Connect with us

ನೆಲದನಿ

ಕಾನ್ಷೀರಾಮ್ ಜೀಯವರು ಕಂಡ ‘ಬುದ್ಧ ಭಾರತದ ಕನಸು’..!?

Published

on

  • ರಘೋತ್ತಮ ಹೊ.ಬ

ಹುಜನ ಸಮಾಜ ನಿರ್ಮಿಸಿ ಶೋಷಿತ ಸಮುದಾಯಗಳನ್ನು ಆಳುವ ವರ್ಗವಾಗಿಸುವ ನಿಟ್ಟಿನಲ್ಲಿ ತಮ್ಮ ಜೀವನ ಪೂರ್ತಿ ತ್ಯಾಗ ಮಾಡಿದ ಮಾನ್ಯವರ್ ಕಾನ್ಷೀರಾಮ್ ಜೀಯವರು ಬರೀ ರಾಜಕೀಯ ಅಧಿಕಾರವನ್ನಷ್ಟೆ ಪ್ರತಿಪಾದಿಸಿದ್ದರು ಎಂದು ಅನೇಕರು ತಪ್ಪು ಗ್ರಹಿಕೆ ಹೊಂದಿದ್ದಾರೆ.

ಆದರೆ ವಾಸ್ತವವೆಂದರೆ 2003 ಮಾರ್ಚ್ 15 ರಂದು ಮುಂಬಯಿಯ ಶಿವಾಜಿ ಪಾರ್ಕ್ ನಲ್ಲಿ ನಡೆದ ಬೃಹತ್ ರ್ಯಾಲಿಯಲ್ಲಿ ಕಾನ್ಷೀರಾಮ್ ಜೀಯವರು “ಬರುವ 2006 ಅಕ್ಟೋಬರ್ 14 ರಂದು ಅಂದರೆ ಧಮ್ಮಚಕ್ರ ಪ್ರವರ್ತನ ದಿನದ ಸುವರ್ಣಯುಗ ಮಹೋತ್ಸವದಂದು ತಾನು 3 ಕೋಟಿ ಜನರ ಜೊತೆ ಬೌದ್ಧ ಧರ್ಮ ಸ್ವೀಕರಿಸುವುದಾಗಿ” ಘೋಷಿಸುತ್ತಾರೆ.

(1956 ಅಕ್ಟೋಬರ್14 ರಂದು ಬಾಬಾಸಾಹೇಬ್ ಅಂಬೇಡ್ಕರ್ ರವರು ಬೌದ್ಧ ಧರ್ಮ ಸ್ವೀಕರಿಸಿದರು. ಅದರ 50 ನೇ ವರ್ಷಾಚರಣೆ ಅಂದರೆ ಸುವರ್ಣ ಮಹೋತ್ಸವ 2006 ಅಕ್ಟೋಬರ್ 14 ಅಗಿತ್ತು).

ದುರಂತವೆಂದರೆ ಅನಾರೋಗ್ಯದ ಕಾರಣದಿಂದ ಕಾನ್ಷೀರಾಮ್ ಜೀ ಯವರಿಗೆ ತಮ್ಮ ಆ ಆಸೆ ಪೂರೈಸಲು ಆಗಲಿಲ್ಲ. 2006 ಅಕ್ಟೋಬರ್ 9 ರಂದು ಅಂದರೆ ಧರ್ಮಚಕ್ರ ಪ್ರವರ್ತನ ದಿನದ ಸುವರ್ಣ ಮಹೋತ್ಸವದ ಐದು ದಿನಕ್ಕೆ ಮೊದಲು ಅವರು ನಿಧನರಾಗುತ್ತಾರೆ.

ಅಂದಹಾಗೆ ನಿಧನರಾದರೂ ಮೂಲತಃ ಸಿಖ್ ಧರ್ಮಕ್ಕೆ ಸೇರಿದ ಚಮ್ಮಾರ್ ಸಮುದಾಯದವರಾದ ಕಾನ್ಷೀರಾಮ್ ಜೀಯವರ ಶವಸಂಸ್ಕಾರದ ಅಂತಿಮ ವಿಧಿವಿಧಾನಗಳನ್ನು ಅವರ ಆ ಆಶಯದ ಪ್ರಕಾರವೇ ಬೌದ್ಧ ಧರ್ಮದ ಅನುಸಾರ ಮಾಡಲಾಗುತ್ತದೆ.

ಆ ಮೂಲಕ ಕಾನ್ಷೀರಾಮ್ ಜೀಯವರ ಚೇತನಕ್ಕೆ ಬಾಬಾಸಾಹೇಬರಂತೆ ಅಭೂತಪೂರ್ವ ಬೌದ್ಧ ಗೌರವ ಸಲ್ಲಲ್ಪಡುತ್ತದೆ. ಪ್ರಶ್ನೆ ಏನೆಂದರೆ ಕಾನ್ಷೀರಾಮ್ ಜೀಯವರು ಅಂದು ಅಂದರೆ 2003 ಮಾರ್ಚ್ 15 ರಂದು ಹೇಳಿದ್ದಂತೆ 3 ಕೋಟಿ ಜನರ ನಡುವೆ ಬೌದ್ಧ ಧರ್ಮ ಸ್ವೀಕರಿಸುವ ಅವರ ಆಸೆಯ ಆ ಘಟನೆ ನಡೆದಿದ್ದಿದ್ದರೆ?

ಖಂಡಿತ ಅದು 1956 ಅಕ್ಟೋಬರ್ 14 ರ ನಂತರದ ಮತ್ತೊಂದು ಐತಿಹಾಸಿಕ ಮೈಲಿಗಲ್ಲಿನ ಕಾರ್ಯಕ್ರಮವಾಗಿರುತ್ತಿತ್ತು. ಬಾಬಾಸಾಹೇಬರು ಆಶಿಸಿದ ಧರ್ಮಚಕ್ರದ ಚಲಿಸುವಿಕೆ ಮತ್ತೂ ವೇಗ ಪಡೆದುಕೊಳ್ಳುತ್ತಿತ್ತು.

ಈ ನಿಟ್ಟಿನಲ್ಲಿ ನಾವು ಅರ್ಥ ಮಾಡಿಕೊಳ್ಳಬೇಕಾಗಿರುವುದು. ಬರೀ ರಾಜಕೀಯ ಅಧಿಕಾರದ ಜಪವಷ್ಟೆ ಬಹುಜನ ಚಳುವಳಿಯ ಉದ್ದೇಶವಲ್ಲ. ಬದಲಿಗೆ ಬೌದ್ಧ ಧರ್ಮ ಸೇರುವುದು ಸೇರಿದಂತೆ ಶೋಷಿತ ಸಮುದಾಯಗಳ ಸಮಗ್ರ ವಿಮೋಚನೆ ಅದರ ಆಶಯ ಎಂಬುದನ್ನು.

ಹಾಗೆಯೇ ಬಹುಜನ ಚಳುವಳಿಯ ಕೆಲ‌ ಚಿಂತಕರು ಬಾಬಾಸಾಹೇಬ್ ಅಂಬೇಡ್ಕರರು ತಮ್ಮ ಅಂತಿಮ ದಿನಗಳಲ್ಲಿ ಬೌದ್ಧ ಧರ್ಮ ಸ್ವೀಕರಿಸಿದರು. ಆದ್ದರಿಂದ ನಾವೂ ಸಹ…. ಎನ್ನುತ್ತಾರೆ. ಆದರೆ ವಾಸ್ತವವೆಂದರೆ ಬೌದ್ಧ ಧರ್ಮ ಸ್ವೀಕರಿಸಿದ ನಂತರ ಬಾಬಾಸಾಹೇಬ್ ಅಂಬೇಡ್ಕರರು ತಾನು ಇಷ್ಟು ತಡವಾಗಿ ಬೌದ್ಧ ಧರ್ಮ ಸ್ವೀಕರಿಸಿದ್ದಕ್ಕೆ ವಿಷಾದ ವ್ಯಕ್ತಪಡಿಸುತ್ತಾರೆ.

ಮತ್ತು ಈ ಕೆಲಸವನ್ನು ತಾನು ಮೊದಲೇ ಮಾಡಬೇಕಿತ್ತು ಎನ್ನುತ್ತಾರೆ. ಹಾಗೆಯೇ 3 ಕೋಟಿ ಜನರ ನಡುವೆ ಬೌದ್ಧ ಧರ್ಮ ಸ್ವೀಕರಿಸುವೆ ಎಂದ ಕಾನ್ಷೀರಾಮ್ ಜೀಯವರ ಆಸೆ ಕೂಡ ಪೂರೈಸಲ್ಪಡದಿದ್ದುದನ್ನು ನಾವು ಇಲ್ಲಿ ಗಮನಿಸಬಹುದು.

ಆದ್ದರಿಂದ ತಳ ಸಮುದಾಯಗಳು ತಡ ಮಾಡದೆ ತಮ್ಮ ರಾಜಕೀಯ ಆಸೆ ಆಕಾಂಕ್ಷೆ ಚಟುವಟಿಕೆ ಗಳ ನಡುವೆ ಬೌದ್ಧ ಧರ್ಮ ಸ್ವೀಕರಿಸಲಿ. ಬಾಬಾಸಾಹೇಬ್ ಅಂಬೇಡ್ಕರ್ ಮತ್ತು ದಾದಾಸಾಹೇಬ್ ಕಾನ್ಷೀರಾಮ್ ಜೀಯವರ ಬುದ್ಧ ಭಾರತದ ಕನಸನ್ನು ನನಸು ಮಾಡಲಿ, ಪ್ರಬುದ್ಧ ಭಾರತದ ನಿರ್ಮಾಣ ದ ದಿಕ್ಕಿನಲ್ಲಿ ದೃಢ ಹೆಜ್ಜೆ ಇಡಲಿ ಎಂಬುದೇ ಸದ್ಯದ ಕಳಕಳಿ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

ನೆಲದನಿ

ಶಿವಮೊಗ್ಗ ಜಿಲ್ಲೆ – ನಮ್ಮ ಹೆಮ್ಮೆ : ಅಚ್ಚಕನ್ಯೆ ಜಲಪಾತ

Published

on

ತೀರ್ಥಹಳ್ಳಿ ಎಂದೊಡನೆ ನೆನಪಾಗುವುದು ಹಚ್ಚ ಹಸಿರ ಪ್ರಕೃತಿ. ಕಾಡಿನ ನಡುನಡುವೆ ಅಲ್ಲಲ್ಲಿ ತಲೆ ಎತ್ತಿ ನಿಂತಿರುವ ಅಡಕೆ ತೋಟಗಳು. ಮಾರಿಗೊಂದೊಂದು ಮನೆಗಳು. ಈ ಎಲ್ಲಾ ಸೌಂದರ್ಯಕ್ಕೆ ತನ್ನದೊಂದು ಕೊಡುಗೆಯಿರಲಿ ಎಂದು ನದಿ ಸೃಷ್ಟಿಸಿರುವ ಜಲಪಾತಗಳು. ಈ ಜಲಪಾತಗಳನ್ನು ನೋಡುವುದು, ಅವುಗಳಲ್ಲಿ ಆಟವಾಡುವುದು ಎಂದರೇ ಒಂದು ಆನಂದ. ಇಂತಹ ಜಲಪಾತಗಳಲ್ಲಿ ಒಂದು ತೀರ್ಥಹಳ್ಳಿ ತಾಲ್ಲೂಕಿನ ಅಚ್ಚಕನ್ಯೆ ಜಲಪಾತ.

ಪ್ರಥಮ ಬಾರಿಗೆ ಏಳು ಅಡಿ ಎತ್ತರದಿಂದ ಜಲಪಾತವಾಗಿ ಶರಾವತಿ ನದಿ ಧುಮುಕುತ್ತದೆ. ಇದೇ ಅಚ್ಚಕನ್ಯೆ ಜಲಪಾತ. ಶರಾವತಿ ಉದಯಿಸುವ ಅಂಬುತೀರ್ಥ ಅಚ್ಚಕನ್ನೆ ಜಲಪಾತದಿಂದ 05 ಕಿ.ಮೀ ದೂರದಲ್ಲಿದೆ.

ನೋಡಲು ನಯನ ಮನೋಹರವಾಗಿರುವ ಈ ಜಲಪಾತ, ಶಿವಮೊಗ್ಗ ಜಿಲ್ಲಾ ಕೇಂದ್ರದಿಂದ 82 ಕಿ.ಮೀ ಮತ್ತು ತೀರ್ಥಹಳ್ಳಿ ತಾಲ್ಲೂಕು ಕೇಂದ್ರದಿಂದ 21 ಕಿ.ಮೀ ದೂರದಲ್ಲಿದೆ. ತೀರ್ಥಹಳ್ಳಿಯಿಂದ ಹೊಸನಗರಕ್ಕೆ ಹೋಗುವ ಮಾರ್ಗದಲ್ಲಿ ಈ ಸ್ಥಳ ಸಿಗುತ್ತದೆ. ಸೆಪ್ಟೆಂಬರ್ ನಿಂದ ಡಿಸೆಂಬರ್ ವರೆಗಿನ ಅವಧಿ ಜಲಪಾತವನ್ನು ನೋಡಲು ಸೂಕ್ತ ಸಮಯ.

ಹೆಚ್ಚಿನ ಮಾಹಿತಿಗಾಗಿ

Achakanya Falls, Shimoga – A Hidden Beauty

ಪರಾಮರ್ಶನ

https://kanaja.karnataka.gov.in

ಕೃಪೆ | dipr shimoga

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ನೆಲದನಿ

ಶಿವಮೊಗ್ಗ ಜಿಲ್ಲೆ – ನಮ್ಮ ಹೆಮ್ಮೆ : ಮೈಸೂರು ಕಾಗದ ಕಾರ್ಖಾನೆ ನಿಯಮಿತ (ಎಂ.ಪಿ.ಎಂ)

Published

on

ಮೈಸೂರು ಸಂಸ್ಥಾನದ ಮಹಾರಾಜ ಶ್ರೀ ಕೃಷ್ಣರಾಜ ಒಡೆಯರ್ ಬಹದ್ದೂರ್ ರವರು ಮೈಸೂರು ಪೇಪರ್ ಮಿಲ್ಸ್ ಲಿಮಿಟೆಡ್ (ಎಮ್ ಪಿ ಎಮ್) ನ್ನು 1936 ರಲ್ಲಿ ಸ್ಥಾಪಿಸಿದರು. ಇದನ್ನು ಅಂದಿನ 1017ರ ಮೈಸೂರು ಕಂಪನಿಗಳ ಅಧಿನಿಯಮದ ನಿಯಮ 08ರ ಅಡಿಯಲ್ಲಿ 20 ಮೇ 1936 ರಂದು ರಿಜಿಸ್ಟಾರ್ ಮಾಡಲಾಯಿತು.

ಬಳಿಕ 1977ರಲ್ಲಿ ಸರ್ಕಾರಿ ಕಂಪನಿಯಾಗಿ ಬದಲಾಯಿತು. ಕಂಪನಿಯ ನೋಂದಾಯಿತ ಕಛೇರಿ ಬೆಂಗಳೂರಿನಲ್ಲಿದೆ ಮತ್ತು ಅದರ ಘಟಕ ಶಿವಮೊಗ್ಗ ಜಿಲ್ಲೆಯ ಭದ್ರಾವತಿಯಲ್ಲಿದೆ.

ಕರ್ನಾಟಕ ಸರ್ಕಾರ ಕಂಪನಿಯ 65% ಷೇರನ್ನು ಹೊಂದಿದೆ. ಐಡಿಬಿಐ ಮತ್ತು ಇತರೆ ಹಣಕಾಸು ಸಂಸ್ಥೆಗಳು 18% ಷೇರನ್ನು ಹೊಂದಿವೆ ಮತ್ತು 17%ರಷ್ಟು ಸಾರ್ವಜನಿಕರ ಷೇರುಗಳಿವೆ. 306 ಜನ ನೌಕರರು, 250 ಗುತ್ತಿಗೆದಾರರು ಸೇರಿದಂತೆ ಅನೇಕರು ಇತರೆ ಹುದ್ದೆಗಳಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. 266 ಎಕರೆ ವ್ಯಾಪ್ತಿಯಲ್ಲಿ ಈ ಉದ್ಯಮ ನಡೆಯುತ್ತಿದೆ.

75 ಸಾವಿರ ಎಕರೆ ಪ್ರದೇಶದಲ್ಲಿ ಅಕೇಶಿಯ, ನೀಲಗಿರಿ ಸೇರಿದಂತೆ ಇತರೆ ಮೆದು ಮರಗಳನ್ನು ಬೆಳೆಯಲಾಗುತ್ತಿದೆ ಮತ್ತು ಅವುಗಳನ್ನು ಕಂಪನಿಗೆ ಕಚ್ಚಾವಸ್ತುವನ್ನಾಗಿ ಬಳಸಿಕೊಳ್ಳಲಾಗುತ್ತಿದೆ.

ಬರವಣಿಗೆ ಮತ್ತು ಮುದ್ರಣಕ್ಕಾಗಿ ಕಾಗದ, ಡ್ರಾಯಿಂಗ್ ಹಾಳೆ ಸೇರಿದಂತೆ ಎಲ್ಲಾ ವಿಧದ ಕಾಗದಗಳನ್ನು, ಎಲ್ಲಾ ವಿಧದ ಗಾತ್ರಗಳಲ್ಲಿ ತಯಾರು ಮಾಡುತ್ತದೆ. ವಾರ್ಷಿಕ 88000 ಮೆಟ್ರಿಕ್ ಟನ್ ಕಾಗದಗಳನ್ನು ಉತ್ಪಾದನೆ ಮಾಡಲಾಗುತ್ತಿತ್ತು.

ಇದನ್ನೂ ಓದಿ |ನಮ್ಮ ಶಿವಮೊಗ್ಗ – ನಮ್ಮ ಹೆಮ್ಮೆ : ಕೊಡಚಾದ್ರಿ

ಲಾಭದಾಯಕವಾಗಿ ಕೆಲಸ ನಿರ್ವಹಿಸುತ್ತಿದ್ದ ಈ ಕಂಪನಿಯು ಹಲವಾರು ಕಾರಣಗಳಿಂದ ಬರು ಬರುತ್ತ ತನ್ನ ವ್ಯಾಪಾರ ವಹಿವಾಟುಗಳನ್ನು ಕಳೆದುಕೊಂಡು ಮುಚ್ಚುವ ಹಂತಕ್ಕೆ ತಲುಪಿ 2005ರಲ್ಲಿ ರಾಜ್ಯ ಸರ್ಕಾರ ಮುದ್ರಣ ಕಾಗದದ ಉತ್ಪಾದನೆಯನ್ನು ಸ್ಥಗಿತಗೊಳಿಸಿತು.

ಜಿಲ್ಲೆಯ ಕೈಗಾರಿಕಾ ನಕಾಶೆಯಲ್ಲಿ ಪ್ರಮುಖ ಸ್ಥಾನ ಪಡೆದಿದ್ದ ಭದ್ರಾವತಿಯ ಮೈಸೂರು ಕಾಗದ ಕಾರ್ಖಾನೆ ನಿಯಮಿತವು ಭದ್ರಾವತಿ ತಾಲ್ಲೂಕು ಕೇಂದ್ರದಿಂದ 03 ಕಿ.ಮೀ ಮತ್ತು ಶಿವಮೊಗ್ಗ ಜಿಲ್ಲಾ ಕೇಂದ್ರದಿಂದ 22 ಕಿ.ಮೀ ಅಂತರದಲ್ಲಿದೆ.

ಹೆಚ್ಚಿನ ಮಾಹಿತಿಗಾಗಿ

ಪರಾಮರ್ಶನ

https://mpm.karnataka.gov.in

ಕೃಪೆ : Dipr shimoga

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ನೆಲದನಿ

ನಮ್ಮ ಶಿವಮೊಗ್ಗ – ನಮ್ಮ ಹೆಮ್ಮೆ : ಕೊಡಚಾದ್ರಿ

Published

on

ಕೊಡಚಾದ್ರಿ ಬೆಟ್ಟ

ಪಶ್ಚಿಮ ಘಟ್ಟಗಳ ಸಾಲಿನಲ್ಲಿ ಕಂಡು ಬರುವ ಗಿರಿ ಶಿಖರಗಳು ಚಾರಣ ಪ್ರಿಯರಿಗೆ ಹೇಳಿ ಮಾಡಿಸಿದ ತಾಣ. ಇಂತಹ ರಮಣೀಯ ಸ್ಥಳಗಳಲ್ಲಿ ಶಿವಮೊಗ್ಗ ಜಿಲ್ಲೆಯ ಹೊಸನಗರ ತಾಲ್ಲೂಕಿನ ಕೊಡಚಾದ್ರಿ ಬೆಟ್ಟವು ಕೂಡ ಒಂದು. ಕೊಡಚಾದ್ರಿ ಬೆಟ್ಟ ಚಾರಣ ಪ್ರಿಯರಿಗೆ ಬಹು ಪರಿಚಿತ ಸ್ಥಳ. ಇಲ್ಲಿ ಶಂಕರಾಚಾರ್ಯರು ತಪಸ್ಸು ಮಾಡಿದ ಬಗ್ಗೆ ಪ್ರತೀತಿ ಇದೆ.

ಇಲ್ಲಿರುವ ಸರ್ವಜ್ಞ ಪೀಠ ಶಂಕರಾಚಾರ್ಯರು ಪ್ರತಿಷ್ಠಾಪಿಸಿದ ಪೀಠ ಎನ್ನಲಾಗುತ್ತದೆ. ಈ ಬೆಟ್ಟದಿಂದ ಸೂರ್ಯೋದಯ ನೋಡುವುದೇ ಒಂದು ಅದ್ಭುತ ದೃಶ್ಯ. ಇಲ್ಲಿನ ಚಿತ್ರ ಮೂಲವೆಂಬ ಬೆಟ್ಟ ಕೂಡ ಚಾರಣ ಪ್ರಿಯರಿಗೆ ಹೇಳಿ ಮಾಡಿಸಿದ ಸ್ಥಳವಾಗಿದೆ. ಇದು ಆಯುರ್ವೇದ ಗಿಡಮೂಲಿಕೆಗಳ ಆಗರ. ಇಲ್ಲಿ ಹಲವು ಗುಹೆಗಳಿವೆ. ಅಲ್ಲದೇ ಇಲ್ಲಿನ ರಾಮತೀರ್ಥ ಎಂಬ ಸ್ಥಳದಲ್ಲಿ ಹರಿಯುವ ನೀರಿನ ಮಧ್ಯೆ ಈಶ್ವರಲಿಂಗದ ರಚನೆಯನ್ನು ಕಾಣಬಹುದು.

ಕೊಡಚಾದ್ರಿಗೆ ಪುರಾತನ ಕಾಲದಿಂದಲೂ ಜನರು ಯಾತ್ರೆ ಹೋಗುತ್ತಿದ್ದರು. ಇಲ್ಲಿಗೆ ಹತ್ತಿರದ ಸ್ಥಳವಾದ ನಿಲಸಕಲ್ಲು ಎಂಬಲ್ಲಿ ನವ ಶಿಲಾಯುಗದ ಕಾಲದ ನಿಲುವುಗಲ್ಲುಗಳ ಸಾಲುಗಳನ್ನು ಗಮನಿಸಿದರೆ, ಈ ಸುತ್ತಲಿನ ಪ್ರದೇಶದಲ್ಲಿ ಕನಿಷ್ಟ ಮೂರು ಸಾವಿರ ವರ್ಷಗಳ ಹಿಂದೆ ಜನ ವಸತಿ ಇದ್ದಿರಬೇಕು ಎಂದೆನಿಸುತ್ತದೆ.

ಕೊಡಚಾದ್ರಿಯಲ್ಲಿ ಪುರಾತನ ಜನವಸತಿ ಇದ್ದ ಕುರುಹುಗಳು ಇನ್ನೂ ಪತ್ತೆಯಾಗಿಲ್ಲವಾದರೂ, ಕ್ರಿ.ಶ ಏಳನೆಯ ಶತಮಾನದಲ್ಲಿ ಶಂಕರಾಚಾರ್ಯರು ಕೊಡಚಾದ್ರಿಗೆ ಬೇಟಿ ಕೊಟ್ಟಿದ್ದು, ಇಲ್ಲಿದ್ದ ಮೂಲ ಮೂಕಾಂಬಿಕೆಯನ್ನು ಪರ್ವತದ ತಳದಲ್ಲಿರುವ ಕೊಲ್ಲೂರಿನಲ್ಲಿ ಪ್ರತಿಷ್ಟೆ ಮಾಡಿದರು ಎಂದು ಕೊಲ್ಲೂರಿನ ಸ್ಥಳಪುರಾಣ ಹೇಳುತ್ತದೆ. ಶಿಖರದ ಹತ್ತಿರವಿರುವ ಮೂಲ ಮೂಕಾಂಬಿಕೆ ದೇವಾಲಯವೂ ಸಹ ಪುರಾತನವಾದುದ್ದು. ಈ ದೇವಾಲಯದ ಬಳಿ ಸುಮಾರು 40 ಅಡಿ ಎತ್ತರದ ಕಬ್ಬಿಣದ ಕಂಬವಿದ್ದು, ಇದನ್ನು ಮೂಕಾಸುರನನ್ನು ವಧಿಸಲು ದೇವಿ ಉಪಯೋಗಿಸಿದ ತ್ರಿಶೂಲ ಎಂದು ಸ್ಥಳೀಯರು ಹೇಳುತ್ತಾರೆ.

ಕೊಡಚಾದ್ರಿಯ ಸುತ್ತ ಮುತ್ತ ಇರುವುದು ಸಹ್ಯಾದ್ರಿಯ ನಿತ್ಯ ಹರಿದ್ವರ್ಣ ಕಾಡು. ಭಾರತದ ಅತಿ ಹೆಚ್ಚು ಮಳೆ ಬೀಳುವ ಈ ಪರ್ವತ ಶ್ರೇಣಿಯಲ್ಲಿ ಬೆಳೆದಿರುವ ಈ ಕಾಡುಗಳು ತನ್ನದೇ ಆದ ವಿಶಿಷ್ಟ ಶಕ್ತಿಯನ್ನು ಹೊಂದಿದೆ. ಕೊಡಚಾದ್ರಿಯ ತುದಿಯಲ್ಲಿ ನಿಂತು ನೋಡಿದರೆ ನಾಲ್ಕೂ ದಿಕ್ಕಿನಲ್ಲಿ ನಿಬಿಡಾರಣ್ಯವು ಅಲೆ ಅಲೆಯಂತೆ ಹರಡಿರುವ ದೃಶ್ಯ ಕಾಣುತ್ತದೆ.

ಇದೇ ನಾಡಿನಲ್ಲಿ ಹುಟ್ಟಿ ಬೆಳೆದ ರಾಷ್ಟ್ರಕವಿ ಕುವೆಂಪುರವರ ಕವಿತೆಯ ಒಂದು ಸಾಲಾಗಿರುವ “ಹಸುರಿತ್ತಲ್, ಹಸುರತ್ತಲ್, ಹಸುರೆತ್ತಲ್ ಕಡಲಿನಲಿ” ಎನ್ನುವ ಸಾಲು ನೆನಪಾಗುವಂತಹ ತಾಣ ಕೊಡಚಾದ್ರಿ. ಅಲ್ಲದೇ ಇಲ್ಲಿಯ ಸೂರ್ಯಾಸ್ತ ಅಪರೂಪದ ದೃಶ್ಯವಾಗಿದ್ದು, ಈ ರಮ್ಯ ಮನೋಹರ ದೃಶ್ಯವನ್ನು ಆಸ್ವಾದಿಸಲು ದೇಶದ ಎಲ್ಲಾ ಕಡೆಗಳಿಂದಲೂ ಜನರು ಬರುತ್ತಾರೆ.

ಇದು ಹೊಸನಗರ ತಾಲ್ಲೂಕು ಕೇಂದ್ರದಿಂದ 30 ಕಿ.ಮೀ ಮತ್ತು ಶಿವಮೊಗ್ಗ ಜಿಲ್ಲಾ ಕೇಂದ್ರದಿಂದ ಸುಮಾರು 100 ಕಿ.ಮೀ ಅಂತರದಲ್ಲಿದೆ.

ಹೆಚ್ಚಿನ ಮಾಹಿತಿಗಾಗಿ

ಪರಾಮರ್ಶನ

https://kn.wikipedia.org

ಕೃಪೆ : dipr shimoga

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

Trending