪಾಯ ಎದುರಾಗಿದೆ. ನೂರು ಜನ ಹೊಸದಾಗಿ ನೌಕರಿಗೆ ಸೇರಿದರೆ ಅದರಲ್ಲಿ ಬೆರೆಳೆಣಿಕೆಯಷ್ಟು ಜನ ಮಾತ್ರ ಕನ್ನಡ ಬಲ್ಲವರು. ಉಳಿದ ಬಹುಪಾಲು ಬ್ಯಾಂಕು ನೌಕರಿ ಅನ್ಯ ಭಾಷಿಕರ ಪಾಲಾಗುತ್ತಿವೆ. ಅವರಿಗೆ ಇಲ್ಲಿನ ಸಂಸ್ಕೃತಿ, ನಡೆ-ನುಡಿ, ನೆಲದ, ಇಲ್ಲಿನ ಜನರ ಸಂಪ್ರೀತಿ ಯಾವುದೂ ಬೇಡವಾಗಿದೆ ಎಂಬ ಪರಿಸ್ಥಿತಿ. ಕನ್ನಡದ ಜನರು ಎಚ್ಚೆತ್ತುಕೊಳ್ಳದ ಹೊರತು ಇಂತಹ ಅಪಾಯಗಳಿಗೆ ನಮಗೆ ಉತ್ತರ ಸಿಗದು.

ಕನ್ನಡವನ್ನು ಬ್ಯಾಂಕುಗಳಲ್ಲಿ ಬಳಸದೇ ಇರಲು ಯಾವ ಸಂವಿಧಾನಾತ್ಮಕ ಬಿಕ್ಕಟ್ಟುಗಳೂ ಇಲ್ಲ. ಆದರೆ ಬ್ಯಾಂಕುಗಳಿಗೆ ಹಾಗೂ ಜನರಿಗೆ ಕನ್ನಡ ಬಳಕೆಯ ಬಗ್ಗೆ ಬದ್ಧತೆಯ ಕೊರತೆ ಇದೆ ಎಂದು ನನಗೆ ಅನ್ನಿಸುತ್ತಿದೆ. 40ವರ್ಷಗಳ ಸುದೀರ್ಘ ಬ್ಯಾಂಕ್ ಸೇವೆಯ ಅವಧಿಯಲ್ಲಿ ನಾನು ಕಂಡುಕೊಂಡ ಒಂದು ಸರಳ ಸತ್ಯವೆಂದರೆ ಬ್ಯಾಂಕು ಎಂದಾಕ್ಷಣ ಜನರು ಅನ್ಯ ಭಾಷೆಯ ಕಡೆ ಮುಖಮಾಡಿ ನಿಲ್ಲುವಂತಹುದು ! ನಾವು ಇದರಿಂದ ಹೊರಬರಬೇಕಿದೆ. ಅನೇಕ ಬ್ಯಾಂಕುಗಳು ಕನ್ನಡವನ್ನು ಬಳಸಲು ಹಲವಾರು ಉಪಕ್ರಮಗಳನ್ನೂ ಕೈಗೊಂಡಿವೆ.

ಆದರೆ ಅಂತಹ ಉಪಕ್ರಮಗಳನ್ನು ಸಿಬ್ಬಂದಿ, ಅಧಿಕಾರಿ ಹಾಗೂ ಜನಸಾಮಾನ್ಯರು ಬಳಸದೇ ಹೋದಲ್ಲಿ ಅವು ತುಕ್ಕು ಹಿಡಿಯಬಹುದು ಅಷ್ಟೇ. ಕನ್ನಡವನ್ನು ಬ್ಯಾಂಕುಗಳಲ್ಲಿ ಸುಲಲಿತವಾಗಿ ಬಳಸಲು ಬ್ಯಾಂಕು ಹಾಗೂ ಗ್ರಾಹಕ ಮಹೋದಯರು ಸಮ ಸಮನಾಗಿ ಜವಾಬ್ದಾರಿ ಹೊತ್ತಾಗ ಮಾತ್ರ ಭಾಷೆಯ ಬಳಕೆ ಹಸನಾಗಬಲ್ಲದು.

ಬ್ಯಾಂಕುಗಳಲ್ಲಿ ಕನ್ನಡವನ್ನು ಸಮರ್ಥವಾಗಿ ಬಳಸಲು ಇರುವ ಮಾರ್ಗೋಪಾಯಗಳನ್ನು ಇಲ್ಲಿ ಚಿಂತಿಸಲಾಗಿದೆ.

  1. ಜನಸಾಮಾನ್ಯರಿಗೆ ಬ್ಯಾಂಕಿನ ಎಲ್ಲ ಸೌಲಭ್ಯಗಳು ಸರಳವಾಗಿ, ಸುಲಭವಾಗಿ ದೊರೆಯುವಂತಾಗಲು ಎಲ್ಲ ಮಾಹಿತಿಯನ್ನು ಕನ್ನಡದಲ್ಲಿಯೇ ಮುದ್ರಿಸಿ ಒದಗಿಸುವುದು.
  2. ಉಳಿತಾಯ, ಸಾಲ ಮರುಪಾವತಿ, ಡಿಡಿ, ನೆಫ್ಟ್, ಆರ್‌ಟಿಜಿಎಸ್ ಠೇವಣಿ ಮಾಡುವ ಚಲನ್ ಮುಂತಾದವನ್ನು ಕನ್ನಡದಲ್ಲಿಯೂ ಕಡ್ಡಾಯವಾಗಿ ದೊರೆಯುವಂತೆ ಮಾಡುವುದು.
  3. ಕೃಷಿ ಸಾಲ, ಬಂಗಾರ ಸಾಲ, ಮುದ್ರಾಯೋಜನೆ, ಸಣ್ಣ ವ್ಯಾಪಾರ, ಸ್ವಸಹಾಯ ಸಂಘಗಳಿಗೆ ಕೊಡ ಮಾಡುವ ಸಾಲ ಮುಂತಾದ ಸಾಲ ಯೋಜನೆಗಳ ಅರ್ಜಿ ನಮೂನೆಗಳು ಕನ್ನಡದಲ್ಲಿಯೂ ಮುದ್ರಿಸಿಹಂಚುವುದು.
  4. ಎಲ್ಲ ಎಟಿಎಂ ಯಂತ್ರಗಳಲ್ಲಿನ ವ್ಯವಹಾರಿಕ ಸೂಚನೆಗಳನ್ನು ಕನ್ನಡದಲ್ಲಿಯೇ ಕಡ್ಡಾಯವಾಗಿ ಪ್ರದರ್ಶಿಸುವುದು.
  5. ಜನಧನ್ ಖಾತೆ, ಸರಳ ಉಳಿತಾಯ ಖಾತೆ, ಚಾಲ್ತಿ ಖಾತೆ, ಠೇವಣಿ ಖಾತೆಗಳ ಅರ್ಜಿ ನಮೂನೆಗಳನ್ನು ತಪ್ಪದೇ ಕನ್ನಡದಲ್ಲಿ ಮುದ್ರಿಸಿ ಬಳಸುವುದು.
  6. ಸಾಲ ಮಸೂಲಾತಿಗಾಗಿ ಬ್ಯಾಂಕುಗಳು ನೀಡುವ ತಗಾದೆ ನೋಟೀಸು ಕನ್ನಡದಲ್ಲಿ ನೀಡಿದರೆ ಒಳಿತು. ಇದರಿಂದ ಗ್ರಾಹಕ ತನ್ನದೇ ಭಾಷೆಯಲ್ಲಿ ವಿಷಯ ತಿಳಿಯುವುದರ ಮೂಲಕ ತಕ್ಷಣ ಸ್ವಂದಿಸಲು ಸಾಧ್ಯವಾಗಬಲ್ಲದು.
  7. ಬ್ಯಾಂಕಿನ ದೈನಂದಿಕ ವ್ಯವಹಾರದಲ್ಲಿ ಬಳಸುವ ಸೀಲುಗಳಲ್ಲಿ ಕನ್ನಡದ ಹೆಸರುಗಳು ಬಳಕೆಯಾಗುವಂತೆ ಕ್ರಮ ವಹಿಸುವುದು.
  8. ಬ್ಯಾಂಕಿನ ಒಳ ಆವರಣದಲ್ಲಿ ಇರುವ ಎಲ್ಲ ಸೂಚನಾ ಫಲಕಗಳಲ್ಲಿ ಕನ್ನಡವನ್ನು ಕಡ್ಡಾಯವಾಗಿ ಬಳಸುವುದು.
  9. ಬ್ಯಾಂಕಿನ ಹೊರ ಆವರಣದಲ್ಲಿ ಇರುವ ದೊಡ್ಡ ಬೋರ್ಡ್ಗಳಲ್ಲಿ ದೊಡ್ಡದಾಗಿಯೇ ಕನ್ನಡವನ್ನು ಬರೆಸುವುದು. ಕಾನೂನಾತ್ಮಕವಾಗಿ ಶೇಕಡಾ60% ಕ್ಕಿಂತ ಹೆಚ್ಚು ಕನ್ನಡವನ್ನು ಅಲ್ಲಿ ಬಳಸಬೇಕೆಂಬುದನ್ನು ಕಡ್ಡಾಯವಾಗಿ ಬಳಸುವುದು.
  10. ಬ್ಯಾಂಕ್ ಅಧಿಕಾರಿಗಳು, ವ್ಯವಸ್ಥಾಪಕರು ಮುಂತಾದವರ ಪದನಾಮದ ಫಲಕಗಳನ್ನು ಕನ್ನಡದಲ್ಲಿಯೇ ಬರೆಸುವುದು.
  11. ಅನ್ಯಭಾಷಿಕ ಅಧಿಕಾರಿ / ಸಿಬ್ಬಂದಿ ಇದ್ದಲ್ಲಿ ನಿರ್ದಿಷ್ಟ ಗಡುವಿನ ಒಳಗಾಗಿ ಅವರು ಕನ್ನಡವನ್ನು ಕಡ್ಡಾಯವಾಗಿ ಕಲಿಯುವಂತಹ ವಾತಾವರಣ ನಿರ್ಮಿಸುವುದು.
  12. ಬ್ಯಾಂಕಿನ ಎಲ್ಲ ಶಾಖೆಗಳಲ್ಲಿ “ಕನ್ನಡ ಘಟಕ / ಕನ್ನಡ ಜಾಗೃತಿ ಸಮಿತಿ” ಯನ್ನು ತೆರೆಯುವುದು. ಘಟಕ/ ಸಮಿತಿಯ ಮೂಲಕ ನಿರಂತರವಾಗಿ ಕನ್ನಡದ ಚಟುವಟಿಕೆಗಳನ್ನು ನಡೆಸುವುದು.
  13. ಶಾಖೆ ನೀಡುವ ಜಾಹೀರಾತು ಪ್ರಕಟಣೆ, ಹರಾಜು ನೋಟೀಸು ಮುಂತಾದವನ್ನು ಕನ್ನಡದಲ್ಲಿಯೂ ತಪ್ಪದೇ ನೀಡುವುದು.
  14. ಬ್ಯಾಂಕಿನ ಸಿಬ್ಬಂದಿ ಗ್ರಾಹಕರೊಂದಿಗೆ ಹೆಚ್ಚು ಹೆಚ್ಚಾಗಿ ಕನ್ನಡದಲ್ಲಿಯೇ ವ್ಯವಹರಿಸಬಹುದು /ಮಾತನಾಡಬಹುದು. ಅದರಿಂದ ಗ್ರಾಹಕರಿಗೆ ಬ್ಯಾಂಕಿನ ಬಗ್ಗೆ, ಅಂತಹ ಅಧಿಕಾರಿಯ ಬಗ್ಗೆ ಆತ್ಮೀಯ ಭಾವನೆ ಮೂಡಬಲ್ಲದು.
  15. ಕನ್ನಡದ ಪತ್ರಕ್ಕೆ ಕನ್ನಡದಲ್ಲಿಯೇ ಉತ್ತರಿಸುವ ಬದ್ಧತೆಯನ್ನು ಬೆಳೆಸಿಕೊಳ್ಳುವುದು. ಅಂತೆಯೇಗ್ರಾಹಕರು ಕೂಡ ಕನ್ನಡದಲ್ಲಿನ ಉತ್ತರಕ್ಕಾಗಿ ಒತ್ತಾಯಿಸುವುದು.
  16. ಎಲ್ಲ ಸಾಮಾಜಿಕ ಸುರಕ್ಷತಾ ಯೋಜನೆಗಳ ಅರ್ಜಿಗಳನ್ನು ಕನ್ನಡದಲ್ಲಿಯೇ ನೀಡುವುದು.
  17. ಪಾಸ್‌ಬುಕ್‌ಗಳಲ್ಲಿ ಇರುವ ಮಾಹಿತಿ ಪುಟವನ್ನು ಅಂದರೆ ಪ್ರಥಮ ಪುಟವನ್ನು ಕನ್ನಡದಲ್ಲಿಯೂ ಮುದ್ರಿಸುವುದು.
  18. ವಹಿವಾಟಿನ ರವಾನೆ ಸಂದೇಶಗಳನ್ನು ಕನ್ನಡದಲ್ಲಿಯೂ ರವಾನಿಸುವುದು.
  19. ಗ್ರಾಹಕ ಸಭೆ / ಮಾಹಿತಿ ಶಿಬಿರಗಳಲ್ಲಿ ನೀಡುವ ಮಾಹಿತಿ ಕನ್ನಡದಲ್ಲಿಯೇ ನೀಡುವುದು.
  20. ಆರ್ಥಿಕ ಸಾಕ್ಷರತಾ ಕೇಂದ್ರಗಳು ಕನ್ನಡವನ್ನು ಕಡ್ಡಾಯವಾಗಿ ಬಳಸುವಂತೆ ಸೂಚಿಸುವುದು.
  21. “ತಮಗೆ ಸಹಾಯ ಬೇಕೆ” ಕೌಂಟರಿನ ಸಿಬ್ಬಂದಿ ಕನ್ನಡದಲ್ಲಿ ಮಾತನಾಡುವಂತೆ ಕ್ರಮವಹಿಸುವುದು.
  22. ವಿವಿಧ ಕೌಂಟರುಗಳ ಮಾಹಿತಿ ಕನ್ನಡದಲ್ಲಿ ಬರೆಸುವುದು.
  23. ಅಂತರ್ಜಾಲದಲ್ಲಿ ಬ್ಯಾಂಕುಗಳು ಪ್ರಚುರಪಡಿಸುವ ಉತ್ಪನ್ನಗಳ ಮಾಹಿತಿಯನ್ನು ಕನ್ನಡದಲ್ಲಿಯೂ ಪ್ರಚುರಪಡಿಸುವುದು.
  24. ಆರ್‌ಸೆಟಿ ಮತ್ತು ರುಡ್‌ಸೆಟಿ ಸಂಸ್ಥೆಗಳ ಮೂಲಕ ಜಾಗೃತಿ ಶಿಬಿರಗಳನ್ನು ಆಯೋಜಿಸುವುದು.
  25. ಬ್ಯಾಂಕುಗಳು ದಿನನಿತ್ಯದ ವ್ಯವಹಾರದಲ್ಲಿ ಬಳಸುವ ಇಂಗ್ಲೀಷ್ ಪದಕ್ಕೆ ಸಮಾನಾಂತರ ಕನ್ನಡ ಪದವನ್ನು ಗುರುತಿಸಿ ಬ್ಯಾಂಕ್ ಶಾಖೆಯ ಸೂಚನಾ ಫಲಕದಲ್ಲಿ ಪ್ರತಿನಿತ್ಯ ಪ್ರಚುರಪಡಿಸುವುದು.
  26. ಹಿಂದಿ ದಿವಸ”ವನ್ನು ಕಡ್ಡಾಯವಾಗಿ ಆಚರಿಸುವಂತೆ ಪ್ರತಿ ನವೆಂಬರ್ ಒಂದರಂದು “ಕನ್ನಡದಿವಸ”‌ ವನ್ನುಬ್ಯಾಂಕಿನ ಪ್ರತಿ ಶಾಖೆಯಲ್ಲೂ ಕಡ್ಡಾಯವಾಗಿ ಆಚರಿಸುವುದು. ಮತ್ತುಅಂದಿನ ಸಭೆಯಲ್ಲಿ ಬ್ಯಾಂಕು / ಶಾಖೆ ಇದುವರೆಗೂ ಕೈಗೊಂಡ ಕನ್ನಡಪರವಾದ ಚಟುವಟಿಕೆಗಳ ವಿಚಾರ ವಿನಿಮಯ ಮಾಡಿಕೊಳ್ಳುವುದು.

ಒಟ್ಟಾರೆ ಬ್ಯಾಂಕುಗಳಲ್ಲಿ ಕನ್ನಡವನ್ನು ಹೆಚ್ಚು ಹೆಚ್ಚಾಗಿ ಬಳಸಲು ವಿಪುಲ ಅವಕಾಶಗಳಿವೆ. ನಾವೆಲ್ಲರೂ ನಮ್ಮ ನಮ್ಮ ಜವಾಬ್ದಾರಿಗಳನ್ನು ಅರಿತು, ಸಮಯ ಸಂದರ್ಭ ಬಂದಾಗಲೆಲ್ಲ ಸುಲಲಿತವಾಗಿ ಬ್ಯಾಂಕುಗಳಲ್ಲಿ ಕನ್ನಡವನ್ನು ಬಳಸಿದ್ದಲ್ಲಿ ಅದು ಇನ್ನೂ ಎತ್ತರದ ಶಿಖರಕ್ಕೆ ಏರಬಲ್ಲದು.

ಎನ್.ಟಿ.ಎರ‍್ರಿಸ್ವಾಮಿ,
ಕೆನರಾ ಬ್ಯಾಂಕಿನ ವಿಶ್ರಾಂತ ವಿಭಾಗೀಯ ಪ್ರಬಂಧಕರು,
ಅಚ್ಯುತ ಬಡಾವಣೆ, ಜಗಳೂರು – 577528
ದಾವಣಗೆರೆ ಜಿಲ್ಲೆ.
ಮೊ : 9901909672

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Advertisement

ದಿನದ ಸುದ್ದಿ

ಹರೀಶ್.ಟಿ ಅವರಿಗೆ ಪಿಎಚ್ ಡಿ ಪದವಿ

Published

on

ಸುದ್ದಿದಿನ,ದಾವಣಗೆರೆ : ನಗರದ ಹರೀಶ್ ಟಿ ಅವರು ಗುಲಬರ್ಗಾ ವಿಶ್ವವಿದ್ಯಾಲಯದಿಂದ ಪಿಎಚ್.ಡಿ ಪದವಿ ಪಡೆದಿದ್ದಾರೆ.

ಗುಲಬರ್ಗಾ ವಿಶ್ವವಿದ್ಯಾಲಯದ ಇತಿಹಾಸ ಅಧ್ಯಯನ ಮತ್ತು ಸಂಶೋಧನಾ ವಿಭಾಗದಲ್ಲಿ ಹರೀಶ್.ಟಿ ರವರು ಸಲ್ಲಿಸಿದ “ಚಿತ್ರದುರ್ಗ ಮತ್ತು ದಾವಣಗೆರೆ ಜಿಲ್ಲೆಯಲ್ಲಿನ ಭೋವಿ ಜನಾಂಗದವರ ಚಾರಿತ್ರಿಕ ಸ್ಥಿತ್ಯಾಂತರದ ಬಗ್ಗೆ ಒಂದು ಅಧ್ಯಯನ (ಕ್ರಿ.ಶ 1947 ರಿಂದ 2015 ರವರೆಗೆ)” ಎಂಬ ಶೀರ್ಷಿಕೆಯ ಮಹಾಪ್ರಬಂಧಕ್ಕೆ ಗುಲಬರ್ಗಾ ವಿಶ್ವವಿದ್ಯಾಲಯ ಪಿಹೆಚ್.ಡಿ (ಡಾಕ್ಟರೇಟ್) ಪದವಿ ನೀಡಿದೆ.

ಡಾ.ಸರ್ವೋದಯ.ಎಸ್.ಎಸ್. ರವರ ಮಾರ್ಗದರ್ಶನದಲ್ಲಿ ಈ ಮಹಾಪ್ರಬಂಧ ಸಲ್ಲಿಸಲಾಗಿದೆ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ದಿನದ ಸುದ್ದಿ

ಭಕ್ತ ಕನಕದಾಸ: ಚಲನಚಿತ್ರದಲ್ಲಿ ವಾಸ್ತವ ಮತ್ತು ಉತ್ಪ್ರೇಕ್ಷೆ

Published

on

  • ರಂಗನಾಥ ಕಂಟನಕುಂಟೆ

ಭಕ್ತ ಕನಕದಾಸ’(1960) ಆರು ದಶಕಗಳ ಹಿಂದೆ ನಿರ್ಮಾಣವಾಗಿರುವ ಚಲನಚಿತ್ರ. ಇದು ವೈ. ಆರ್. ಸ್ವಾಮಿ ನಿರ್ದೇಶನದ ಕನಕದಾಸರ ಜೀವನ ಕುರಿತಾದ ಕಪ್ಪು ಬಿಳುಪಿನ ಕನ್ನಡದ ಚಿತ್ರ. ಈ ಚಿತ್ರದಲ್ಲಿ ಕನಕದಾಸರ ಪಾತ್ರವನ್ನು ಡಾ. ರಾಜಕುಮಾರ್ ಅವರು ಅಭಿನಯಿಸಿದ್ದು ಚಿತ್ರ ಅದ್ಭುತವಾಗಿದೆ. ಕನಕನ ಭಕ್ತಿ ಬದುಕಿನ ವ್ಯಕ್ತಿತ್ವವನ್ನು ಕಟ್ಟಿಕೊಡಲು ಚಿತ್ರದಲ್ಲಿ ಯತ್ನಿಸಲಾಗಿದೆ.

ಕನ್ನಡದ ಆರಂಭ ಕಾಲದ ಚಿತ್ರಗಳ ‘ಯುಗಧರ್ಮ’ವನ್ನು ಅವಲೋಕಿಸಿದರೆ ಆ ಕಾಲಘಟ್ಟದಲ್ಲಿ ಪೌರಾಣಿಕ ಕಥೆಗಳು, ಐತಿಹಾಸಿಕ ಘಟನೆಗಳು ಮತ್ತು ವ್ಯಕ್ತಿಗಳನ್ನು ಕುರಿತು ಹೆಚ್ಚು ಭಕ್ತಿಪ್ರಧಾನ ಚಿತ್ರಗಳನ್ನು ನಿರ್ಮಿಸಲಾಗಿದೆ. ಉದಾಹರಣೆಗೆ ಬೇಡರ ಕಣ್ಣಪ್ಪ, ಓಹಿಲೇಶ್ವರ, ಸತ್ಯ ಹರೀಶ್ಚಂದ್ರ, ಭೂಕೈಲಾಸ, ಭಕ್ತ ಸಿರಿಯಾಳ, ಭಕ್ತ ಪ್ರಹ್ಲಾದ, ರೇಣುಕಾ ದೇವಿಮಹಾತ್ಮೆ ಹೀಗೆ ಅನೇಕ ಪೌರಾಣಿಕ ಕಥೆಗಳನ್ನು ಆಧರಿಸಿದ ಚಿತ್ರಗಳನ್ನು ನಿರ್ಮಿಸಲಾಗಿದೆ. ಈ ಚಿತ್ರಗಳಲ್ಲಿ ಹರಿದಿರುವುದು ‘ಭಕ್ತಿ’ಯ ತೊರೆಯೇ ಆಗಿದೆ.

ಹಾಗೆಯೇ ಮಯೂರ, ಕೃಷ್ಣದೇವರಾಯ, ಇಮ್ಮಡಿ ಪುಲಿಕೇಶಿ, ರಣಧೀರ ಕಂಠೀರವ ಮುಂತಾದ ಐತಿಹಾಸಿಕ ಚಿತ್ರಗಳನ್ನು ನಿರ್ಮಿಸಲಾಗಿದೆ. ಈ ಐತಿಹಾಸಿಕ ಚಿತ್ರಗಳಲ್ಲಿ ಕನ್ನಡ ನಾಡು ನುಡಿಗಳ ಬಗೆಗಿನ ‘ಅಭಿಮಾನ’ದ ಹೊಳೆಯೇ ಹರಿದಿದೆ. ಈ ಚಿತ್ರಗಳಲ್ಲಿ ವ್ಯಕ್ತವಾಗಿರುವ ಕನ್ನಡ ರಾಷ್ಟ್ರೀಯತೆಯ ವಿಚಾರಗಳು ಕೆಲವು ಭಾಷಿಕ ಮತ್ತು ಧಾರ್ಮಿಕ ಮೂಲಭೂತವಾದಿ ಮೇಲುಜಾತಿಗಳ ದೃಶ್ಟಿಯಿಂದ ಕೂಡಿವೆ. ಇದು ಬೇರೆಯದೇ ಚರ್ಚೆ.

ಇದಲ್ಲದೆ ಬಸವಣ್ಣ, ಪುರಂದರದಾಸ, ಕನಕದಾಸ ಮುಂತಾದ ಐತಿಹಾಸಿಕ ವ್ಯಕ್ತಿಗಳನ್ನು ಕೇಂದ್ರವಾಗಿಸಿಕೊಂಡು ಚಿತ್ರಗಳನ್ನು ನಿರ್ಮಿಸಲಾಗಿದೆ. ಇವು ಪ್ರಧಾನವಾಗಿ ಶೈವ ಮತ್ತು ವೈಶ್ಣವ ಭಕ್ತಿ ಪಂಥಗಳ ವಿವಿಧ ಧಾರೆಗಳ ಭಕ್ತರನ್ನು ಆಧರಿಸಿ ಚಿತ್ರಗಳನ್ನು ತಯಾರಿಸಲಾಗಿದೆ. ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ, ಐತಿಹಾಸಿಕ ವ್ಯಕ್ತಿಗಳನ್ನು ಪುರಾಣದ ಪಾತ್ರದಂತೆ ಚಿತ್ರಿಸಲು ಪ್ರಯತ್ನಿಸಲಾಗಿದೆ. ಆ ಮೂಲಕ ಯಕ್ಷಗಾನ ಮತ್ತು ಪೌರಾಣಿಕ ನಾಟಕಗಳ ನಂತರ ದೇವರನ್ನು ಬಹಳ ಪರಿಣಾಮಕಾರಿಯಾಗಿ ಜನರ ಕಣ್ಣೆದುರು ನಿಲ್ಲಿಸಲು ಚಲನಚಿತ್ರಗಳ ಮೂಲಕ ಪ್ರಯತ್ನಿಸಲಾಗಿದೆ.

ಅಂದರೆ ಹಲವು ಚಿತ್ರಗಳಲ್ಲಿ ಪುರಾಣದ ವಸ್ತುಗಳನ್ನು ಚಿತ್ರವಾಗಿಸುವ ಮೂಲಕ ದೇವರನ್ನು ಜನರ ಕಣ್ಣಿಗಿಳಿಸುವ ಕೆಲಸ ಮಾಡಲಾಗಿದೆ. ಹಾಗೆ ಕಣ್ಣಿಗಿಳಿದ ಪಾತ್ರಗಳಲ್ಲಿ ರಾಮ ಕೃಷ್ಣ ಮತ್ತು ಶಿವ ಮುಖ್ಯರು. ನಂತರ ಬಸವಣ್ಣ, ಪುರಂದರದಾಸ ಮತ್ತು ಇತರೆ ಅನೇಕ ಶರಣರು ಸಂತರೂ ಸೇರಿದ್ದಾರೆ. ಅಂತಹ ಭಕ್ತರಲ್ಲಿ ಕನಕನೂ ಒಬ್ಬ.

ನಮ್ಮ ಸಾಹಿತ್ಯ ಚರಿತ್ರೆಯಲ್ಲಿ ಕನಕನಿಗೆ ಕವಿಯಾಗಿ ಸ್ಥಾನವಿದ್ದರೂ ಅದಕ್ಕಿಂತ ಮಿಗಿಲಾಗಿ ಆದಿಕೇಶವನ ಭಕ್ತನಾಗಿ ಅವನನ್ನು ಸ್ತುತಿಸುತ್ತ ಕೀರ್ತನೆಗಳನ್ನು ರಚಿಸಿದ್ದರಿಂದ ‘ಭಕ್ತ ಕನಕದಾಸ’ನಾಗಿ ಹೆಚ್ಚು ಜನಜನಿತನಾಗಿದ್ದಾನೆ. ಅವನ ನಂತರದಲ್ಲಿ ಅದೆಶ್ಟೋ ಜನರು ಆತನ ಕೀರ್ತನೆಗಳನ್ನು ಹಾಡುತ್ತ ಅವನನ್ನು ಜೀವಂತವಾಗಿರಿಸುತ್ತ ಬಂದಿದ್ದಾರೆ. ಈ ಚಲನಚಿತ್ರವೂ ಕೂಡ ಕನಕನ ವ್ಯಕ್ತಿತ್ವವನ್ನು ಜೀವಂತವಾಗಿರಿಸುವ ಕೆಲಸವನ್ನೇ ಮಾಡಿದೆ.

ಹಾಗೆ ಜೀವಂತವಾಗಿಸುವ ಪ್ರಯತ್ನದಲ್ಲಿ ಕನಕನ ಜೀವನದ ಕೆಲವು ಘಟನೆಗಳನ್ನು ಐತಿಹ್ಯಗಳನ್ನು ಆಧಾರವಾಗಿಸಿಕೊಂಡು ಚಿತ್ರವನ್ನು ನಿರ್ಮಿಲಾಗಿದೆ. ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ ಚಿತ್ರದಲ್ಲಿ ಐತಿಹಾಸಿಕ ಅಂಶಗಳಿಗಿಂತ ಐತಿಹ್ಯಗಳಿಗೆ ದಂತಕತೆಗಳಿಗೆ ಹೆಚ್ಚು ಆದ್ಯತೆ ನೀಡಲಾಗಿದೆ. ಆ ಮೂಲಕ ಕನಕನನ್ನು ಮಹಾಜ್ಞಾನಿ ಮತ್ತು ಪವಾಡ ಪುರುಷನನ್ನಾಗಿ ಚಿತ್ರಿಸಲಾಗಿದೆ. ಮಾನವರೂ ತಮ್ಮ ಜೀವಿತ ಕಾಲದಲ್ಲಿ ಪವಾಡಗಳನ್ನು ಎಂದಿಗೂ ಮಾಡಲು ಬರುವುದಿಲ್ಲ. ಅದು ಕನಕನ ವಿಚಾರದಲ್ಲಿಯೂ ನಿಜ.

ಇಂದು ಜೀವಿಸುತ್ತಿರುವ ಯಾವುದೇ ಮಾನವರ ವಿಚಾರದಲ್ಲಿಯೂ ನಿಜ. ಆದರೆ ಕನಕನ ದೈವಭಕ್ತಿಯನ್ನು ಲೋಕಕ್ಕೆ ಸಾರುವ ಉತ್ಸಾಹದಲ್ಲಿ ದೇವರನ್ನು ಬೇಕೆಂದಾಗ ಧರೆಗಿಳಿಸುವ ಮಾಂತ್ರಿಕನಂತೆ ಚಿತ್ರಿಸಲಾಗಿದೆ. ಕನಕನು ವ್ಯಾಸರಾಯರ ಶಿಶ್ಯತ್ವದಲ್ಲಿದ್ದಾಗ ಇತರ ಶಿಶ್ಯರಿಗಿಂತ ಬಹಳ ಭಿನ್ನವೆಂದು ತೋರಿಸಲು ಒಡ್ಡಿದ ಎಲ್ಲ ಪರೀಕ್ಷೆಗಳು ಇದಕ್ಕೆ ಉದಾಹರಣೆಯಾಗಿವೆ. ಹಾಗೆಯೇ ಕನಕನಿಗೆ ಕಿಂಡಿಯ ಮೂಲಕ ದರ್ಶನ ನೀಡಿದ ಕೃಷ್ಣನ ಕತೆಯೂ ಇದೆ ಆಗಿದೆ. ವಾಸ್ತವದಲ್ಲಿ ಎಂದಿಗೂ ಅಸಾಧ್ಯವಾದ ದಂತಕತೆಗಳನ್ನು ಕನಕನ ಸುತ್ತ ಸೃಶ್ಟಿಸಲಾಗಿದೆ. ಈ ಜನಪ್ರಿಯ ಸಂಗತಿಗಳನ್ನೇ ಚಿತ್ರವೂ ಒಪ್ಪಿ ಅದನ್ನು ಪ್ರೇಕ್ಷಕರ ಮುಂದಿಟ್ಟಿದೆ. ಇದರ ಪರಿಣಾಮವಾಗಿ ಇಡೀ ಚಿತ್ರದಲ್ಲಿ ಕನಕನ ಬಗೆಗಿನ ಚಾರಿತ್ರಿಕ ಸಂಗತಿಗಳೇ ಕಳೆದುಹೋಗಿವೆ.

ಯಾವುದೇ ಸಂತ ಶರಣ ಭಕ್ತರ ಸುತ್ತ ಅತಿಮಾನುಶ ಕತೆಗಳನ್ನು ಪವಾಡ ಪ್ರಸಂಗಗಳನ್ನು, ದಂತಕತೆ ಐತಿಹ್ಯಗಳನ್ನು ಕಟ್ಟಲಾಗುತ್ತದೆ. ಆ ಮೂಲಕ ಸಂತರ ಶರಣ ವ್ಯಕ್ತಿತ್ವವನ್ನು ಔನ್ನತ್ಯಕ್ಕೇರಿಸುವ ಪ್ರಯತ್ನ ನಡೆಸಲಾಗುತ್ತದೆ. ಜನಸಮುದಾಯಗಳಿಗೆ ತಮ್ಮ ನಾಯಕನನ್ನು ಅಸಾಮಾನ್ಯನಾಗಿಸುವ ಉಮೇದಿನಲ್ಲಿ ಇಂತಹ ಕತೆಗಳನ್ನು ಸೃಶ್ಟಿಸಲಾಗುತ್ತದೆ. ಆದರೆ ಇದು ವಾಸ್ತವದಲ್ಲಿ ಅಸಾಧ್ಯ ಎಂದಾದ ಮೇಲೆ ಅವುಗಳ ಅಥೆಂಟಿಸಿಟಿಯೇ ಪ್ರಶ್ನಾರ್ಹವಾಗುತ್ತದೆ. ಹಾಗಾಗಿ ‘ಭಕ್ತ ಕನಕದಾಸ’ ಚಲನಚಿತ್ರ ಒಂದು ಚಿತ್ರವಾಗಿ ಉತ್ತಮವಾಗಿದೆ ಎಂದರೆ ಏನರ್ಥ? ಕನಕನ ವ್ಯಕ್ತಿತ್ವವನ್ನು ಚಾರಿತ್ರಿಕ ವಿಶಯಗಳಿಗೆ ಬದಲಾಗಿ ದಂತಕತೆಗಳ ಮೂಲಕ ಮರುಕಟ್ಟಿಕೊಳ್ಳಲು ಪ್ರಯತ್ನಿಸಿರುವುದರಲ್ಲಿಯೇ ಚಿತ್ರದ ಸಮಸ್ಯೆಯಿದೆ.

ಯಾಕೆಂದರೆ ದಂತಕತೆಗಳನ್ನು ಪ್ರಾಮಾಣಿಕವಾಗಿ ನಂಬುವುದರಲ್ಲಿ ಅಂತಹ ಸಮಸ್ಯೆ ಇರುವುದಿಲ್ಲ. ಬದಲಿಗೆ ಆ ದಂತಕತೆಗಳನ್ನೇ ಚಾರಿತ್ರಿಕ ಆಕರಗಳಾಗಿ ಮುಂದಿಡುತ್ತ ಹಲವು ವಾದಗಳ ಸಮರ್ಥನೆಗೆ ಇಳಿಯುವುದು ಬಹಳ ಮುಖ್ಯ ಸಮಸ್ಯೆ. ಅದರಲ್ಲಿಯೂ ಒಂದು ಇಡೀ ಸಮುದಾಯ ಅಂತಹ ದಂತಕತೆಗಳನ್ನೇ ನಿಜವೆಂದು ನಂಬಿ ಅದರ ಮೂಲಕ ತನ್ನ ಅಸ್ಮಿತೆಯನ್ನು ಕಂಡುಕೊಳ್ಳಲು ಯತ್ನಿಸುವುದು ಅಪಾಯಕಾರಿ ಕೂಡ. ಉದಾಹರಣೆಗೆ ಕನಕನ ಕೀರ್ತನೆಗಳನ್ನು ಗಮನಿಸಿದರೆ ಅವನೊಬ್ಬ ಜಾತ್ಯತೀತ ವ್ಯಕ್ತಿಯೆಂದು ಕಂಡುಬರುತ್ತದೆ.

ಆದರೆ ಇಂದು ಅವನನ್ನು ಕುರುಬ ಜಾತಿಗೆ ಮಾತ್ರ ಸೀಮಿತಗೊಳಿಸುವ ಪ್ರಯತ್ನವನ್ನು ಚುನಾವಣಾ ರಾಜಕಾರಣ ಮಾಡುತ್ತಿದೆ. ಇಂತಹ ರಾಜಕೀಯ ಪ್ರೇರಿತ ಜಾತಿ ಸಂಘಟನೆಗಳು ಕೂಡ ಒಂದು ಜಾತಿಗೆ ಸೀಮಿತಗೊಳಿಸಲು ಯತ್ನಿಸುತ್ತವೆ. ಕುರುಬಾಸ್.ಕೊ.ಇನ್ ಎಂಬ ಒಂದು ಯುಟೂಬ್ ಚಾನಲ್ ಕಾರ್ಯನಿರ್ವಹಿಸುತ್ತಿದೆ. ಇದರಲ್ಲಿ ಕನಕನ ಜೀವನವನ್ನು ಪರಿಚಯಿಸುವ ಒಂದು ಆಡಿಯೋ ಇದ್ದು ಅದು ಕನಕನ ಜೀವನದ ಪರಿಚಯ ಮಾಡುತ್ತದೆ.

ಆದರೆ ಇಲ್ಲಿ ಕನಕನ ಐತಿಹಾಸಿಕ ವಿವರಗಳು ನೆಪಮಾತ್ರಕ್ಕೆ ಮಾತ್ರ ಇದ್ದು ಉಳಿದಂತೆ ಸಿನಿಮಾದ ದೃಶ್ಯಕತೆಗಳಲ್ಲಿ ಬಿಂಬಿತವಾಗಿರುವ ವಿಚಾರಗಳೇ ಕನಕನ ನೈಜ ಐತಿಹಾಸಿಕ ವಿವರಗಳು ಎಂದು ನಿರೂಪಿಸಲಾಗಿದೆ. ಯಾರೋ ಎಂದೋ ಎಲ್ಲೋ ಕಟ್ಟಿದ ದಂತಕತೆಗಳು ತಲೆಮಾರಿನಿಂದ ತಲೆಮಾರಿಗೆ ಹಬ್ಬಿ ಅವೇ ಐತಿಹಾಸಿಕ ಸಂಗತಿಗಳು ಎಂಬಂತೆ ಬಿಂಬಿತವಾಗುವುದು ಚರಿತ್ರೆಗೆ ಮಾಡುವ ಅಪಮಾನ. ಇಂದು ಕನಕನ ಕುರಿತಾದ ದಂತಕತೆಗಳೇ ಅವನ ಚರಿತ್ರೆಯಾಗಿ ಪ್ರಚಾರದಲ್ಲಿವೆ.

ಹಾಗಾಗಿ ಕನಕನ ವ್ಯಕ್ತಿತ್ವ ಮತ್ತು ಅಲ್ಲಿನ ಸಮಸ್ಯೆಗಳ ಬಿರುಕುಗಳನ್ನು ವರ್ತಮಾನ ಕಣ್ಣೋಟದಲ್ಲಿ ಅರಿಯಬೇಕಿದೆ. ಐತಿಹಾಸಿಕ ವ್ಯಕ್ತಿಯಾಗಿದ್ದ ಕನಕನನ್ನು ಪವಾಡ ಪುರುಷನನ್ನಾಗಿಸುವುದರ ಸಮಸ್ಯೆಯನ್ನು ನಾವಿಂದು ತಿಳಿಯಬೇಕಿದೆ. ಮೊದಲಿಗೆ, ಕನಕನನ್ನು ಪುರಾಣೀಕರಣ ಮಾಡಿರುವುದೇ ಒಂದು ಸಮಸ್ಯೆ. ಹೀಗೆ ಪುರಾಣೀಕರಣ ಮಾಡುವ ಪ್ರಯತ್ನವನ್ನು ಶತಮಾನಗಳಿಂದಲೂ ಮಾಡಿಕೊಂಡು ಬಂದಿದೆ. ಅಂದರೆ ಸಿನಿಮಾದಲ್ಲಿ ಮಾತ್ರ ಮೊದಲಿಗೆ ಸಂಭವಿಸಿರುವ ಘಟನೆಯಲ್ಲ.

ಈಗಾಗಲೇ ಕನಕನ ಸುತ್ತ ಹಲವು ಐತಿಹ್ಯಗಳು ಕಳೆದ ಅರ್ಧ ಸಹಸ್ರಮಾನದಲ್ಲಿ ಯಾವ ಯಾವುದೋ ಹಂತದಲ್ಲಿ ಹುಟ್ಟಿ ಬೆಳೆದು ಜನಜನಿತವಾಗಿದ್ದ ಸಂಗತಿಗಳನ್ನು ಜೋಡಿಸಿ ಚಿತ್ರೀಕರಿಸಲಾಗಿದೆ. ಹಾಗಾಗಿ ಕನಕನ ಬಗೆಗೆ ಇಂತಹ ಐತಿಹ್ಯಗಳೇ ಹೆಚ್ಚು ಜನಪ್ರಿಯವಾಗಿದ್ದು ಚಾರಿತ್ರಿಕ ಸಂಗತಿಗಳೇ ಅತ್ಯಂತ ಕಡಿಮೆಯಿವೆ. ದೈವೀಕರಣ ಇಲ್ಲವೇ ಪುರಾಣೀಕರಣದಲ್ಲಿ ಚರಿತ್ರೆಯ ವಸ್ತುಸ್ಥಿತಿಯನ್ನು ತಿರುಚಲಾಗುತ್ತದೆ. ಮತ್ತು ಸಮಾಜದಲ್ಲಿ ತಿರುಚಿದ ಸಂಗತಿಗಳೇ ಚರಿತ್ರೆಯ ಕಥನಗಳಾಗಿ ಸಂಘರ್ಶಗಳಿಗೂ ಕಾರಣವಾಗಬಹುದು.

ಒಬ್ಬ ಭಕ್ತನನ್ನು ಭಕ್ತನನ್ನಾಗಿ ನೋಡುವುದರಿಂದ ಹಲವು ಪ್ರಯೋಜನಗಳಿವೆ. ಬದಲಿಗೆ ಭಕ್ತನನ್ನು ಅತಿಮಾನುಶೀಕರಿಸಿದರೆ, ದೈವೀಕರಿಸಿದರೆ ಅದರಿಂದ ಹಲವು ಅಪಾಯಗಳಿವೆ. ಇಲ್ಲಿ ಗಮನಿಸಬೇಕಾದ ಸಂಗತಿಯೆಂದರೆ, ಚಾರಿತ್ರಿಕ ಸಂಗತಿಗಳು ಎಂದಿಗೂ ಪವಿತ್ರವಲ್ಲ. ಆದರೆ ಪುರಾಣದ ವಿಚಾರಗಳು ಪಾವಿತ್ರೀಕರಣಗೊಂಡು ಭಾವನಾತ್ಮಕ ಸಂಗತಿಗಳಾಗಿಬಿಟ್ಟರೆ ಅವು ಅಪಾಯವನ್ನು ಸೃಷ್ಟಿಸುತ್ತವೆ. ಒಮ್ಮೆ ಅವು ಪವೀತ್ರೀಕರಣಗೊಂಡು ಪ್ರಶ್ನಾತೀತ ಸಂಗತಿಗಳಾಗಿ ಬದಲಾದರೆ ಅವು ಮೂಲಭೂತವಾದಿ ವಿಚಾರಗಳಾಗಿ ಬದಲಾಗಿ ಯಾರೂ ವಿಮರ್ಶೆಗೆ ಒಳಪಡಿಸದಂತೆ ನಿರ್ಬಂಧ ವಿಧಿಸುತ್ತವೆ.

ಕುರಾನ್ ಬೈಬಲ್ ಭಗವದ್ಗೀತೆಗಳು ಹೀಗೆ ಪವಿತ್ರೀಕರಣಕ್ಕೆ ಒಳಗಾಗಿ ಪ್ರಶ್ನಾತೀತವಾಗಿಬಿಡುತ್ತಿವೆ. ಆದರೆ ಚಾರಿತ್ರಿಕ ಸಂಗತಿಗಳಾದರೆ ಅವು ಸದಾ ಸಂಶೋಧನೆಗೆ ಮರುವಿಮರ್ಶೆಗೆ ಒಳಪಡಬೇಕಾದ ಸಂಗತಿಗಳಾಗಿರುತ್ತವೆ. ಮತ್ತು ಮಾನವರು ತಮ್ಮ ಪ್ರಯತ್ನದಿಂದ ಅತ್ಯುತ್ತಮವಾದುದನ್ನು ಸಾಧಿಸಲು ಸಾಧ್ಯ ಎಂಬುದನ್ನು ತೋರಿಸಿಕೊಡಲು ಸಾಧ್ಯವಿರುತ್ತದೆ.

ಯಾವುದೇ ವ್ಯಕ್ತಿಯನ್ನು ಅತಿಮಾನುಶ ಇಲ್ಲವೇ ಕಾರಣಪುರುಶರಂತೆ ಬಿಂಬಿಸಿದರೆ ಅದು ಮಾನವಾತೀತ ಸಾಹಸವಾಗಿ ಅದು ಯಾವುದಕ್ಕೂ ಮಾದರಿಯಾಗಲಾರದು. ಹಾಗಾಗಿ ಚಾರಿತ್ರಿಕ ಸಂಗತಿಗಳು ಬದಿಗೆ ಸರಿದು ಪೌರಾಣಿಕರಣಗೊಂಡರೆ ಬದಲಾದ ಕಾಲಘಟ್ಟಗಳಲ್ಲಿ ಅಪಾಯಗಳು ಸಂಭವಿಸುವ ಸಾಧ್ಯತೆಗಳಿರುತ್ತವೆ.

ಇಲ್ಲಿ ಇದನ್ನು ಇನ್ನಶ್ಟು ವಿವರಿಸಿಕೊಳ್ಳಬಹುದೆನಿಸುತ್ತದೆ. ಉದಾಹರಣೆಗೆ, ರಾಮಾಯಣದ ತಿರುಳಿನ ಮತ್ತು ಅಲ್ಲಿನ ಹಲವು ಪ್ರಸಂಗಗಳ ಬಗೆಗೆ ಪ್ರಶ್ನೆಯೆತ್ತಿದರೆ ಇಂದು ಅವು ನ್ಯಾಯಾಲಯದ ಕಟಕಟೆಯೇರುವ ಸನ್ನಿವೇಶಗಳೂ ಆಗಿ ಬದಲಾಗಿವೆ. ದೇಶದಲ್ಲಿ ಎಶ್ಟೋ ಅಂತಹ ಪ್ರಕರಣಗಳಿವೆ. ಯಾಕೆಂದರೆ ರಾಮಾಯಣ ಒಂದು ಪೌರಾಣಿಕ ಕೃತಿ. ಅದು ಒಂದು ಧರ್ಮದವರಿಗೆ ಇಂದು ಬಹಳ ಪವಿತ್ರವಾದ ಕಥನವಾಗಿ ಮಾರ್ಪಟ್ಟಿದೆ. ಅಲ್ಲಿರುವ ಎಲ್ಲ ಸಂಗತಿಗಳನ್ನು ಚಾರಿತ್ರಿಕ ಸಂಗತಿಗಳಂತೆ ಬಿಂಬಿಸಲಾಗುತ್ತಿದೆ. ಆದರೆ ಪುರಾಣಕೃತಿಯಲ್ಲಿನ ಎಲ್ಲ ಘಟನೆಗಳು ನಡೆದಿರಲೇಬೇಕೆಂದೇನಿಲ್ಲ.

ಅಲ್ಲಿ ಕಾಲ್ಪನಿಕ ಸಂಗತಿಗಳಿಗೂ ಅವಕಾಶವಿದೆ. ಇಲ್ಲವೇ ಎಲ್ಲವೂ ಕಾಲ್ಪನಿಕವೇ ಇರಬಹುದು. ಆದರೆ ಚರಿತ್ರೆಯ ಸಂಗತಿಗಳು ಹಾಗಲ್ಲ. ಅಲ್ಲಿ ಕಲ್ಪನೆಗೆ ಅವಕಾಶವಿಲ್ಲ. ಅವು ಘಟಿಸಿದ್ದು ಆದಶ್ಟು ವಾಸ್ತವಕ್ಕೆ ಹತ್ತಿರವಾಗಿ ಅವನ್ನು ಕಥಿಸುವ ಅಪೇಕ್ಷೆ ಇರುತ್ತದೆ. ಇವೆಲ್ಲ ಪುರಾಣದ ಪವೀತ್ರೀಕರಣದ ಅಪಾಯಗಳು. ಅಂದರೆ ದೀರ್ಘಕಾಲದಲ್ಲಿ ನಡೆಯುವ ಈ ಪ್ರಕ್ರಿಯೆ ಚರಿತ್ರೆಯ ಯಾವುದೋ ಒಂದು ದುಶ್ಟ ಕಾಲಘಟ್ಟದಲ್ಲಿ ವಿಪರೀತದ ಮತ್ತು ತಿರುಚಿದ ವಿಚಾರಗಳು ರಾಜಕೀಯಕ್ಕೆ ಬಳಕೆಯಾದರೆ ಸಮಾಜದಲ್ಲಿ ಸಂಘಶರ್Àಕ್ಕೆ ಕಾರಣವಾಗುತ್ತದೆ. ಇದು ಕೆಲವು ಸಾಂಸ್ಕøತಿಕ ನಾಯಕರ ವಿಚಾರದಲ್ಲಿ ನಿಜವಾಗುತ್ತಿದೆ. ಬಸವಣ್ಣ, ಕನಕದಾಸ ಮುಂತಾದವರ ವಿಚಾರದಲ್ಲಿ ಇದು ನಡೆಯುತ್ತಿದೆ.

ಬಸವಣ್ಣ ಶರಣರ ನೇತಾರನಾಗಿದ್ದವನು. ವಚನ ಚಳವಳಿಗೆ ನಾಯಕತ್ವ ನೀಡಿ ಅದನ್ನು ಮುನ್ನಡೆಸಿದ ಚಾರಿತ್ರಿಕ ವ್ಯಕ್ತಿ. ಆದರೆ ಇಂದು ಬಸವಣ್ಣ ದೇವರಾಗಿ ಪ್ರಶ್ನಾತೀತನಾಗಿಬಿಟ್ಟಿದ್ದಾನೆ. ಆತನ ಸುತ್ತ ನೂರಾರು ಮಠಾಧೀಶರು ಗರುಡ ಪಡೆಯಂತೆ ಕಾವಲಿದ್ದಾರೆ. ಇದು ಬಸವಣ್ಣನನ್ನು ಚಾರಿತ್ರಿಕ ವ್ಯಕ್ತಿಯಾಗಿದ್ದು ಆತನೂ ಎಲ್ಲರಂತೆ ಮಾನವನಾಗಿ ಬಾಳಿದವನು. ಅವನೂ ಹಲವು ತಪ್ಪು ವಿಚಾರಗಳನ್ನು ಮಂಡಿಸಿ ನಂತರ ತನ್ನನ್ನು ತಾನು ತಿದ್ದಿಕೊಂಡವನು. ಆದರೆ ಇದನ್ನು ಒಪ್ಪಲು ಸಿದ್ದರಿಲ್ಲದ ಪಡೆ ಬಸವಣ್ಣನ ಬಗೆಗೆ ಪ್ರಶ್ನೆಯೆತ್ತಿದರೆ ಅದು ಮುಗಿ ಬೀಳುತ್ತದೆ.

ಈಗಾಗಲೇ ಬಸವಣ್ಣನ ಸುತ್ತ ಎದ್ದಿದ್ದ ಹಲವು ವಿವಾದಗಳನ್ನು ಗಮನಿಸಿದರೆ ಇದು ಅರ್ಥವಾಗುತ್ತದೆ.(ಧರ್ಮಕಾರಣ, ಮಹಾಚೈತ್ರ, ಚಿಕವೀರರಾಜೇಂದ್ರ, ಆನುದೇವ ಹೊರಗಣವನು ಇತ್ಯಾದಿ ಕೃತಿಗಳು ಪ್ರಕಟವಾದ ಸಂದರ್ಭದಲ್ಲಿ ಸೃಶ್ಟಿಯಾದ ವಿವಾದಗಳನ್ನು ಗಮನಿಸಿದರೆ ಇದು ಅರ್ಥವಾಗುತ್ತದೆ. ಇಂತಹ ವಿವಾದಗಳು ಕನಕನ ಸುತ್ತ ಇನ್ನೂ ಸೃಶ್ಟಿಯಾಗಿಲ್ಲವಾದರೂ ಮುಂದೆ ಸೃಶ್ಟಿಯಾಗುವುದಿಲ್ಲ ಎಂದೇನಿಲ್ಲ. ಹಾಗಾಗಿ ಈ ಹಿಂದಿನ ವಿದ್ಯಮಾನಗಳಿಂದ ಸಮುದಾಯಗಳು ಪಾಠ ಕಲಿತು ಬಹಳ ಎಚ್ಚರಿಕೆಯಿಂದಲೇ ಹೆಜ್ಜೆಯಿಡಬೇಕಾಗುತ್ತದೆ.

ಸದ್ಯದ ಪರಿಸ್ಥಿತಿ ಕೊಂಚ ಬದಲಾದರೆ ಕನಕನ ವಿಚಾರದಲ್ಲಿಯೂ ನಿಜವಾಗಿಬಿಡುವ ಅಪಾಯವಿದೆ. ಹಾಗಾಗಿ ಸಮುದಾಯಗಳು ಓರ್ವ ಸಾಂಸ್ಕøತಿಕ ನಾಯಕನ ವ್ಯಕ್ತಿತ್ವವನ್ನು ಕಟ್ಟಿಕೊಳ್ಳುವ ಹೊತ್ತಿನಲ್ಲಿ ಬಹಳ ಎಚ್ಚರಿಕೆಯಿಂದ ಕಟ್ಟಿಕೊಳ್ಳಬೇಕಾಗುತ್ತದೆ. ಬಹಳ ಮುಕ್ತವಾದ ಮನಸ್ಸಿನ ಮತ್ತು ಆಧುನಿಕ ಜಗತ್ತಿನ ಆಲೋಚನೆಗಳಿಗೆ ಅನುಗುಣವಾಗಿ ವಿಚಾರಗಳನ್ನು ಕಟ್ಟಿಕೊಳ್ಳಬೇಕಾಗುತ್ತದೆ. ಚರಿತ್ರೆಯನ್ನು ಪುನರ್ ರಚಿಸುವುದು ಎಂದರೆ ಗತವನ್ನು ಮತ್ತೆ ಕಟ್ಟಿಕೊಳ್ಳುವುದಲ್ಲ. ಬದಲಿಗೆ ಗತವನ್ನು ವರ್ತಮಾನದ ಮತ್ತುಭವಿಷ್ಯ ಬದುಕಿನ ಜೀವನ ಮೌಲ್ಯಗಳಿಗೆ ಅನುಗುಣವಾಗಿ ಕಟ್ಟಿಕೊಳ್ಳಬೇಕು.

ಅದಿಲ್ಲದೆ ನಿರ್ಬಂಧಿತ ಜಾತಿ ಸಮಾಜದ ಕಟ್ಟುಪಾಡುಗಳಿಗೆ ತಕ್ಕಂತೆ ಯಾವುದೇ ನಾಯಕರ ವ್ಯಕ್ತಿತ್ವವನ್ನು ಕಟ್ಟಿದರೆ ಅದರಿಂದ ಹೆಚ್ಚು ಪ್ರಯೋಜನವಿಲ್ಲ. ವಿಸ್ತಾರವಾಗಿ ಹಬ್ಬಬಹುದಾದ ಮರದ ಕೊಂಬೆಗಳನ್ನು ಕತ್ತರಿಸಿ ಗಿಡ್ಡವಾಗಿ ಬೆಳೆಸುವ ಬೊನ್ಸಾಯಿ ಮರಗಳಂತೆ ಸಮುದಾಯದ ಆಲೋಚನೆಗಳು ಕುಬ್ಜಗೊಳ್ಳುತ್ತವೆ. ಈಚಿನ ನಮ್ಮ ಸಮಾಜದಲ್ಲಿ ನಡೆಯುತ್ತಿರುವ ವಿದ್ಯಮಾನಗಳನ್ನು ಗಮನಿಸಿದರೆ ಸಮುದಾಯಗಳನ್ನು ಮತ್ತಶ್ಟು ಸಂಕುಚಿತಗೊಂಡು ಕುಬ್ಜಗೊಳ್ಳುತ್ತಿರುವುದು ಕಾಣುತ್ತಿದೆ.

ಜಾತಿ ಕಟ್ಟುಪಾಡುಗಳನ್ನು ಮೀರಿ ಸಮುದಾಯಗಳು ಯೋಚಿಸುವುದನ್ನೇ ಮರೆತು ಅತ್ಯಂತ ಉಗ್ರ ಜಾತಿವಾದಿ ಸಮುದಾಯಗಳಾಗಿ ಬದಲಾಗುತ್ತಿವೆ. ಅಂತಹ ಹೊತ್ತಿನಲ್ಲಿ ಕನಕನ ವ್ಯಕ್ತಿತ್ವನ್ನು ಮತ್ತೆ ಕಟ್ಟಿಕೊಳ್ಳುವ ಸಮಾಜವು ಕನಕನಿಂದ ಕಲಿತು ಬಹಳ ಮುಕ್ತವಾಗಿ ಯೋಚಿಸುವುದನ್ನು ಜೀವನದ ಅವಿಭಾಜ್ಯ ಅಂಗವಾಗಿಸಿಕೊಳ್ಳಬೇಕಿದೆ. ಆದ್ದರಿಂದ ಕನಕನಂತಹವರ ವ್ಯಕ್ತಿತ್ವನ್ನು ಆಧುನಿಕ ಕಾಲದಲ್ಲಿ ಮರು ಕಟ್ಟುವ ಸಂದರ್ಭದಲ್ಲಿ ಬಹಳ ಎಚ್ಚರಿಕೆ ವಹಿಸಬೇಕಾಗುತ್ತದೆ.

ಪ್ರಸ್ತುತ ಚಲನಚಿತ್ರದಲ್ಲಿ ಕನಕನ ವ್ಯಕ್ತಿತ್ವವನ್ನು ಗತದ ನೆಲೆಯಲ್ಲಿಯೇ ನಿಲ್ಲಿಸಲಾಗಿದೆ. ಆತನನ್ನು ಪರಮ ಭಕ್ತ ಎಂದು ಬಿಂಬಿಸುವ ಉತ್ಸಾಹದಲ್ಲಿ ಆತನ ಸುತ್ತ ಹಲವು ಐತಿಹ್ಯ ಮತ್ತು ದಂತಕತೆಗಳನ್ನು ಕಟ್ಟಲಾಗಿದೆ. ಆ ಕತೆಗಳನ್ನು ದಿಟವೆಂಬಂತೆ ನಂಬಿ ಅವುಗಳ ಮೂಲಕ ಕನಕನ ವ್ಯಕ್ತಿತ್ವವನ್ನು ಹಿಗ್ಗಿಸಲು ಪ್ರಯತ್ನಿಸಲಾಗಿದೆ. ಅಂತಹ ಐತಿಹ್ಯಗಳೇ ಚಿತ್ರದ ವಸ್ತು. ಉದಾಹರಣೆಗೆ ಕನಕನ ಹುಟ್ಟು, ತಿರುಪತಿ ತಿಮ್ಮಪ್ಪನ ವರ, ತಿಮ್ಮಪ್ಪನಾಯಕ ಕನಕನಾಗುವ ನಿಧಿಯ ಕತೆ, ಕೋಣ ಮಂತ್ರ ಪ್ರಸಂಗ, ಬಾಳೆ ಹಣ್ಣಿನ ಪ್ರಸಂಗ, ‘ನಾನು ಹೋದರೆ ಹೋದೆನು’, ಕನಕನ ಕಿಂಡಿ, ಸಾಲಿಗ್ರಾಮ ಪ್ರಸಂಗ ಹೀಗೆ ಹಲವು ಪ್ರಸಂಗಳು ಕನಕನ ಸುತ್ತ ಹೆಣೆದುಕೊಂಡಿವೆ.

ಇವನ್ನು ತಾರ್ಕಿಕವಾಗಿ ಮತ್ತು ಚಾರಿತ್ರಿಕವಾಗಿ ನಿಜ ಎಂದು ಸಾಬೀತು ಪಡಿಸಲು ಯಾವುದೇ ಆಕರಗಳಿಲ್ಲ. ಐತಿಹ್ಯಗಳೇ ಆಗಿವೆ. ಅವುಗಳಿಗೆ ಭಾವನಾತ್ಮಕ ನೆಲೆಯಿರುತ್ತದೆಯೇ ಹೊರತು ಯಾವುದೇ ನೈಜ ವಾಸ್ತವದ ನೆಲೆಯಿರುವುದಿಲ್ಲ. ಹಾಗಾಗಿ ಇವನ್ನು ಒಪ್ಪುವುದು ಕಷ್ಟ. ಅದರಲ್ಲಿಯೂ ಎಲ್ಲ ಪ್ರಸಂಗಳಲ್ಲಿಯೂ ದೇವರು ಪ್ರತ್ಯಕ್ಷವಾಗಿ ಭಕ್ತರಿಗೆ ದರ್ಶನ ನೀಡುತ್ತಾನೆ. ಇದು ಸಿನಿಮಾದಲ್ಲಿ ಮತ್ತು ಕಲ್ಪನೆಯಲ್ಲಿ ಮಾತ್ರ ಸಾಧ್ಯ. ವಿಶೇಶವೆಂದರೆ ಕನಕನ ಕೃತಿಗಳಲ್ಲಿ ಎಲ್ಲಿಯೂ ದೈವ ಪ್ರತ್ಯಕ್ಷವಾದ ಬಗೆಗೆ ವಿವರಗಳಿಲ್ಲ.

ಬದಲಿಗೆ ನಿರಂತರ ಧ್ಯಾನ, ಹುಡುಕಾಟಗಳು ಮತ್ತು ದೇವರನ್ನು ಕಾಣಬೇಕೆಂಬ ಹಂಬಲ ಇದೆಯೇ ಹೊರತು ಅಲ್ಲಿ ದೇವರ ದರ್ಶನದ ಆತ್ಯಂತಿಕ ಅನುಭವನದ ವಿವರಗಳಿಲ್ಲ. ಆದರೆ ಸಿನಿಮಾ ದೇವರೇ ದರ್ಶನ ನೀಡಿ ಕನಕನನ್ನು ಎಲ್ಲ ಕ್ಷಣಗಳಲ್ಲಿಯೂ ಕಾಪಾಡಿ ದೊಡ್ಡವನನ್ನಾಗಿ ಮಾಡುತ್ತದೆ. ಇವು ಜನರಲ್ಲಿ ಭಕ್ತಿ ರಸವನ್ನು ಪ್ರಚೋದಿಸಲು ನೆರವಾಗಬಹುದೇ ಹೊರತು ಜನರು ಅಂತಹ ಪ್ರಯೋಗ ಮಾಡಿ ದೇವರನ್ನು ಧರೆಗಳಿಸಲು ಸಾಧ್ಯವೇ ಇಲ್ಲ.

ಹಾಗಾಗಿ ಚಲನಚಿತ್ರ ಕಟ್ಟಿಕೊಡುವ ಕನಕನ ವ್ಯಕ್ತಿತ್ವ ಕಾಲ್ಪನಿಕ ಇಲ್ಲವೇ ಪವಾಡಮಯ ಪ್ರಸಂಗಗಳ ಕಟ್ಟುಕತೆಗಳ ಅನಾವರಣ ಎನ್ನಿಸುತ್ತದೆಯೇ ಹೊರತು ಅದು ಚಾರಿತ್ರಿಕ ಸತ್ಯವಂತೂ ಅಲ್ಲ. ಅಂದರೆ ಕನಕ ಚಾರಿತ್ರಿಕವಾಗಿ ಇದ್ದದ್ದು ನಿಜ. ಆದರೆ ಚಾರಿತ್ರಿಕ ವ್ಯಕ್ತಿಯಾಗಿದ್ದ ಕನಕನ ಸುತ್ತ ಕಟ್ಟಿಕೊಂಡಿರುವ ಕಥನಗಳು ಚಾರಿತ್ರಿಕವಲ್ಲ. ಹಲವು ಸಂತರ ಶರಣರ ಸುತ್ತ ಜನಸಮುದಾಯಗಳು ಕಟ್ಟಿಕೊಂಡಿರುವ ದಂತಕತೆಗಳಂತೆ ಕನಕನ ಸುತ್ತಲೂ ಕಟ್ಟಿಕೊಂಡಿವೆ. ಹಾಗೆ ಕಟ್ಟುವುದರ ಮೂಲಕ ಚರಿತ್ರಾತೀತನಾಗಿ ಕಲ್ಪಿಸಿಕೊಳ್ಳುವ ಪ್ರಯತ್ನ ಮಾಡಿವೆ.

ಇದು ನಮ್ಮ ದೇಶದ ಜಾಯಮಾನ ಕೂಡ. ಇಲ್ಲಿ ಚಾರಿತ್ರಿಕ ಸಂಗತಿಗಳನ್ನು ಚಾರಿತ್ರಿಕ ಸಂಗತಿಗಳಂತೆ ನೋಡದೆ ಅವನ್ನು ಪೌರಾಣೀಕರಿಸುವ ಪ್ರಯತ್ನ ಮಾಡಲಾಗಿರುತ್ತದೆ. ಅದು ಕನಕನ ವಿಚಾರದಲ್ಲಿಯೂ ನಿಜವಾಗಿದೆ. ಆಧುನಿಕ ಸಂವಹನ ಮಾಧ್ಯಮವಾದ ಚಲನಚಿತ್ರವೂ ಅದೇ ಕೆಲಸವನ್ನು ಮಾಡಿದೆ. ಇಂತಹ ಆಲೋಚನೆಯ ಕ್ರಮಗಳನ್ನು ಬದಲಿಸಿಕೊಂಡು ಸಾಧ್ಯವಾದಶ್ಟು ವಾಸ್ತವಕ್ಕೆ ಹತ್ತಿರವಾದ ರೀತಿಯಲ್ಲಿ ಸಾಧಕರ ವ್ಯಕ್ತಿತ್ವಗಳನ್ನು ರೂಪಿಸಿಕೊಳ್ಳಬೇಕಾಗುತ್ತದೆ. ಯಾಕೆಂದರೆ ಇಂತಹ ಸಿನಿಮಾಗಳನ್ನು ಲಕ್ಶಾಂತರ ಜನರು ನೋಡಿದ್ದಾರೆ. ಅವರ ಮನಸ್ಸಿನಲ್ಲಿ ಕನಕನ ವ್ಯಕ್ತಿತ್ವ ಅಚ್ಚೊತ್ತಿದೆ.

ಅದರಲ್ಲಿ ಬಹುತೇಕರಿಗೆ ಚಿತ್ರ ಬಿಂಬಿಸುವ ಕನಕನ ಪವಾಡಮಯ ಬದುಕು ನೆನಪಿನಲ್ಲಿ ಉಳಿದಿರುತ್ತದೆಯೇ ಹೊರತು ಅದರಾಚೆಗೆ ಕನಕ ಚಿಂತಿಸಿದ ವಿಚಾರಗಳು ಅವರಿಗೆ ಪರಿಚಯವಾಗುವುದೇ ಇಲ್ಲ. ಮುಖ್ಯವಾಗಿ ಜಾತಿ-ಕುಲಗಳ ಸುತ್ತ ಆತನೆತ್ತಿದ್ದ ಪ್ರಶ್ನೆಗಳು ಜನರ ಮನಸ್ಸಿಗೆ ಇಳಿದು ಜಾತ್ಯತೀತವಾಗಿ ಯೋಚಿಸುವುದನ್ನೇ ಮಾಡುವುದಿಲ್ಲ. ಬದಲಿಗೆ ದೈವಾಂಶ ಸಂಭೂತ ಭಕ್ತ ಕನಕ ಕಲ್ಪಿತ ವ್ಯಕ್ತಿತ್ವ ಪರಿಚಯವಾಗುತ್ತದೆಯೇ ಹೊರತು ನೈಜ ಮತ್ತು ವಾಸ್ತವದ ಚಾರಿತ್ರಿಕ ಕನಕನ ವ್ಯಕ್ತಿತ್ವ ಅವರಲ್ಲಿ ಉಳಿಯುವುದೇ ಇಲ್ಲ.

ಹಾಗೆ ಚಾರಿತ್ರಿಕ ಕನಕನ ವ್ಯಕ್ತಿತ್ವ ಉಳಿಯದೇ ಹೋದರೆ, ವೈಚಾರಿಕತೆಯ ಬೀಜಗಳು ಮೊಳೆಯದೇ ಹೋದರೆ, ಅಲ್ಲಿ ಮೌಢ್ಯಗಳ ಬಿತ್ತನೆಯಾಗಿ ಅವೇ ಬೆಳೆದು ಪೊದೆಗಳು ಸೃಷ್ಟಿಯಾಗುತ್ತವೆ. ಆದ್ದರಿಂದ ಇಂದು ವೈಚಾರಿಕ ಸಂಗತಿಗಳ ಮೇಲೆ ಹರಡಿಕೊಂಡಿರುವ ಮುಸುಕನ್ನು ತೆರೆದು ಕನಕನನ್ನು ಅರಿಯಬೇಕಾಗುತ್ತದೆ. ಈ ದಿಸೆಯಲ್ಲಿ ಚಿತ್ರಬಿತ್ತುವ ವೈಚಾರಿಕ ಪ್ರಭಾವ ಅತ್ಯಂತ ಕಡಿಮೆಯೆಂದೇ ಹೇಳಬೇಕಾಗುತ್ತದೆ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ದಿನದ ಸುದ್ದಿ

ಫಿಜಿಯೋಥೆರಪಿಸ್ಟ್ ನೇಮಕ : ಅರ್ಜಿ ಆಹ್ವಾನ

Published

on

ಸುದ್ದಿದಿನ,ದಾವಣಗೆರೆ : ಪ್ರಸಕ್ತ ಸಾಲಿನ ಸಮಗ್ರ ಶಿಕ್ಷಣ ಕರ್ನಾಟಕ ಸಮನ್ವಯ ಶಿಕ್ಷಣದ ಅನುಮೋದಿತ ಚಟುವಟಿಕೆಯಾದ ತೀವ್ರತರ ವಿಕಲತೆ ಹೊಂದಿರುವ ವಿಕಲಚೇತನ ವಿದ್ಯಾರ್ಥಿಗಳಿಗೆ ದೈಹಿಕ ಚಿಕಿತ್ಸೆ/ಫಿಜಿಯೋಥೆರಫಿ ಮಾಡಿಸುವ ಅಗತ್ಯತೆ ಇರುವುದರಿಂದ ತ್ರಿಸದಸ್ಯ ಸಮಿತಿಯಲ್ಲಿ ಕ್ಷೇತ್ರ ಸಂಪನ್ಮೂಲ ಕೇಂದ್ರ ದಾವಣಗೆರೆ ದಕ್ಷಿಣವಲಯ ಇಲ್ಲಿಗೆ ಒಂದು ಹುದ್ದೆ ಫಿಜಿಯೋಥೆರಫಿಸ್ಟ್ (ಡಿಪ್ಲೋಮ ಇನ್ ಫಿಜಿಯೋಥೆರಫಿಸ್ಟ್/ಬ್ಯಾಚುಲರ್ ಆಫ್ ಫಿಜಿಯೋಥೆರಪಿಸ್ಟ್) ನೇಮಕ ಮಾಡಿಕೊಳ್ಳಲು ಉದ್ದೇಶಿಸಿದ್ದು, ಅರ್ಹರಿಂದ ಅರ್ಜಿ ಆಹ್ವಾನಿಸಲಾಗಿದೆ.

ಸೂಕ್ತ ವಿದ್ಯಾರ್ಹತೆಯುಳ್ಳ ಆಸಕ್ತ ಅಭ್ಯರ್ಥಿಗಳು ದಾಖಲೆಗಳೊಂದಿಗೆ ನ.25 ರ ಸಂಜೆ 5.30 ಗಂಟೆಯೊಳಗಾಗಿ ಕ್ಷೇತ್ರ ಸಮನ್ವಯಾಧಿಕಾರಿಗಳ ಕಚೇರಿ, ಕ್ಷೇತ್ರ ಸಂಪನ್ಮೂಲ ಕೇಂದ್ರ, ಮೋತಿ ವೀರಪ್ಪ ಕಾಲೇಜ್ ಆವರಣ, ವಿಶ್ವೇಶ್ವರಯ್ಯ ಪಾರ್ಕ್ ಎದುರು, ದಾವಣಗೆರೆ ದಕ್ಷಿಣ ವಲಯ ಮೊ.ಸಂ: 9480695178, 9449910879 ನ್ನು ಸಂಪರ್ಕಿಸಬಹುದೆಂದು ಕ್ಷೇತ್ರ ಸಂಪನ್ಮೂಲ ಕೇಂದ್ರದ ಕ್ಷೇತ್ರ ಸಮನ್ವಯಾಧಿಕಾರಿ ಹಾಗೂ ಕ್ಷೇತ್ರ ಶಿಕ್ಷಣಾಧಿಕಾರಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

Trending